Danmarkimit ataatsimoortumik tapiissutit aatsaat taama amerlatigipput – 4,5 milliardit koruunit sinnerlugit.
Maannali aningaasat naleerukkiartornerat pissutigalugu siunissami nalikillisinnaapput.
Danmarkimit ataatsimoortumik tapiissutit aatsaat taama amerlatigipput – 4,5 milliardit koruunit sinnerlugit.
Maannali aningaasat naleerukkiartornerat pissutigalugu siunissami nalikillisinnaapput.
Aningaasat pisariaqartinneqarput, tamannalu Naalakkersuisut aningaasaqarneq pillugu nassuiaataanni erseqqissarneqarpoq.
- Namminersorlutik Oqartussani kommuninilu sulisut akissarsiaannut aningaasartuutit tamarmiusut ataatsimut tapiissutinit amerlanerupput, aningaasaqarnermut naalakkersuisoqarfik nassuiaammi allappoq, nangipporlu:
- Naalagaaffiup ataatsimut tapiissutai nunatsinni pisortat akissarsianut aningaasartuutaasa qaffariarneranut malinnaanngillat.
11.000-init amerlanerusut pisortani atorfeqarput, taakkualu inuiaqatigiinni suliassat pingaarutillit isumagisarpaat: Atuarfiit, meeqqanik paaqqinnittarfiit, utoqqarnik sullissiviit, peqqinnissaqarfik, allaffissorneq allarpassuillu.
Nassuiaammi atuarneqarsinnaavoq Namminersorlutik Oqartussani kommuninilu sulisut akissarsiaannut aningaasartuutit 2015-imiit 2023-mut 30 procentingajannik qaffassimasut, tamannali sulisut ataasiakkaat ukiut ingerlaneranni aningaasarsiaqarnerulersimanerannik pissuteqartutut paasineqassanngitsoq erseqqissarneqarpoq.
- Nassuiaatit allaasinnaapput, tassani sulisartut ilinniarsimasut, ilinniagartuut pisortallu amerlanerusut, kiisalu pisortap ataatsit sulisorisaasa ikileriarnerat. Tamanna qulaajarniarlugu itinerusumik aningaasartuutinik misissueqqissaarnissaq pisariaqarpoq, naalakkersuisoqarfik allappoq.
Ukiumut 400 millionit
Aningaasarsianut soraarnerussutisianullu aningaasartuutit kisimik inuiaqatigiit aningaasaqarnerannik tatisisuunngillat. Aningaasaqarnermullu naalakkersuisup Múte B. Egedep aningaasaqarnikkut ajornartorsiorneq pillugu saqqummiinermini, Nunatta karsianut isertitat ikileriarnerat aamma ajornartorsiutaasoq annertooq eqqaavaa. Qallunaat naalakkersuisuinit nutaarsiassap ajornartorsiutit ilaannut aamma iluaqutaasinnaassagunarpoq, taanna Christiansborgimi akuersissutigineqassappat.
Aningaasanut inatsisissatut siunnersuut nutaaq tallimanngornermi saqqummiunneqartoq naapertorlugu “Danskit naalakkersuisuisa Kalaallit Nunaata Danmarkillu suleqatigiinnerat pingaarnersiorniarpaat ” taamaattumillu 2030-p tungaanut ukiumut 400 millionit koruuninik immikkoortitsisoqarpoq – katillugit 1,6 milliardit koruunit.
Aningaasat taakku ataatsimut tapiissutinut tunnganngillat, allaaserisallu uuma suliarinerani Naalakkersuisuit aningaasat taakku qanoq atussaneraat paasissutissiissutigineqanngilaq. Peqqinnissaqarfimmulli aningaasaliisoqassasoq naatsorsuutigineqarpoq.
Naalakkersuisut aningaasanut inatsisissatut siunnersuumminni pisortat ingerlatsiviini pitsanngorsaanissaq siunertaralugu "aaqqissuusseqqinnerit" pissasut aarlerisaarutigaat:
- Namminersorlutik Oqartussat kommunillu akornanni ingerlatsinerup pisariillisarnissaa innuttaasunullu qaninnerusunngortinnissaa siunertaavoq, allassimavoq.
