- Nunat uatsitulli naleqartitallit qaninnerulertariaqarpavut

Suliffeqarfissuit aningaasaateqarfissuillu nunanit avannarlerneersut arlallit suleqatigiilerput, tassanilu Maliina Abelsen siunnersuisoqatigiuusuni qitiusumik atuuffeqalerpoq.

Taaguutaa tassaavoq Nordic Compass – The Nordic Round Table for Industry.

- Suliffeqarfissuit Danfoss, Novo Nordisk Fonden aamma Sverigemeersoq Vattenfall suleqatigiinnissamik nutaamik isumaqatigiissuteqarlutik saqqummiussimmata, Nunatta avataani inissisimannginnissaa pingaaruteqarpoq. Suleqatigiit suleqatigiilluni peqatigiinnissanut ammaassisinnaapput, nukissiuuteqarnermullu tunngasunik suleqateqarnissamut aningaasaliinissamullu ammasinnaallutik, Maliina Abelsen Sermitsiamit apersorneqarluni oqarpoq.

Siunnersuisoqatigiinni taakkunani qitiusumik inissisimaffeqarpoq. Tassami Maliina Abelsen Nordic Advisory Boardimi, NAB-mi, ilaasortanngorpoq. Siulersuisut taakku Nordic Compass-imut qanoq periuseqarnissamut siunnersuisartuupput.

Nordic Compass-ip siunertaraa Nunani Avannarlerni, aamma Kalaallit Nunaanni, inuussutissarsiortut unammillersinnaanerannik nukittorsaanissaq, Nordic Compass tusagassiuutinut nalunaarummini taama allappoq.

- Suleqatigiinni qaninnerusumik attaveqaqatigiilertariaqarpugut, aamma Nunani Avannarlerni Europallu sinnerani inuussutissarsiorneq siuariartornerusinnaaqqullugu suleqatigeeriaatsinik nutaanik suleqateqalernissarput nassaarisariaqarparput.

- Nunarput aningaasaliisartorpassuarnit maannakkut soqutigineqarpoq. Periarfissat ammasut, tassa piffissami matumani Nunatta maluginiarneqaleruttornerani Nordic Compass-illu suleqatigilernissaanut periarfissaasoq, Nunatsinnit qanoq atorluarsinnaaneripput paasisariaqarparput.

- Suliffeqarfiit soorlu Tusass aamma NunaGreen suleqatigiinnikkut iluaquserneqarsinnaapput, tassami suleqatigiinnikkut immaqalu aningaasaateqarfinnit suliffeqarfinnillu Nunani Avannarlerniittunit aningaasaliissuteqartoqarsinnaassammat, Maliina Abelsen isumaqarpoq.

Suliniut aqqutissiuisoq

Nordic Compass-imi suleqataasut ilagaat Nunani Avannarlerni suliffeqarfiit aningaasaateqarfiillu nuimasut 25-nit amerlanerusut, soorlu Danmarkimeersut Danfoss, Novo Nordisk Fonden aamma Ørsted, Sverigemeersullu Vattenfall, Nordea aamma Wallenberg Investments.

Ørsted nunarsuarmi nukissiuutinik anorisaatinik ineriartortitsinermi, sanaartornermi ingerlatsinermilu siuttuuvoq. Wallenberg Investments Sverigemi suliffeqarferujussuarnut tunuliaqutaavoq.

Sulisitsisut, GE, maannamut Nunatsinni kisimiillutik Nordic Compass-imi peqataatitaqarput.

- Nordic Compass aqqutissiuisuuvoq, tassami Nunani Avannarlerni suliffeqarferujussuit maanna ataatsimoorfeqaleramik. Taakkumi ataatsimoornerup iluaqutaanera takusinnaavaat.

Maliina Abelsen inuussutissarsiornikkut iluatsitsilluartareerpoq politikeriusimalluni nuimasoq, siulersuisunilu sulinermik misilittagaqarluarluni. Siornatigut Royal Greenlandimi siulersuisunut siulittaasuuvoq, Air Greenlandimi niuernermut pisortaasimalluni aningaasaqarnermullu naalakkersuisutut atuuffeqarsimalluni. Grønlandsbankenimi ullumikkut siulittaasumut tulliuvoq, UNICEF Danmarkimilu siulersuisuini ilaasortaalluni.

Pingaarnertut suliniuteqarfiusussat sisamat

Nordic Compass-imi suliffeqarfiit Nunani Avannarlerni naalakkersuisut suleqatigalugit suliassaqarfiit pingaarutillit sisamat sammissavaat. Tassaasut aningaasatigut niuerfiit, nukissiorneq, illersornissaq/isumannaallisaaneq aamma teknologimut aqqutissiuussinerit.

Teknologii, qarasaasiakkut aaqqiissutit nakorsaatinillu tunisassiorneq, ukiuni kingullerni qulini ineriartorluarput nutaalianik ilisimatusarnermillu tunngaveqartunik aaqqiissuteqartoqartarluni.

Teknologimi aqqutissiuussineq deep tech, teknologiitut allatulli inngilaq, piffissami sivisuumi ineriartortinneqarlunilu siuarsarneqarlunilu akisuumik ineriartortinneqarlunilu niuerfimmut immaqa suli piviusunngorsimanngisaannartumut ingerlariaqqiffiusussamut ajornakusoortutut isigineqartumut ingerlateqqinneqartarluni.

- Aallunneqartussat sisamaasut piviusorsiortuullutillu Kalaallit Nunaannut pingaaruteqarluinnarput. Nunat Avannarliit allat Kalaallit Nunaata nipaanik tusaanissaat pingaaruteqarpoq, soorlu nukissiornermut tunngasunnik, Maliina Abelsen oqarpoq.

Nunat Avannarliit nunarsuup immikkoortuatut unammillersinnaanerpaat ilaattut isigineqartarput. Danmarkimi, Norgemi, Sverigemi Finlandimilu aningaasaqarneq, patajaatsuuneq, inuussutissarsiornermik ingerlatsineq, attaveqaasersuutillu nunarsuarmi siuarsimanerpaasut, siornatigut misissuinerit takutippaat.

Maliina Abelsenip tikkuarpaa, Kalaallit Nunaanni inuussutissarsiornerup aamma nutaaliorluni aallarnisaanerup nukittunissaat pingaaruteqartoq. Nunallu avannarliit sinnerinik qanimut suleqateqarnikkut tamanna iluaquserneqarsinnaavoq.

- Kalaallit Nunaat Nunanut Avannarlernut allanut immikkut ittumik atassuteqarpoq. Taakku suleqatiginerpaasarpavut. Taamaattumik Kalaallit Nunaata Nordic Compass-imut ilanngunnissaa, avataanilu inissisimannginnissaa pingaaruteqarpoq, oqarpoq.

Oqaatigineqareersutut Nordic Compass-ip Nunat Avannarliit naalakkersuisui suleqatigerusuppai, suliniutissallu sisamat taakkununngalu tunngasut pingaarutillit — aningaasanik niuerneq, nukissiorneq, illersornissaq isumannaallisaanerlu kiisalu teknologi nutaaliaasoq — ukkatariniarlugit.

Nunatta suleqatigiinnut peqataanissaa pingaaruteqarluinnassasoq, Nordic Compass-imit naatsorsuutigineqarpoq, assersuutigalugu nukissiornermut aamma immap naqqatigut kabelinik amerlanngitsunik, attaveqaasersuutinik pingaarutilinnik taaneqartartunik, pinngitsoorsinnaannginnerulernissamut.

Assersuutigalugu immap naqqatigut kabelip nutaap Kalaallit Nunaata Islandimut, Savalimmiunut Danmarkimullu attaveqaateqalernissaa sivisuumik oqaluuserineqartarsimavoq.

Immap naqqatigut kabelinut aningaasaliissutit

Sulisitsisut Nordic Compass-imut peqataanerat, Nunatsinni suliffeqarfiit suliffissuillu Nunani Avannarlerni niuernikkut suleqatigiinnermut peqataanissaannut periarfissiisoq, Maliina Abelsenip oqaatigaa.

- Nordic Advisory Boardimi ilaasortatut Kalaallit Nunaat Issittorlu aallaavigalugit, assersuutigalugu Kalaallit Nunaanni Nunanilu Avannarlerni suliffeqarfinnut periusissianik siunnersuisartussatut peqataavunga. Aammattaaq inuussutissarsiornerup, politikip inuiaqatigiillu Issittumi imminnut qanoq attuumassuteqarnerat paasisimasaqarfigaara, Maliina Abelsen oqarpoq.

Kalaallit Nunaanni suliffeqarfiit Nordic Compass aqqutigalugu suliniutinut assigiinngitsunut peqataasinnaalissasut taanna isumaqarpoq, tassanilu suliffeqarfiit aningaasaliisullu aaqqiissutissanik tigussaasunik ineriartortitsissasut suleqatigiinnerminnillu ineriartortitsissallutik.

Nunatsinni suliffeqarfiit Nordic Compass aqqutigalugu suliniutinut assigiinngitsunut peqataasinnaassapput, tamatumani suliffeqarfiit aningaasaliisartullu suliniutinut aalajangersimasunut aaqqiissutissanik suleqatigiissutissanillu ineriartortitsissasut, isumaqarpoq.

Nordic Compass-imit oqaatigineqartut naapertorlugit, Nunanik Avannarlernik toqqaannarnerusumik suleqateqarnikkut, Nunarput nunani taakkunani tamani suleqatigiinnernut, aningaasaliinernut ilisimasanullu toqqaannartumik peqataasinnaassaaq.

Tamanna nukissiornermik, attaveqaasersuutinik inuussutissarsiutinillu nutaanik ineriartortitsinerup sukkanerulernissaanut iluaqutaasinnaassaaq – tamatumalu saniatigut aaqqiissutissarsiornermi Nunani Avannarlerni ineriartortinneqartuni Kalaallit isumaat qitiutinneqassallutik.

Nunarput erseqqissumik nalunaartariaqartoq

Aningaasaliinissat suut pisariaqartinneqarnersut, Nunatsinnit erseqqissumik oqaatigineqartariaqarput, taamaalilluni aningaasaliissutissat aqqutissarsiuunneqarniassammata.

- Aningaasaliissutit suut kissaatigineqarnersut, Nunatsinnit erseqqissumik oqaatigineqanngippata, taava allat pingaaruteqartutut isigisaat pissarsiarissavavut, Maliina Abelsen oqarpoq.

Taassuma oqaatigaa, nunamut aningaasaliisarnissamut periusissiamik oqallisiginnittoqartariaqartoq tamatumani qulakkeerniarlugu aningaasaliissutissat aaqqissuussaanikkut unammillernartunut aaqqiissutaasinnaanissaat.

- Aningaasaqarnermut tunngatillugu annertuunik unammilligassaqarpugut, innuttaasut ikiliartormata aalisarnerlu kisiat isumalluutigiunnaarniarlugu inuussutissarsiorneq nukittorsarneqartariaqarmat.

- Taamaattumik aningaasaliissutit sorliit kajungernarnerulersinniarnerlugit, Nunatsinnit erseqqissumik aalajangiiffiginissaat pingaaruteqarluinnarpoq. Assersuutigalugu aningaasaliissutit, soorlu nukissiornermi erngup nukinganik nukissiorfiit imaluunniit qarasaasiaqarnermi qitiusumik ingerlatsiviit pilerisaarnissaat kissaatiginartinnerlugit oqaatigalugit.

- Aningaasaliissutigineqartut siunissami aningaasaqarnikkut ataavartumik ingerlatsisinnaanissamut iluaqutaanerpaanissaat pingaaruteqarpoq.

- Nunatsinni aningaasaliisartunik eqqortunik toqqaanissarput suliniutinullu Nunatta ineriartorneranut siuariartorneranilu iluaqutaasussanut eqqortunik aningaasaliisariaqartugut isumaqarpunga, Maliina Abelsen oqarpoq.

Taassuma tikkuarpaa Tusassip, NunaGreenip Nukissiorfiillu „namminersorluni suliniuterujussuaq”, soorlumi Nordic Compass taama taagaa – The Nordic Round Table for Industry-mik taasani iluaqutigisaminnik ilisimasaqarfigilersinnaagaat oqaatigaa.

NunaGreen Nunatsinni mingutsitsinngitsumik nukissiornermut tunngatillugu ingerlatsisuussaaq. Ingerlatseqatigiiffik suliniutinik annertuunik marlunnik suliaqarpoq, tassa Qasigiannguani erngup nukinganik nukissiorfiliortoqarnissaa aamma Nuup eqqaani Utoqqarmiut Kangerluarsunnguanni erngup nukinganik nukissiorfiup allilerneqarnissaanik.