Kilisaatit naalagaat aalisartullu Royal Greenlandip Nuummi Qasapi 4-mi qullersaqarfiani inunnik nalunaarsuiffimmi nalunaarsorneqartarsimasut Nunatta Eqqartuussisuuneqarfiani qanittukkut aalajangiinermi paasinarsivoq.
Adresse taanna najugaqarfissatut akuerineqanngilluinnaraluartorluunniit inuit taamatut nalunaarsorneqarsimasut aalisariutinik inuttalersuinermut malittarisassat naapertorlugit inuttaasinnaalertartut eqqartuussinermi aamma periarfissinneqarpoq.
Kilisaatit naalagaat aalisartullu Royal Greenlandip Nuummi Qasapi 4-mi qullersaqarfiani inunnik nalunaarsuiffimmi nalunaarsorneqartarsimasut Nunatta Eqqartuussisuuneqarfiani qanittukkut aalajangiinermi paasinarsivoq.
Adresse taanna najugaqarfissatut akuerineqanngilluinnaraluartorluunniit inuit taamatut nalunaarsorneqarsimasut aalisariutinik inuttalersuinermut malittarisassat naapertorlugit inuttaasinnaalertartut eqqartuussinermi aamma periarfissinneqarpoq.
Kommuneqarfik Sermersuumi sulisoqarnermut pisortaq Lone Rosengreen Pedersen innuttaasunik sullissinermut akisussaavoq, taamaalillunilu 2025-mi 2026-milu eqqartuussinermi ilisimannittutut apersorneqarpoq. 2016-imi atorfininnera sioqqullugu Qasapi 4 najugaqarisatut nalunaarsorneqartarsimasoq eqqartuussivimmi 2025-mi oqaluttuarpoq.
Nammineq Royal Greenlandip adressimik atuinera allanngortinniarsimagaluarpaa, Royal Greenlandimiilli taamaatinnissaa soqutigineqaranilu Aalisarnermut Piniarnermullu Nakkutilliisoqarfimmit iliuuseqarfigineqarusunngilaq.
Sooq kukkusumik nalunaarsorneqarsimasut akuerineqassappat?
Malittareqqiilluni apeqqutinik nassiussillutalu Lone Rosengreen Pedersenimit allakkatigut akissutisivugut. Ataani atuarneqarsinnaapput.
Sooq innuttaasut adressinut najugaqarfigineqanngitsunut nalunaasorsimasut Innuttaasunik sullissiviup tassani najugaqanngitsut nalunngikkaluarlugit akuerai?
- Oqaluttuarisaanermi nalunaarsuinerit immaqa malittarisassanik naapertuinissaq siunertaralugu naammaginanngitsumik nassuiarneqartarsimaput.
– Ullumikkut periaaseq ersarippoq: Najugaqarfik CPR-imi allassimasoq tassaavoq inuup najuuffigisaa, tamannalu malillugu ingerlatsivugut. Nalunaarsuinerit eqqunngitsuusut paasigaangatsigu misissuillutalu inatsisit atuuttut naapertorlugit iliuuseqarfigisarpagut.
Nalunngisattut innuttaasut akuerisaanngitsumut nuukkaangamik namminneq nalunaarsuisinnaaneq ajorput. Taamaappat innuttaasunik sullissivimmi sulisut aalisartut sinnerlugit adressi najugarisatut nalunaarsorneqarsimasoq namminneerlutik allattarpaat?
– Innuttaasut nammineq paasissutissat tunngavigalugit imaluunniit innuttaasunik sullissivimmut saaffiginnillutik nalunaarsorneqartarput, tassanilu paasissutissat allaffissornikkut nalunaarsorneqartarput.
– Suliat aalajangersimasut nalunaarsuinerillu ataasiakkaat oqaluttuarisinnaanngilakka, najoqqutassiarli tunngaviusoq naapertorlugu innuttaasut sumi najugaqarnertik eqqortumik paasissutissiissutigisussaavaat, paasissutissallu taakku tunngavigalugit kommuni nalunaarsuisarpoq.
Amerlassusaat oqaatigisinnaanngikkai
Lone Rosengreen Pedersenip nammineq oqaluttuarnera naapertorlugu taamatut periaaseqarneq akuerineqaannassasoq atorfilimmit allamit oqarfigineqarsimavoq. „Tamanna isertuunneqarpoq,“ eqqartuussiviup allagaatai naapertorlugit taama oqariartuuteqartoqarpoq.
Kiap taama oqarfigaatit?
– Pisortaqarfimmi pissutsit inuilluunniit ataasiakkaat oqaaseqaataat oqaaseqarfigisinnaanngilakka. Innuttaasunik sullissinermut pisortatut ullumikkut eqqortumik malittarisassallu atuuttut naapertorlugit ingerlatsinissarput pingaarnerpaatippara, Lone Rosengreen Pedersen akivoq.
Inuit qassit ullumikkut Nuummi Qasapi 4-mi najugaqarnersut, siornatigullu qassit taamaaliortarsimanersut innuttaasut sullissivianit ilisimatitsissutigineqarsinnaava?
– Paasissutissat illersorneqarnissaat eqqarsaatigalugu najugaqarfiit aalajangersimasut inuilluunniit qassit nalunaarsorneqarsimanersut paasissutissiisinnaanngilanga. Inuit nalunaarsorsimaffianni nalunaarsukkat eqqortuunissaasa qulakkeernissaa suliarisarparput, adresselu pillugu nalorninartoqarpat sukumiisumik misissuisoqartarpoq, Lone Rosengreen Pedersen oqarpoq.
KANUAPNA: Allatut iliorsinnaanngilagut
Aalisarnermut Piniarnermullu Nakkutilliisoqarfiup Qasapi 4 inuttaqarnissamut maleruagassat naapertorlugit Kalaallit Nunaanni najugassatut akuerigaa Nunatta Eqqartuussiviani aamma oqaatigineqarpoq.
– KANUAPNA-p inuit nalunaarsorsimaffianni allassimasut maliinnartariaqarpai, inuillu nalunaarsorsimaffiannik nakkutiginninnissaq kommunip suliassaraa, aalisarnermut piniarnermullu nakkutilliisuni pisortaq Claus E. Nielsen oqarpoq.
Royal Greenlandittaaq sooq Lone Rosengreen Pedersenip Qasapi 4-mi najugaqarnerup inatsisinut naapertuutinnginneranik nalunaarutiginninnera soqutiginnginneraat aamma aperaarput.
– Piffissami pineqartumi inuttalersuinermut malittarisassat paasiuminaatsinneqarput. Royal Greenlandimiinnaanngitsoq nalorninartorsiortoqarpoq, inuussutissarsiornermili tamarmi taamaappoq. Kingorna malittarisassat erseqqissarneqarput, pissutsillu periuseq malillugu ingerlapput, Royal Greenland allappoq.
