USA Nuummi sinniisoqarfimmik ammaanissamut qaaqqusisoq
Nuup qeqqani illorsualiami sananeqarlaami naqqarliup USA-mit pigineqarnera pillugu Sermitsiaq tusagassiuutini siullersaalluni 2024-mi paasisaqarpoq. Amerikamiut illorsuarmut ilumut attuumassuteqarnerlutik piffissami sivisuumi uppernarsarumanngilaat, maannali inini nutaani ammaanersiornermi ilassinninnissamut qaaqqusipput.
Amerikamiut Nuummi sinniisoqarfiat maajip 21-aniit Imaneq 41-mi illorsuarmut nutaamut nutsissaaq. Sermitsiap paasissutissaatai naapertorlugit USA-p illorsuarmi naqqarleq 2024-mi maajimi pisiaraa. Sermitsiap Amerikamiut illorsuarmut attuumassuteqarnersut arlaleriarluni apeqqutigisarsimagaluarpaa, iluatsinngitsumilli. Amerikamiut timmisartuata Herculesip biilit qaleruarsuallit sisamat Vancep tikeraarnissaanut kingusinnerusukkut taamaatiinnarneqartumut atatillugu 2025-mi marsimi Nuummut assartorpai. Biilit taakku sisamat illorsuarmi naqqup ataanut inissinneqarput, kisianni aamma tassani illorsuarmut attuumassuteqarneq USA-mit uppernarsarneqanngilaq.
Assi: Oscar Scott Carl
USA-p Danmarkimi aallartitaa Ken Howery USA-llu Nuummi sinniisua Susan A. Wilson Amerikamiut sinniisoqarfittaavata Nuup qeqqani Imaneq 41-miittup sisamanngornermi maajip 21-anni nalunaaqutaq 14-imiit 17-imut ammaanersiorneqarnissaanut qaaqqusisuupput.
Sermitsiap paasissutissaatai naapertorlugit ammaanersiornermi, aamma USA-p 1776-imi namminiilivinnerata kingorna ukiut 250-it nalliuttorsiutigineqarneranut atatillugu, niuernikkut attaveqarfippassuarnik, suleqataasunik isumaliutersortartunillu qaaqqusisoqarpoq.
USA-p ilumut attuumassuteqarnerluni akuerinagulu itigartinngikkaa
USA-p illorsuarmi 3.000 kvadratmeterisut angitigisumi quleriinni naqqarleq tamaat, ilaatigut igalaanik qajannaatsunik qalialiornerup kingorna, tiguaraa Sermitsiap tusagassiuutinit siullersaalluni 2024-mi maajimi saqqummiuppaa.
Taamani Amerikamiut Nuummi aallartitaqarfiannit sinniisoqarfianiillu Kalaallit Nunaanni sinniisoqarfeqalersimaneq uppernarsarneqanngilaq.
Allaat USA-p timmisartumik Herculesimik biilinik qaleruarsualinnik sisamanik 2025-mi marsip qiteqqunnerani Nuummut assartuigami, kingornalu biilit Imaneq 41-p naqqanut ingerlammagit, Amerikamiut illorsuarmut attuumassuteqarnertik uppernarsarumanngilaat.
USA-p aallartitaqarfiani oqaaseqartartoq maannamut nalunaaruteqartoqarsinnaanngitsoq taamanikkut Sermitsiamut oqarpoq:
“USA-p Nuummi sinniisoqarfipput ammaqqinniarlugu 2020-mi nalunaarmalli sumiiffissaq eqqortoq nassaariniarlugu qulakkeerniarlugulu sulisimavugut. Tamanna pillugu ungasinngitsumi saqqummiusseqqinnissatsinnut qilanaarpugut".
Amerikamiut sinniisoqarfiat maannamut Sipisaq Kujallermi Kujallerpaaniippoq
Oscar Scott Carl
Ataatsimeersuarnerup Future Greenlandip ingerlanneqarnerata aqaguani
Nuummi sinniisoqarfik maajip 21-ani pisortatigoortumik Sipisaq Kujallermi illumit aappalaartumit Nuup qeqqanut nuutinneqassaaq.
Sulisitsisut ataatsimeersuartitsinerata Future Greenlandip Nuummi maajip 19-iani 20-anilu ingerlanneqarnerata aqaguani ammaanersiortoqassaaq, tassani USA-p Danmarkimi aallartitaa Ken Howery USA-milu sinniisoq Susan A. Wilson peqataassapput. Tamatuma saniatigut USA-p præsidentiata Donald Trumpip Kalaallit Nunaannut immikkut aallartitaa Jeff Landry ataatsimeersuarnermut Future Greenlandimut peqataajartussalluni nalunaarpoq.
