Tasiilaq: Sikuntimut 42,9 meterisut sakkortutigisumik anoraasuartareersorlu aseruatiterinerit arlallit
Tasiilami ataasinngornermi piterarnerarneranni illut arlallit aseruatiterput. Piteraq sakkortunerpaagami sikuntimut 42,9-p tungaanut anoraasuartaqartoq inissiat arlallit aseruatiternerannik kinguneqarpoq.
Kommunip materialegårdiata qalissiaa annertoorujussuaq teqqaalermat aqqusineq nalaaniittoq matuneqarpoq.
Assiliisoq: Egon Poulsen
Aputeqartinnagu piteraraangat ujaraaqqat allallu teqqaasarmata aseruatiternernik kinguneqarsinnaasarpoq. Tamatumuuna aamma pisoqarpoq. Inissiammi sanaartukkallu arlallit igalaajarlutillu qalissiarsui teqqaapput.
Inissiaatileqatigiiffiup Iserit A/S-ip paasissutissiinera malillugu piteqqap kingunerisaanik inissiat arlallit aseruatiterput:
- Inissiami aniinganeq tingitaavoq
- Igalaat isumannaallisakkat tallimat arfinillit aserorput taarserneqartariaqarlutillu
- Igalaaq ataaseq igalaap assersuutaa katareersorlu aserorpoq
- Inissiap ataatsip qalissiaa kaanngarsimavoq
Asiap nittartagaani paasissutissat malillugit anori ataasinngornermi sakkortunerpaagami sikuntimut 42,9 meterisut sakkortutigisumik ullukkut ataatsimut anoraasuartarpoq.
Igalaat isumannaallisakkat tallimat arfinillit aserorput.
Assi: Iserit A/S
Silarlukkaluartoq politiit orniguttariaqarsimanngillat
Naak Tasiilami silarlukkaluartoq politiit orniguttariaqarnerannik kinguneqartumik pisoqarsimanngitsoq Kalallit Nunaanni Politiini pigaartut pisortaat Aputsiaq Hansen ilisimatitsivoq.
– Illut ilaasa qalissiaat ajoquserneqarput, taamaammat innuttaasut isersiamaannarnissaannik kaammattuivugut, taanna oqarpoq.
Materielgårdip qalissiarsua kaanngarluni aallartimmat aqqusineq matuneqartoq Kalaallit Nunaanni Politiivi Facebookiminni ataasinngornermi ilisimatitsipput. Aputsiaq Hansenilli oqarnera malillugu biilertut aqqut alla atussagaat piumaffigineqarput, aqqusinermi assersorneqavissimanngilaq.
Aqqusineq ammarneqaqqereerpoq.
– Maanna inoriaqquumisimasoq paasivarput. Allanik ajoqusertoqarsimaneranik aseruatiternilluunniit nalunaarfigineqanngilagut, Aputsiaq Hansen oqarpoq.
