AALISARNEQ INATSISISSAQ
Atassut Kielsenimut tatiginninnginnermik nalunaaruteqarpoq: Amerlanerussuteqartut pinngitsoortitsipput
Naalakkersuisut aalisarnermut inuussutissarsiutinullu siunnersuutaata aappassaaneerneqarnerani oqallinneq suli ingerlavoq. Nal. 19:50 missaani Atassut siulittaasua Aqqalu C. Jeremiassen § 52-mik siunnersuuteqarpoq (tatiginninnginneq) aalisarnermut, piniarnermut nunalerinermullu Naalakkersuisoq Kim Kielsen (S)-mut, taassuma aappassaaneerinninnermi akissuteqaatini atorlugu Inatsisartuni illuatungiliuttut saniatigut innuttaasut atiisigut taaneqanngitsut oqalugiaammini "eqqunngitsumik ersisaarinermillu saqqummiussuinerarlugit" naveerpai.
Kathrine Kruse
Aalisarnermut inatsisissatut siunnersuummik aappassaaneerneq suli ingerlanneqarpoq Inatsisartut ataatsimiittarfianni.
Aalisarnermut piniarnermullu Naalakkersuisoq, Kim Kielsen oqallinnermik aallarniivoq illuatungiliuttunik tapersersuisunillu isornartorsiuilluni, taanna naapertorlugu, paasissutissat eqqunngitsut ersisaarinerillu piviusorsiortuunngitsut saqqummiussoraat.
Taamaaliornera maanna tatiginninnginnermik taasititsinermik kinguneqarpoq.
Atassutip siulittaasua aalisarnermullu oqaaseqartartua, Aqqalu C. Jeremiassen naammaginninngilluinnarpoq Naalakkersuisut ilaasortaasa ataatsimiittarfimmi oqaluttarnerminni Inatsisartuni ilaasortat namminneq isummaminnik saqqummiussinissamut pisinnaatitaaffiannik aporaaffiginninnerat:
- Pissaaneq pingasoqiusanngorlugu agguagaavoq inatsisartullu isummersinnaatitaanerat illersungaavoq, Aalisarnermut Piniarnermullu Naalakkersuisoq imm.35 aappassaaneerneqarnerani akissuteqaateqarnermini partiit illuatungiliuttut tikkuarpai eqqunngitsumik avammut paasissutissiinerarlugit, nassuiaasernagulu sooq.
- Naalakkersuisoq erseqqissaanngilaq suna illuatungiliuttut inuiaqatigiinnut puupassaarinertut nipilimmik inatsisissami pisimaneraat, taamaalillunilu avammut inuiaqatigiinnut eqqunngitsumik illuatungiliuttut partiivi nivinngarlugit.
- Partiit illuatungiliuttut inatsisartuni ilaasortaatitaqartut inatsisissamut ernummateqarnermik aallaavilimmik saqqummiussaqarsinnaanerat pisinnaatitaaffiuvoq naalakkersuisumillu nipangersarneqartussaatitaanani.
-Tamakku tunngavilersuutit pillugit Atassumiit Aalisarnermut Piniarnermullu Naalakkersuisumut tatiginnikkunnaarluta nalunaarutigiutaa taasinissarput qinnutigaarput.
Atassut tatiginninnginnermik nalunaaruteqarnermini kisimiippoq, kisianni Aqqalu C. Jeremiassenip Sermitsiamut oqaatigaa illuatungiliuttut sinneri tapersiisut Atassutip § 52-mut siunnersuutaa tapersersimagaat.
Ataatsimiinnermi akunnerup affaata missaa uninngareerluni maanna aallarteqqeqqammerpoq.
Amerlanerussuteqartut Inuit Ataqatigiit Siumullu tatiginninnginnermik taasisitsisoqarnissaanik pinngitsoortitsipput.
