Attartornermut isumaqatigiissutit aaku

Kommuneqarfik Sermersuup inissianut aningaassaliisartunik attartornissamik isumaqatigiissutini misissoqqissaarpai, misissueqqissaarnerullu inernera kommunimi eqqunngitsoqarneranik pasitsaassinermik kinguneqarpoq:

Attartornissamik isumaqatigiissutinit tallimanit pingasuni kommuni inissianik attartornermut akiliuteqarpallaarsimavoq, attartornissamillu isumaqatigiissutini tallimani tamani inissianik aningaasaliisut ukiut tamaasa attartornermut peqqussut unioqqutillugu ineqarnermut akiliutinik qaffaasarput.

Attartornissamik isumaqatigiissuteqarnermit, 31. august 2018-p 3. april 2020-llu akornanni pisumit, kingumoortumik ineqarnermut attartornermut akiliutaavallaartut utertinneqarnissaat Sermersuup piumaavaa.

Aalajangersimasumik inissianik attartornermut akiliutit qaffanneqartarnerat tunngavigalugu akilerneqartut aamma uterteqquneqarput.

Inissianik attartortitsisarneq pillugu peqqussut inissianik attartornermut akiliutit qaffanneqarnerannut sakkortuunik malittarisassiuussivoq, tassani qaffaanissat uppernarsaaserneqartut qaammatit pingasut sioqqullugit ilimasaarutigineqarnissaat piumasarineqarpoq. Kommuneqarfik Sermersuup inissianik attartornissamik isumaqatigiissutaani qulingiluani, ukiut tamaasa 2 – 4 procentimik annertussusilimmik inissiamik attartornissamik akiliutit nammineq isummaminnik qaffanneqartarnissaat ilaatinneqareerpoq.

Inissianik aningaasaliisartut Sermitsiap attaveqarfigisaasa inissianik attartornermut akiliutinik aalajangersimasumik qaffaasarnerup attartortitsinermik peqqussummut akerliunera oqaloqatigiissutigissallugu piumassuseqarput. Akerlianik ineqarnermut attartornermut akiliutip ilaata, attartornissamik isumaqatigiissutit isumaqatigiissutigineqarneranni kommunip akuerisai, ullumikkullu kommunip qaffasippallaarsoralugit utertinneqarnissaanik piumasaqaateqarfigisai akuerinngilaat. 

Aningaasalersuineq allanngortinneqartoq

Ukiuni 20-ni ernianut taarsersukkanullu akilersuiffiusussaanngitsutut taarsigassarsiat, Kommuneqarfik Sermersuup utertinnissaannik piumasaqaatigisai atuutsinnagit, inissianik aningaasaliisut nammineerlutik aningaasalersuutaat taarsigassarsiat annertoqqataannik qaffassapput, taamaattoqarneranilu aningaasaqarniarnerat oqimaaqatigiikkunnaassaaq. Ajornartorsiulli tamanna nammineerlutik ajornartorsiutigaat.

Kommuneqarfik Sermersuup Ineqarnermut Attaveqaqatigiinnermullu Naalakkersuisoqarfik inissianik attartortitsinerup akianik aalajangersaanermi malittarisassanik taakku qanoq paasinninnerannik oqariartuuteqarnissamik qinnuigai.

Naalakkersuisoqarfik naapertorlugu attartortitsisut nammineq aningaasalersuutaasa annertussusaat illuutip sanaartornerani naatsorsorneqassaaq, kingornalu avataanit aningaasalersuutinut taarsersuinermut akiliutit inissiamik attartornerup akianut ilanngullugit naatsorsorneqarsinnaanngillat. Aamma pisortanit taarsigassarsiat taarsigassarsianik allanik taarserneqartillugit.

Isumaqatigiissutit

Kommunip inissianik aningaasaliisartunik tallimanik attartornermik isumaqatigiissitai saqqummiuppai.

Attartornissamut isumaqatigiissutini qulingiluani tamani kommunip peqatigisaanik katillugit 125 million kr-nik amerlassusilinnik ukiuni 20-ni ernianut taarsersorneqartussaanngitsunillu taarsigassiinera atuuppoq.

Ceresvej 7 + 9

Inissiaatileqatigiiffik Sermersooq ApS Nuummi Ceresvej 7 aamma 9-mi inissiarsuarnik marlunnik sanaatorpoq.

Akii: 56.682.577 koruunit.

Pisortanit inissianut taarsigassarsiat: 6.609.475 koruunit.

Inissiaatileqatigiiffik kommunilu ulloq 1. april 2019-mi inissiat 29-t attartornissaannik isumaqatigiissuteqarput, ukiumullu 3.360.000 koruunit, ukiumut 2 procentinik qaffattartussat ineqarnermut akiliutaasarnissaannik isumaqatigiissuteqarput.

Inissianik attartornermut akiliut inissianik attartortitsinermut peqqussut malillugu annerpaamik 2.577.420 kr-iussasoq, isumaminillu inissiamik attartornermut akiliutip qaffattarnera inatsisinik unioqqutitsinerusoq, kommuni ullumikkut naliliivoq.

Inissiaatileqatigiiffik Sermersooq ApS-imi siulersuisut: Helge Tang (siulittaasoq), Henrik Leth, Preben Kold Larsen, Bolette Juhl.

Pisortaq: Preben Kold Larsen.

Kissarneqqortuunnguaq 8

Inu:it Bolig A/S Nuummi Kissarneqqortunnguaq 8-mi inissianik sanaartorpoq.

Akia: 88.188.708 koruunit.

Pisortanit inissianut taarsigassarsiat: 11.893.370 koruunit.

Inissiaatileqatigiiffik kommunilu ulloq 15. juli 2019-mi inissiat 58-t attartornissaannik isumaqatigiissuteqarput, ukiumullu 5.728.311 koruunit, ukiumut 1½ procentinik qaffattartussat ineqarnermut akiliutaasarnissaannik isumaqatigiissuteqarput.

Inissianik attartornermut akiliut inissianik attartortitsinermut peqqussut malinnittoq, ukiumulli isumaminik inissianik attartornermut akiliutip qaffaataa inatsisinik unioqqutitsisoq kommuni ullumikkut naliliivoq.

Inu:it Bolig A/S-mi siulersuisut: Klaus Karlshøj Poulsen, Tony Street, Martin Gjødvad.

Pisortaq: Martin Gjødvad.

Nuukullak 3 + 3E

Nuuk City Invest ApS Nuummi Nuukullak 3-mi 3E-milu inissanik sanaartorpoq.

Akii: 117.973.600 koruunit.

Pisortanit inissianut taarsigassarsiat: 28.495.800 koruunit.

Inissiaatileqatigiiffik kommunilu ulloq 1. december 2020-mi inissiat 73-t attartornissaannik isumaqatigiissuteqarput, ukiumullu 7.577.012 koruunit, ukiumut 1½ procentinik qaffattartussat ineqarnermut akiliutaanissaannik isumaqatigiissuteqarput.

Inissianik attartornermut akiliut inissianik attartortitsinermut peqqussut malillugu annerpaamik 5.399.403 koruuniussasoq, isumaminillu inissiamik attartornermut akiliutip qaffattarnera inatsisinik unioqqutitsinerusoq, kommuni ullumikkut naliliivoq.

Nuuk City Invest ApS Siulersuiut: Jackie Lyng

Pisortaq: Jackie Lyng

Manguaraq 35 + 37

Sarfaarsuit ApS Nuussuarmi Mannguaraq 35-mi 37-milu inissiarsuarnik marlunnik sanaatorpoq.

Akii: Inissiarsuaq 1-mut 66-nik inissiartalimmut 123.332.981 kr. kiisalu inissiarsuaq 2-mut 66-nik inissiartalimmut 112.434.185 kr. – katillugit 235.767.166 koruunit.

Pisortanit inissianut taarsigassarsiat: 67.510.740 koruunit.

Inissiaatileqatigiiffik kommunilu ulloq 31. august 2018-mi attartornissamut isumaqatigiissutinik assigiinnik marlunnik, ukiumut 8.316.000 koruunit attartornermut akiliuteqarfiusussamik, ukiumullu 2 procentinik qaffattartussaq isumaqatigiissuteqarput.

Inissianik attartornermut akiliut inissianik attartortitsinermut peqqussut malillugu annerpaamik 4.894.619 koruuniussasoq, isumaminillu inissiamik attartornermut akiliutip qaffattarnera inatsisinik unioqqutitsinerusoq, kommuni ullumikkut naliliivoq.

Sarfaarsuit ApS siulersuisut: Per Laugesen.

Pisortaq: Per Laugesen.

Seernaq 4 + 6 + Piloq 2

Inissiaatileqatigiiffiit marluk Sandy ApS aamma Shalmi ApS Qinngutsinni Seernaq 4-mi aamma 6-mi kiisalu Piloq 2-mi inissiarsuarnik pingasunik sanaatorput.

Akii: 85.153.603 koruunit.

Pisortanit inissianut taarsigassarsiat: 9.861.600 koruunit.

Inissiaatileqatigiiffiit kommunilu 2019-mi inissiarsuarni pingasuni inissianik 38-nik attartornissamut isumaqatigiissummik, ukiumut 4.992.000 koruunit attartornermut akiliuteqarfiusussamik, ukiumullu 3 procentinik qaffattartussaq isumaqatigiissuteqarput.

Inissianik attartornermut akiliut inissianik attartortitsinermut peqqussut malinnittoq, ukiumulli isumaminik inissianik attartornermut akiliutip qaffaataa inatsisinik unioqqutitsisoq kommuni ullumikkut naliliivoq.

Sandy ApS-mi siulersuisut pisortarlu: Preben Sandy Andersen, Jeanette Sandy Shalmi.

Shalmi ApS-mi siulersuisut: Nanna Kreutzmann Shalmi, Martin Sandy Shalmi, Jeanette Sandy Shalmi.

Shalmi ApS-imi pisortaq: Martin Sandy Shalmi.