Atuagassiaq Arnanut ukiut 21-t saqqummertareerluni saqqummeqqittussaajunnaarpoq

Atuagassiaq Arnanut arnanut saqqummertarsimasoq unitsinniarlugu tusagassiorfik Sermitsiaq aalajangerpoq.

Tusagassiorfimmi pisortaq Masaana Egede aalajangerneq pillugu ima nassuiaateqarpoq:

Eqqaamalluarpara anaanagigaluara Ivalo Egede maanna toqoreersimasoq iserluni Arnanut siulleq igaffimmi nerriviup qaanut iligamiuk qanoq nuannaartigisoq. Qulerutissaanngilaq atuagassiap pilersinnera inuuneranut sunniuteqartoq, sivisuumillu pisiassaasa akornanniittuarluni, taamaalilluni Arnanut immuit allallu ulluinnarsiutit assigalugit pisiarineqartarluni.

Arnanik illersuisuuvoq, suliffimminik pingaartitsisoq taamanilu arnat partiianik pilersitseqataasuulluni. Taamaattumik aamma isumaqarpunga atuagassiaq tarrarsorfigerusuttaraa, arnaniit arnanut allataasoq, silarsuarmi maannakkut suli angutinit aqunneqartumi. Allannguisuulluni nutaajuvoq pingaartuullunilu.

Arnanut nikerartunik aaqqissuisoqartarpoq, tamarmik immikkut namminneq aallaavitsik atorlugit piorsaaqataasunik. Assigiissutigaalli tamarmik ataatsimut isigalugu nunatsinni arnatut inuunerup allaaserinissaanut aallaavissamik pilersitsisimanerat. Sorpassuupput annertuut mikisualuillu, qulequttanik inuiaqatigiinni inituunik itisiliisarlutik maligassiuisut sapiillutik misilittakkaminnik ingerlatitseqqiisut ilisaritittarlugit, Arnatsialammik toqqaasarlutik, allalluni apeqqutigineqartut akitittarlugit, atisat nutaat peqqinnissarlu sammisarlugit.

Piffiilli allanngortarput

Nunarsuarmi tamarmi atuagassiat naqitat tunisaanerat annikilliartuinnarpoq, Arnanullu ukiorpassuarni tusagassiorfimmut amigartoorutaasarluni, sulili saqqummersitsisuni inissaqarluni pingaaruteqarlunilu ataavartunik atuartartoqarnermigut. Nunarsuatsinni digitalinngorsimasuni atuartartussarsiorneq sakkortuvoq, tamannalu tusagassiorfiup aqutsisuisa nassuerutigaat taamaattumillu ukiut 21 qaangiuttullu Arnanut matunissaa naggataatigut aalajangerneqarpoq. Oqarusunngilangali ”ajoraluartumik”, taamatummi allannguinerit aamma allarluinnarnik nassataqarsinnaasarput. Taamatut allannguinermut peqqutaasut qujanartumik aamma ersaripput.

Imarisai qanoq pissappat?

Tamannalu qujanartumik akiuminarpoq. Atisat nutaat, tarngutit, atisat imarisallu ”oqitsut” inuit attaveqaqatigiittarfiini soorlu Facebookimi, Instagramimi TikTokimilu tiguarneqarsimapput, taakkulu unammillersinnaanngilavut.

Imali iliorsinnaavugut arnat nipaasa tusaaneqarnissaa qulakkeerlugu, inissaqartillugit saqqummersitatsinni naqitani nittartakkamullu ilaatittuarlugit.

Naggataagut aaqqissuisuusimasut tamaasa, sulisut allallu atuagassiamik suleqataasimasut qutsavigerusuppakka. Aamma aalajaallutik ussassaarisartut imarisaanillu tapersersuisartut, kingullertullu minnerunngitsumilli aalajaallutik atuartartut tamaasa arnallu atuagassiami peqataasimasut, inuiaqatigiinni qulequttat sammisallu pingaarutillit saqqummiunnerannut qutsavigerusuppakka.