Atuarfiup nutaap,
maanna saviminernik ungalulersorneqarsimasup, tassanilu atuartut
ilinniartitsisullu marlunnut avillutik piffissaligaanngitsumi
atuarfitoqqaniitsitaanerat Atuarfik Inussummi siulersuisut siulittaasuata, Martin Colstrupip, nipangiutiinnarsinnaajunnaarlugulu akueriinnarsinnaajunnaarpaa.
- Piaartumik
aaqqiisoqarnissaa maanna neriuutigaarput. Suliaq sivitsussappat
akuerisinnaanngilarput. Ikuallattoqartillugu qimarngutsitsinissamut pilersaarut
oqartussat marluk isumaqatigiinngissutigippassuk sukataarlutik ajornartorsiut
aaqqittariaqarpaat, Atuarfik Inussummi siulersuisuni siulittaasoq, Martin
Colstrup, atuarfiup nutaap qaqugu atulernissaa pillugu paasissutissanik
nutaanik ujartuisoq, oqarpoq.
Atuarfiup nutaap,
maanna saviminernik ungalulersorneqarsimasup, tassanilu atuartut
ilinniartitsisullu marlunnut avillutik piffissaligaanngitsumi
atuarfitoqqaniitsitaanerat Atuarfik Inussummi siulersuisut siulittaasuata, Martin Colstrupip, nipangiutiinnarsinnaajunnaarlugulu akueriinnarsinnaajunnaarpaa.
- Piaartumik
aaqqiisoqarnissaa maanna neriuutigaarput. Suliaq sivitsussappat
akuerisinnaanngilarput. Ikuallattoqartillugu qimarngutsitsinissamut pilersaarut
oqartussat marluk isumaqatigiinngissutigippassuk sukataarlutik ajornartorsiut
aaqqittariaqarpaat, Atuarfik Inussummi siulersuisuni siulittaasoq, Martin
Colstrup, atuarfiup nutaap qaqugu atulernissaa pillugu paasissutissanik
nutaanik ujartuisoq, oqarpoq.
- Nalunarallarpoq,
nutaamillu ullulikkamik pilersaarusiortoqanngilaq. Ernumavugut, sunami taava
najoqqutarissagatsigu?
- Aqutsisut,
ilinniartitsisut sulisullu pitsaasumik atualertoqarnissaa
tamaviaarutiginikuugaat ilanngullugu eqqaaneqassaaq, ulluinnanngornissaali
qatsunnarsinissaalu ernummatigaarput, tamannalu akuerisinnaanngilarput. Oqartussat
akisussaasut atuarfik qaqugu atorneqalersinnaanersoq nalunaarutigissagaat
naatsorsuutigaarput, Martin Colstrup oqarpoq.
Piffissaligaanngitsumik
kinguaattoortoq
Kommuneqarfik Sermersooq kinguaattoorneq qanoq
sivisutigissanersoq ilisimanagu aggustimi nalunaarpoq. Taamatuttaarlu illorsuaq
atulersinnagu atuarfimmi 18.000 kvadratmeteriusumi
ikuallattoqaratarsinnaaneranut isumannaallisaatit tamarmik
misissorneqaqqaassammata taamatuttaarlu ikuallattoqaratarsinnaaneranut
isumannaallisaanermullu piumasaqaatit tamarmik eqquutsinneqaqqaassammata
atuartut sulisullu kiisalu eqaarsaartarfittaamik atuisussat illorsuup
naammassinissaa utaqqisariaqassavaat.
Suliap ingerlanera atuarfimmi siulersuisut
tupigusuutigalugulu nassuiaateqaqqusipput.
- Siullertut atuarfimmi siulersuisut
aaqqiissuteqartoqarnissaq soqutigaat. Atuartut aggustimi atuarfittaami
atuarlernissaat naatsorsuutigigaluaratsigu soorunami aalassallutalu
pakatsivugut. Suliap ingerlasimanera
aamma tupigusuutigisorujussuuarput. Sanaartortitsinerup ingerlarnga paasisinnaanngilarput,
susoqarnersorlu paaserusupparput, Martin Colstrup aperivoq, atuarfimmilu
siulersuisut ikuallattoqartillugu qimarngutsitsinissamut pilersaarut pillugit
akissuteqartoqarnissaa aaqqiissuteqartoqarnissaalu kissaatigineqartoq
aammattaaq nassuiaatigaa.
- Atuarfik
una suliniutigineqaleqqaarmalli ikuallattoqartillugu qimarngutsitsinissamut
pilersaarut aallaqqaataaniilli inissinneqarsimasussaagaluarpoq. Atuarfiup
ammalernerani aatsaat ajornartorsiutigineqalernera atuarfimmi siulersuisut
paasisinnaanngilaat. Tamanna pillugu akissutinik aaqqiissutissanillu
amigaateqarpugut, Martin Colstrup oqarpoq.
Atuartut
sulisullu ernumagigai
Atuarfik
Inussummi atuartut 970-it atualersussat maannamuugallartut Nuummi
atuarfitoqqani pisoqqani nungullarsimasunilu agguataarsimapput.
- Atuartut
sulisullu atuarfitoqqanut marlunnut utertinneqarnerat ernumanarpoq. Atuarfiup
aappaa, Atuarfik Samuel Kleinschmidt, pisoqalingaatsiarnikuuvoq, aammalu
silaannalunnera allarpassuillu pillugit 2021-mili naammagittaalliuterpassuarnik
tigusaqartarpugut. Atuartut ilinniartitsisullu piffissami taamak sivisutigisumi
taamak aqqusaagaqarteqqinnissaat akuerisinnaanngilarput, Martin Colstrup
oqarpoq.
- Atuarfimmi
atuartut sulisullu 970-it sanaartorneq naammassilersorlu tigusatut
pineqarnissaat akuerineqarsinnaanngilaq. Oqartussat ikuallattoqartillugu
qimarngutsitsinissamut pilersaarutip naammassinissaata tungaanut atuarfittaami
ikuallattoqalissagaluarpat nakkutilliisumik atorfinitsitsinissaq
aaqqiissutaasinnaavoq, Martin Colstrup oqarpoq.
Aaqqissuisoqarfimmi
piffissaliussap killinga nallertinnagu kommunimiit
oqaaseqartitsisoqarsinnaasimanngilaq.
