Atuarfik Kilaaseeraq nutartereeruni ima isikkoqassaaq

Allannguutit maluginiarnartut ilagaat nutaamik inissiamik sanaartortoqarnissaa, tassani atuartut nukarliit akullerillu atuarsinnaassapput. Sanaartugaq nutaaq quleriinnik initaqassaaq. Allermi atuartut nukarliit atuartassapput, atuartullu angajulliit qulaani atuartassallutik.

Quleriit ataanni anartarfinnik amerlanerusunik sanaartortoqassaaq, siornatigut anartarfiit ikinnerusut amerlanerulissallutik.

Atuarfik Kilaaseeqqami atuakkanik atorniartarfik mikinerulaalissaaq, anartarfiit inissaqartinniarlugit. Atuakkanik atorniartarfik millisitaq atuartitsivittut toqqorsivittulluunniit atorneqarsinnaalissalluni.

Init atuartitsiviusut iluarsaanneqarnerat

Quleriinni siullerni aamma anartarfinnik amerlanerusunik sanaartortoqassaaq, taamaaliorneranni init maanna atuartitsiviusut iluarsaanneqassallutik. Init atuartitsiviusut marluk allilerneqassapput, marlulli anartarfiit inissaqartinniarlugit millisinneqassallutik. Init minnerulersinneqartut eqimattakkaarluni atuarnermut atorneqartassapput.

Qullerpaami aamma anartarfinnik arlalinnik sanaartortoqassaaq. Tassani atuartitsiviusut init maanna sisamaasut pingasunngortinneqassapput, anartarfiit inissaqartinniarlugit.

Tamanut suliariumannittussarsiuussineq

Qeqqata Kommunia, Teknikkeqarnermut Avatangiisinullu immikkoortortaqarfik tamakkiisumik suliarinnittussatut neqerooruteqarsinnaanermik soqutiginnittunut periarfissiivoq.

Suliassap imarivaa, ingitserineq, nunalerineq, qammaaneq, betongilerineq, sanasut suliassaat, pequsiorneq, savimminilerineq, qalipaaneq, erngup aqqutaanik suliassat kiisalu innaallagisserineq.

Sulineq septembarimi ukioq manna aallartissangatinneqarpoq, suliamik naammassinnilluni tunniussiffissaq maajip naanerani 2027-imi pissalluni.