Atuarfik
Inussummut tunngatillugu ikuallattoortoqartillugu
isumannaallisaanermut pilersaarut tassungalu naliliinerit
allagaatinik takunnissinnaatitaaneq aqqutigalugu Sermitsiap paasivai.
Sanaartortitsisup Nuuk City Developmentip sanaartugassamillu
suliakkerneqartup Istakip sorpiaat isumaqatigiissutigisimaneraat
Atuarfik
Inussummut tunngatillugu ikuallattoortoqartillugu
isumannaallisaanermut pilersaarut tassungalu naliliinerit
allagaatinik takunnissinnaatitaaneq aqqutigalugu Sermitsiap paasivai.
Sanaartortitsisup Nuuk City Developmentip sanaartugassamillu
suliakkerneqartup Istakip sorpiaat isumaqatigiissutigisimaneraat
–
aaqqiissutissat suut malittarisassat malillugit
akuersissutigineqarsimanersut, suullu immikkut
uppernarsarneqartariaqarlutik allannguutaasimanersut pillugit
aallaqqaataaniillu erseqqissumik allassimanngitsut, COWI-p
maluginiagaani allassimavoq.
“Ikuallattoornermi
aaqqiissutit sorliit akuersissutaareersimanersut sorliillu suliniummi
siunnersortimit misissoqqinneqartariaqarnersut erseqqissumik
takussutissaqanngimmata, sanaartornermut malittarisassat tamarmik
naammassineqarnersut erseqqissumik oqaatigineqarsinnaanngilaq,”
COWI-p nalunaarusiaani maajimi 2025-meersumi, suliniummi
siunnersortip ikuallattoornissaq pillugu sillimaniarnermut
teknikkimut tunngasuni pilersaarut nutartigaq pillugu allassimavoq.
Tamatuma
kingunerisaanik atuarfik suli atulernissamut akuersissummik
tunineqanngilaq maannalu allanngortiterneqangaatsiartussanngorluni. Atuartut ilinniartitsisullu isertertinnagit atuarfik tamarmi
ikuallattoornermi tissaluttartunik ikkussuiffigineqaqqaassaaq.
Ikuallannermi assiaqutinut taarsiullugu imermik tissaluttartut
atorneqassasut Cowimit nalilersuinermi eqqaaneqartoq Kommuneqarfik
Sermersuumit saqqummiunneqarnikoq Sermitsiap siusinnerusukkut
allaaserinikuuaa:
“Ikuallattumut
assiaqutit - ingammik taama amerlatigisunik assiaqutsersuineq -
aaqqiissutissaanngilaq.”
Illorsuarni
angisuuni imermik tissarluttartoqarneq nalinginnaasuusoq COWI-mit
ilanngullugu tikkuarneqarpoq:
“Inini
angisuuni ikuallalissagaluarneranut imermik tissaluttartunik
nalinginnaasumik piareersimasoqartarpoq."
COWI:
Periusissiaq ataqatigiinngilaq
Atuarfik
Inussuk pillugu ikuallattoortoqassagaluarpat periusissiaq
erseqqarluttunik aaqqiissutissanillu akuerineqarsinnaanngitsunik
peqartoq, COWI maajimi 2025-mi naliliinermini allappoq.
COWI-p
ikuallattoornissamik isumannaallisaanermik siunnersuisartup
avataaneersup maluginiagassat arlallit eqqaavai:
Ikuallattunut assiaqutit ikuallattunik avissaartitsissutitut atorneqarput. Taakku sanaartornissaq sioqqullugu akuersissutigineqarnikuunngillat. Taamaattumik ikuallattoornissamik teknikikkut isumannaallisaanermik suliaqartunut kingorna takutinneqarsimasussaapput, qanorli iliortoqarsimanersoq allassimasoqanngilaq. Assiaqut ataasiinnarluunniit ajoquteqarpat illorsuup 7.000 m²-t tikillugit angitigisup sinneranut siaruaassinnaavoq.
Timersortarfiup ikuallattoornermi silaannarissarfii. Inunnit ikinneqaqqaartussatut suliaapput, naak sanaartornermut malittarisassani (BR06) nammineq aallartittartuunissaat peqqussutigineqaraluartoq. Allannguut oqartussat akuersiteqqaarnagit suliarineqarsimavoq.
Qimaaffissat aqqutaanni igalaat (EW 30). Ikuallattoqartillugu inunnik isumannaatsumik ingerlaffiusinnaanerannik uppernarsaatissaqaratik akuerineqarsinnaapput, naak uunartup sunniutaa ulorianarsinnaasoq.
Ikuallattoortoqaraluarpat immikkoortut angivallaartut. Illup immikkoortui 600-1000 kvadratmeterinit anginerusut, malittarisassani akuerineqareersimasut. Imermik tissaluttartoqannginnera sillimaniarneq eqqarsaatigalugu isumannaatsuunerisa uppernarsarnissaa ajornakusoorpoq.
Qimarngussuinissami pilersaarut nalorninartulik. Kalerrisaarinissaq immikkoortualukkuutaagaavoq. Aaqqiissut iluatsinngitsoorsinnaavoq, ingammik atuarfik ammaannartuuppat, sumiiffimmi ataatsimi takuneqariaannaasumi qimagussuineq aallartippat sumiiffinni allani nammineerluni qimarrattoqalerneranik kinguneqarsinnaavoq
Illup silataani ikuallajasut. Ikuallattoq qaminneqarsinnaanngippat silataanut siaruaaterujussuarnissaa ilimanaateqarnerusarpoq.
“Aaqqiissutissat
sanaartornermut malittarisassat tamarmiusut qanoq naammassisimaneraat
erseqqissumik ataqatigiissumillu uppernarsarneqanngillat,” COWI
naliliivoq.
Oqartussanit
unitsinneqartoq
Atuarfiup
illuutaani 1-miit 6-imut atulerneqarnissaannut akuersissummik
tunniussisinnaanatik sanaartornermut oqartussaasut septembarimi
2024-mi allapput.
Ikuallattoornissamut isumannaallisaanermut
periusissiaq sanaartornermut malittarisassat BR06 tunngavigalugu
akuersissutigineqareernikoq tunngavigineqarluni. Allannguutit
nalunaarsorneqarlutillu pitsaanerusumik aaqqinneqarsimasut tassani
aamma eqqaaneqarpoq.
“Aaqqiissutissat
taakku taamatut suliarineqarsimanerat pitsaaneruneralluunniit
uppernarsarneqartalissapput. Sanaartornermut oqartussaasut
arlaleriarlutik tamanna uppernarsaqqusimavaat – aamma
sanaartornerup nalaani, ikuallattoornermulli tunngatillugu arlalinnik
suli suliassaqartoqarpoq,” sanaartornermut oqartussaasut atuarfiup
illuutaanut 1-6-imut atulernissamut akuersissummik qinnuteqaat
itigartitsissutigineqarnerani allapput.
Assersuutigalugu
timersortarfik, tassani ikuallattoqassagaluarpat silaannarissarfiit
namminneq aallartittartuusussat inunnit nammineq aatsaat
aallartinneqaqqaartussanngorlugit allanngortinneqarsimapput.
Allannguut akuersissutigineqarnikuunngilaq, unioqqutitsinertullu
oqartussanit nalilerneqarluni.
Siunnersuisartut
aalajangiusimasut
Sanaartugassamik
suliakkerneqartup siunnersortaata Verkísip ikuallattoornermi
isumannaallisaanermut periusissiamik nutaamik
pisariaqartitsisoqanngitsoq 2024-mi aggustimi nalilerpaa.
Siunnersortip allakkiaa naapertorlugu illu sanaartornermut
malittarisassat BR06 2006-imi atuutilersinneqartut malillugit
sanaartorneqarsimavoq, sanaartornermullu malittarisassat BR18
2018-imeersut malillugit sananeqarsimalluni.
Isumannaallisaanerlu
naammaginartoq misissueqqissaarnerit takutikkaat taakku nalilerpaat.
Kalerrisaarutit
immikkoortukkaartut aaqqiissutissatut pisarialittut aamma
ikuallattumut assiaqutsit periusissiami ilaasinnaanerat Verkísimit
aalajangiusimaneqarput.
"Isumannaallisaanermut
piumasaqaatit naammassineqarnerat uppernarsarsinnaavarput,“
siunnersuisartut Verkísimit inerniliipput.
Sanaartornermut
oqartussaasut isumaqataanngillat, ukiullu ataatsip qaangiunnerani
COWI-p naliliinera naapertorlugu periuseq piumasaqaatinut suli
naapertuutinngitsutut nalilerneqarpoq.
Ikuallattumut
assiaqutit ikuallattumilu tissaluttartut
Sanaartukkami
taama angitigisumi ikuallattumut assiaqutit aaqqiissutissatut
pingaarnertut atorneqarsinnaanngitsut arlaleriarluni
misissuisoqareersorlu paasinarsivoq. Taamaattumillu atuarfik
tamakkerlugu imermik tissaluttartulersorneqassasoq Kommuneqarfik
Sermersuumit aalajangerneqarpoq.
”Ikuallattumi
tissaluttartunik ikkussuinissaq aallartingajalerpoq, pisariussaarlu
aamma teknikkimut tunngasut suliassaangaatsiarmata sivisussalluni.
Tamannalu tunngavigalugu atuarnissap aggusti 2025-p
aallartinnissaanut atuarfik ammarsinnaassanngitsoq maanna
ajoraluartumik paasinarsivoq,”
kommuni angajoqqaanut sulisunullu nalunaarummi allappoq.
Ikkussuineq
aallartereerpat piffissaq qanoq annertutigisoq atorneqassanersoq
kommunimit paasineqassaaq. Maannamulli nalunaarutit aallaavigalugit
atuarfik 2025-p ingerlanerani atulissaaq - ulluliisoqarnikuunanili.
Sanaartortinneqartoq
nipaarluusoq
Istakip
pisortaarnerata Karl Andreassenip suliaq pillugu Sermitsiamut
oqaaseqarusunngilaq. Istak Danmarkimi sanaartugassanik
suliakkerneqartartut annersaannit, Aarsleffimit, aamma Kalaallit
Nunaanni Permagreenimik pingaarnertut pigineqarpoq.
Atuarfik
marsimi 2024-mi naammassineqartussatut pilersaarutigineqaraluarpoq,
ukioq taannalu ammarneqartussatut pilersaarutigineqaraluarluni.
Kinguaattoornerilli arlallit peqqutaallutik ammarnissaralua
minnerpaamik ukiup aappaa avillugu kinguaattoorfiuvoq.
Kommuni
sanaartugassanik suliakkerneqartartumut Ístak-imut
isumaqatiginninniartoq kingullermik nalunaarutigineqarpoq.
