Atuartunik siunnersuisarnerup atuanngitsoortarnerit annikillisillugillu atugarissaarnerit annertusivai

Kalaallit Nunaanni ilinniarnertuunngorniarfiit annersaanni GUX-imi Nuummiittumi 2019-imiilli ilinniartunik siunnersortinik atorfinitsitsisoqarpoq taakkulu kollegiani isumaginninnermik suliaqartut ilinniarnertuunngorniarfinnilu ilinniaqqiffissanut ilitsersuisartut suleqatigalugit ilinniartut inuttut, inuiaqatigiinni ilinniarnerminnillu atugarissaarnerat ukkatarineqarpoq. Tamatuma kingorna aaqqissuussaq tamanna naleqqussarlugulu pitsanngorsarneqarsimavoq ullumilu ingerlalluarluni.

- Atuartugut tamarmik ukiumut minnerpaamik tallimariarlutik arfinileriarlutilluunniit qanoq ingerlanerat pillugu oqaloqatigineqartarput, tamatumalu saniatigut atuagarsornerat atuanngitsoortarnerallu malinnaavigineqartarlutik, rektori Hanne Larsen oqaluttuarpoq.

Uniinnartartut atuanngitsoornerillu annertuut

Ilinniartut siunnersorneqartarnerat GUX Nuummi rektoriusimasup Mikael Enggaardip pilersippaa, maannalu rektoriusup Hanne Larsenip aaqqissuussaq iluaraa.

 – Atuarfimmi unitsitsiinnartartut amerlavallaarnerat, atuanngitsoortarnerit annertuut atuarfimmilu atuartut nuanniilliortarnerat taamanikkut ajornartorsiutigaavut, taamaattumik ilinniartunik siunnersortitut suliniut aallartipparput. Maannalu isikkunippoq nuannaarutigisatsinnik. Suliassaq annertooq pingaarutilillu siunnersortit suliaraat, Hanne Larsen oqarpoq.

 Iluaqutaanera malunnartoq

Ilinniartunik siunnersortitut ulloq naallugu sulisartut maanna pingasuupput, ilinniartullu tamarmik immikkut siunnersorteqarput. Tassa ilinniartut 150-it missaanniittut siunnersortip ataatsip akisussaaffigai.

 – Pingaaruteqarluinnarpoq inuusuttunut erseqqissumik takutissagipput suut naleqartitarinerlugit, eqqortumillu siulersorusukkigut. Suna ajunngitsuua sunalu ajortuua? Inuusuttutta ilaasa tamanna amigaatigaat, Hanne Larsen oqarpoq, taassuma atuartut atuanngitsuukulasut qaammatit marlukkaarlugit oqaloqatigisarpai, tamatumalu kingorna siunnersorti suleqatigalugu iliuusissatut pilersaarusiortoqartarluni.

 Rektori naapertorlugu suliniut tamanna sunniuteqareerpoq.

– Iluaqutaavoq. Atuanngitsoortarnerit ikilipput. Tamannali aamma annertuumik nukissanik atuiffiuvoq. Atuartut ilaat 30-40 procentit missaanni atuanngitsoortartut siusinnerusukkut nalaattarlugit, maannalu 15 procentit missaanut apparsimasoq, piviusorsiornerullunilu maanna pitsaaneruvoq. Tassa atuanngitsoortarnermut killigititarput. Aamma napparsimanissamut allanullu inissaqartitsisoqartariaqarpoq.

 Ajornartorsiutit nalinginnaasut

Eskil Dahl perorsaasutut ilinniarsimasuuvoq tarnikkut katsorsaasartutut ilinniarluni.

 – Oqaloqatigiinnerit minutsit 20-t missaanniikkajuttarput assigiinngitsorpassuarnillu eqqartuisoqarsinnaalluni. Oqaloqatigiinnerit ilarpassui uippakajaarnermut inuunermiluunniit oqimaaqatigiissaarinnginnermut tunngassuteqartarput. Amerlasuut atuarnerup saniatigut suliffeqarput, tamannalu naleqqussarfigisariaqarlugu. Aamma inissaqarniarneq unammillernarsinnaasarpoq. Immaqa angajoqqaani annertunngitsumik ineqartuni suli najugaqarput, imaluunniit kisimiillutik najugaqarput tamannalu ajornakusoortutut isigalugu. Oqaloqatigiissutigineqarnerusartut ilaat tassaavoq aappariinnermi ajornartorsiutit aamma timilu pillugu killissat. Aamma amerlasuut sinik peqqissuserlu pillugit oqaloqatigiinnissamik pisariaqartitsisarput, assersuutigalugu qanoq ililluni eqqortumik sinissinnaaneq aamma peqqissutsimut qanoq iliortoqarsinnaanersoq. Ilaat timigissarpallaarneq ajorput, allat timigissarpallaartartut. Aamma inuusuttuunermi nalorninartorsiornerit ajornartorsiutaasarput nalinginnaasut. Aamma oqaloqatigiinnernik pisariaqavissunik eqqartuisoqartarpoq, soorlu qanigisanit qimagaanermik aliasunnerit imaluunniit ilaqutariit imigassamik ikiaroornartumilluunniit ajornartorsiutillit, Eskil Dahl oqaluttuarpoq.

 Inuusuttunut ikorfartuineq

Ilinniartunik siunnersuisarneq taanna aqqutigalugu inuusuttut ilinniarnertuunngorniarfimmi ilinniagaqarlutillu ilinniagaqarnissamut periarfissaqarnerulernissaat GUX Nuummi neriuutigineqarpoq.

 – Inuusuttunut ikorfartuutissatut isumassarsiarineqarpoq. Ajortoqavitsinnagu pinaveersaartitsissutissatut. Aamma kikkut tamarmik oqaloqatigineqartarnerannik puiugaasoqassanngilaq. Inuusuttut suut nammatarineraat takujuminaassinnaasarmat.

 - Ilinniartitsineq ineriartortitsinerlu, timip pinngortitallu ataqatigiinnerannik maluginnittuuneq, eqqarsaatinik misigissutsinillu erloqinartunik aniatitsisinnaanerit qasusuissusermillu ineriartortitsisinnaanerit pineqarput, Eskil Dahl oqarpoq.

 Atuariartortarneq aalaakkaasoq

Inuusuttut atuariartortuartarnissaannut ilinniartitsineq aamma taakkununnga iluaqutaassaaq. Misissuinerup takutippaat atuariartortuartarnermi atukkat nuannernerulersartut.

 – Atuanngikulaanngikkaanni ajunngitsumik inissisimasoqarnerusarpoq. Ilinniartitsinermi malinnaasoqartarpoq, inuusuttoqatinullu akuusoqartarluni. Innuttaasutut piffissaq eqqorlugu aamma takkussinnaaneq, isumaqatigiissutinik eqqortitsisinnaaneq il.il. aamma pingaaruteqarput, taamaalillunilu aamma ineriartortoqartarluni.

 Inuusuttut ammanerat tupaallaatigigaa

Eufinia Kreutzmannimut, perorsaasutut ilinniarsimasumut Nuummilu GUX-imi siunnersuisartunngorlaamut, inuusuttut oqaloqatigiinnermi qanoq ammatiginerat toqqissisimatiginerallu tupaallannarpoq.

 – Ukiut qulit matuma siornatigut GUX-imi ilinniartuuvunga, taamani taama ittumik periarfissaqanngilaq. Siunnersorneqarnissaq pisariaqartissimasinnaavara. Suliniut ajunngilluinnartoq isumaqarpunga, inuusuttunik oqaloqatiginnittarnermi taakku inuttut atukkatik pillugit tatigisaminnik annissuiffeqarsinnaapput, ikiorneqarnissartik ammaffigalugu siunnersorneqarlutillu.

 Eskil Dahl ilaliivoq:

 - Inuusuttuuneq imaannaanngitsuullunilu ajornakusoorfiusinnaavoq, taamaattumik aqqutissiuisinnaasumik ikiortissaqarneq ilinniartitaanermilu ilitsersuunneqarsinnaaneq iluarpoq.

 Inuusuttut ilarpassui ilinniarfinni pikkorissuugaluarlutik ilaannikkut namminneq inuunerminni atugaat pissutaallutik atuarnerup paarinissaa ajornakusoorsinnaasartoq rektori oqarpoq.

- Immaqa angerlarsimaffimmi misigissutsinik eqqartuineq ajorput, taamaattumik atuarfimmi takuneqarsinnaaneq tusaaneqarsinnaanerlu pitsaavoq.