Atuartut siunnersuisoqatigiivini ilaasortat kunngikkut atuarfimmut nutaarluinnarmut tikilluaqquaat
Kunngikkut Nuummiinnerminni atuarfik nutaaq 1.200-nik atuartoqartussaq pulaarpaat. Init atuartitsiviusut aggustip qiteqqunnerani atuartunut ammarneqassapput, kunngikkormiullu sisamanngormat takornariartinneqarput.
- Alutornangaarami, kunngi Frederik Nuummi atuarfimmut nutaamut, Inussumut, sisamanngormat takornariartinneqarnermini oqarpoq.
Atuarfiup pisortaata ilinniartitsisullu siunertartik takorluukkatillu kunngikkunnut oqaluttuaraat. Tassa atuartut atuarfimmut nutaamut anginerusumut pitsaanerusunillu atortorissaaruteqartumut aallartinnissaannut.
- Pingaaruteqarnerpaaq tassaavoq atuarfiup nutaap takutinnissaa. Tassa Kommuneqarfik Sermersuup Kalaallit Nunaatalu ataatsimut isigalugit suut pingaarnersiorsimaneraat takutissallugu. Takorluukkat atuarfimmut matumunnga tunuliaqutaasut aamma tusartinnissaat, atuarfissami nutaami Inussumi pisortaq Uffe Lilholm pulaartoqarnerani Sermitsiamut oqarpoq.
Ilinniutissat nutaat saqqummiunneqarput
Atuartullu siunnersuisoqatigiivinut ilaasortanngortussat marluk, Ivalo Blytmann aamma Danny M. Olesen, kunngi Frederik, dronning Mary taakkualu meerartaat atuarfimmut tikilluaqquaat.
Kunngikkut pulaarnerminni takornariartinneqarput atuarfimmilu ilinniartitseriaatsit pillugit paasitinneqarlutik. Kunngikkut 4. klassimi atuartunut atuartitsissutinik nutaanik aamma saqqummiivigineqarput.
- Perorsaanermut tunngasunik eqqarsaatit takorluukkallu oqaluttuarissavavut. Kunngikkut pisortatigoortumik pulaarnissaat pissanngatiginikooqaarput. Atuarfissallu naammassivinnissaa aamma qilanaaralugu, atuarfimmi pisortaq Uffe Lilholm oqarpoq.
Atuarfimmi nutaami sulisussat aggustip tallimaani suliartussapput. Atuarfissarlu pisortatigoortumik
augustip 13-iani atoqqaarfissiorneqassaaq, 1. klassillu aggustip 15-ianni atualeqqaartinneqassallutik.
