Avannaani illuatungiliuttut: Borgmesterip inissisimanini atornerluppaa
Avannaata Kommuniani kommunalbestyrelsimi illuatungiliuttunit borgmester Lars Erik Gabrielsen (S) inissisimanerminik atornerluinerarlugu isornartorsiorneqarpoq. - Politikkikkut pissuserissaarnissamik malussarniuteqarnani sumut tamaanga isornartorsiuisaqattaarpoq takornarialerinermi nammineq soqutigisani siuarsarniarlugit, Avannaata Kommuniani illuatungiliuttut Demokraatit, IA aamma Atassut oqarput.
Assi: Avannaata Kommunia
Avannaata Kommunia borgmesterertaarnikuuvoq nipikisaanngilluinnartumik, tassalu Lars Erik Gabrielsen (S).
Avannaata kommuniani partiit illuatungiliuttut naapertorlugit taanna kommunalbestyrelsimut qinersinissaq sioqqullugu, qineqqusaarnermi, qineqqusaareernerup kingorna, aammalu minnerunngitsumik borgmesteritut toqqarneqareernermi kingorna, suliffeqarfinnik aqqisigut taaguilluni ataavartumik isornartorsiuivoq, Ilulissani takornariaqarnermik ingerlatsisunik avissaartuutitsisutut pisuutillugit.
- Assorsuaq isumakulunnarpoq Kommuni innuttaasuminut suliassarpassuaqareertoq, borgmestereqarmat nammineq soqutigisaminik aallussisumik. Tamanna kinguarsaanertaqanngitsumik unitsinneqartariaqarpoq, illuatungiliuttut, Demokraatit, Inuit Ataqatigiit aamma Atassut sinnerlugit oqaaseqartartoq Heidi Møller oqarpoq, taakkulu katillugit arfineq marlunnik ilaasortaatitaqarput, Siumut aamma Naleraq suleqatigiillutik qulinik ilaasortaatitaqartut.
Soqutigisarsorneq
Illuatungiliuttut innersuussutigaat borgmesteri Lars Erik Gabrielsen suliffeqarfimmik takornariaqarnermik ingerlatsisumik piginnittuusoq, CVR naapertorlugu siulersuisuni siulittaasuusoq. Suliffeqarfik Ilulissani innuttaasunit pigineqarpoq, taakkulu aamma takornariaqarnermik inuussutissarsiuteqartuullutik, tassa borgmesteri ilanngullugu.
- Nalornissutigineqassanngilaq nunatsinni takornariaqarneq inuiaqatigiinnik ineriartortitsinissamut, aningaasaqarnikkut suliffissanik pilersitsisussatut, aammalu innuttaasunik ingerlatinneqartussatut inerisarneqassasoq, aammalu nunatsinni inuussutissarsiortut suliassaq kivissagaat illuatungiliuttutut aamma uagut soqutigisarigipput.
- Tassanngaaniilli borgmesterip nammineq soqutigisaminik siuarsaanissamut atorfeqarminik atornerluinera ulorianartorujussuarmik ineriartornertut isigaarput. Borgmesterimut matumani oqariartuutigaarput, namminerisamik soqutigisanik aallussinnginnissaa pisariaqarpoq. Imminut piinnarani, aammali kommuni innuttaasullu pillugit, Heidi Møller (D) oqarpoq.
Tamatta ajorsassaagut ajugaasoqaranilu
Kisianni oqaaseqaatit kisimik pineqanngillat, takornariaqarnermut akerleriissuteqartut akornanni. Aammattaaq pisuutitsinerit amerlaqaat, tassanilu inuit attaveqaqatigiittarfii atorneqartuarput. Demokraatit aamma facebookimi borgmesterimit isornartorsiorneqarsimapput, borgmesterip kommunip atortuinik namminerisamik suliffeqarfimminut atuisimaneraaneragaanermut.
- Soorunamili maluginiarparput, inissisimaffeqaratta nalunarluni borgmesterip kommuni sinnerlugu iliuuseqarlunilu oqaaseqarnersoq imaluunniit namminerisamik soqutigisaminik aallussinnersoq nalornissutigineqarsinnaammat. Takusarparput takornarianut angalaarussisoq, suliffeqarfimminik sullissisoq, aamma takusarparput nipituuliorluni akerliusoq, aammalu akerliussutsimik takutitsinissamut kajumissaarisartoq, kommunalbestyrelsimut ilaasortaq Heidi Møller illuatungiliuttut sinnerlugit oqarpoq, nangillunilu:
- Paasisinnaanngilarput sooq nipiliorneq tamannarsuaq pisariaqarnersoq, tamattami partiit apeqqutaatinnagit isumaqatigiippugut takornariaqarneq kalaallit inuiaqatigiinnut iluaqutaasariaqartoq. Borgmesterili tamatigut nipituuliorluni qisuariartarnera ingerlaannassappat, takornariat qimagussulersinnaanerat ernumassutigaarput, Heidi Møller (D) naggasiivoq.
