Naaja H. Nathanielsen: Tunngaviusumik tamatta isumaqatigiippugut

Ilulissani takornariartitsisartut sakkortuumik pakatseqqallutillu kissaammersimaarput isumaqaramik Naalakkersuisunit sumiginnarneqarlutik. 

Illuatungaani Naalakkersuisunit kajumissaarutigineqarpoq oqallinnermi torersumik ingerlatsisoqassasoq, isumaqatigiinngissuteqartoqaraluarpalluunniit, isumaqatigiinnginnerummi nassataanik akerliuneq nipitooq kikkunnillu tamanit takuneqarsinnaasoq ingerlaanassappat Naaja H. Nathanielsen naapertorlugu takornariat ornigukkumajunnaarnerannik kinguneqarsinnaammat. 

- Tunngaviusumimmi isumaqatigiippugut, aamma qularutigineqassanngilaq Naalakkersuisut paasilluarsinnaagaat sooq ilungersortoqarnersoq, pingaartumik Ilulissani, taamaattumik suliaq sukumiisumik ingerlapparput ajornartorsiut aaqqiissutissarsiorlugu, tamannalu pimoorupparput. 

- Kisianni periuseq uparuarpara, oqariartuutituara tassaavoq angusaqarsinnaanngitsugut, nillialluni qunusaarisutullu pissusilersorlunilu periuseqartoqassappat, tamanna akuersaarneqarsinnaanngimmat, tamannalu Naalakkersuisutut akisussaasutut qisuariarfigisariaqarakku, Naaja H. Nathanielsen Sermitsiamut erseqqissaavoq.

Septembarimi Ilulissanut tikeraassaaq 

Naaja H. Nathanielsen innersuussivoq isumaqatigiinngissutigineqartut pillugit aaqqiissutissamik suliaqartoqartoq:

- Maajimi Ilulissaniippunga, taamani saqitsanneq sakkortusereersimavoq, taamani inuussutissarsiortut pisinnaasut tamaasa kommunalbestyrelsilu sinnerlugu borgmesterip peqataaffigisaanik ataatsimeeqateqarpunga. Tassani iliuusissatut pisariaqartitat katersorpagut, isumaqatigiissutigalugulu septemberimi Ilulissanut uteqqikkumaartunga. Taamaammat oqarsinnaavunga suliaq ingerlanneqarpoq, oqariartuutigineqartullu tamaasa pimoorullugit tigunikuuagut, siunertaralugulu suliap killiffia pillugu septemberimi killiffissioqatigiinnissaq.

Naaja H. Nathanielsen aamma innersuussivoq ukiuni qulini tulliuttuni atuuttussamik  takornarialerinermik suliassaqarfik pillugu pilersaarusiortoqarsimasoq, taannalu ilaatigut pinngorsimasut ataatsimiinnerit 18-inik ikinnerunngitsut ingerlanneqareernerisigut, taamannalu siornatigut Naalakkersuisuusimasoq, Vivian Motzfeldt, suliap aallartinnissaanik isumaginnissimaneranut nangitsinerulluni.

- Inatsisiliornikuuvugut, januaarimi 2027-mi atuutilersussamik, suliassaqarfik pillugu pilersaarut inuussutissarsiutinik nunami tamarmi tunngaveqartoq suliarinikuuarput, taamaammat oqarsinnaavugut nunatsinnik aallaavilimmik uagutsinnut naleqquttumik takornarialerinerup ingerlanneqarnerani periarfissanik qulakkeerinninnissaq aallartinneqarsimasoq.

Innuttaasut tamarmik sumiiffinni tamani suliffeqarfimminnik ingerlatsisinnaatitaapput

Ilulissani takornariaqarnermut inuussutissarsiuteqartunit isornartorsiutigineqartut ilagaat, nunatsinni sumiiffinnit allaniit tikittunik suliffeqarfiit ataasiakkaat atornerluisut, taakkulu aamma oqaatigineqarpoq suliffeqarfiit taakku annertusiartortut, ilaatigut inuussutissarsiuteqartunik akissarsiaqqortunerusunik atuisarlutik.

- Suliffeqarfinnut takornarianik angalanissaannut pilersaarusioqataasartunut tunngatillugu (agent-inut, aaqq.) tunngatillugu oqallittoqarneranut malinnaavugut. Manna tikillugu avammut oqaatigigallarnikuuara inatsisit malittarisassallu atuuttut nalilersoqqissagigut. Taamaattorli assut ajuusaassaanga politikerit aalajangersaasalissappata inuussutissarsiornermik ingerlatsisunut killilersuillutik. Inuussutissarsiutip ingerlanneqarneranut sinaakkusiussaagut uagut politikerit, taamaattorli aamma isumaqatigiissusiornerit aammalu neqeroorutit qanoq ittuunissaanik ilusilersuisussaanngilagut. Tamanna aatsaat pisinnaavoq inatsisit unioqqutillugit ingerlatsisoqartoq ilisimasimalersimagutsigu. Taamaattorli soorlu maajimi neriorsuereersunga, iliuuseqartoqassanersoq maanna nalilersorneqarpoq, Naaja H. Nathanielsen oqarpoq.

Taassuma aalajangiusimavaa, takornarialerinermik suliaqartut nunatsinneersut nunatsinni sumiluunniit inuussutissarsiumminnik ingerlatsisinnaatitaasut, aamma namminneq kommunerinngisaraluaminni.

- Tassa imaappoq, nunaqavissuupput kikkulluunniit nunatsinni angerlarsimaffeqarunik aammalu nunatsinni inuussutissarsiornermik ingerlataqarunik. Ullumikkut suliffeqarfippassuaqarpoq nammineq kommunerisap avataani ingerlanneqartunik, tamannalu isumaga naapertorlugu pissusissamisuuginnarpoq. Eqqaamassavarpummi aningaasat kaaviiartitat nunatsinni nammineq pilersitat inuiaqatigiinnut tamanut iluaqutisseeqataasarmata.

Utaqqisinnaassuseqarnissamik suleqatigiinnissamillu kaammattuivoq

Takornariaqarnermut inatsit nutaaq atuutilissaaq januaarimi 2027-mi, tamanna sioqqullugu Ilulissani mittarfissaq nunani tamalaani timmisartuutileqatigiiffiit miffigisinnaasaat atulersinneqassaaq 2026-mi.

Naaja H. Nathanielsen kaammattuivoq nunarput tamakkerlugu takornariaqarnermik ineriartortitsinermut ataatsimoortoqartariaqartoq, aamma kaammattuivoq sioorasaarinertut ittumik nipituuliorlunilu naammagittaalliornerit atorlugit pissusilersortoqannginnissaa, taakkumi takornarianik anusinngortitsisinnaammata aammalu saqitsaattoqarneranik annertusaasinnaallutik:

- Naalakkersuisunut assut pingaaruteqarpoq takornarialerinermik inuussutissarsiornermi inuiaqatigiit kalaallit annerpaamik pissarsinissaat qulakkeersimaneqassasoq, aningaasat nunatsinniiginnassasut aammalu takornarialerisut nunatsinnit aggerfeqassasut, tamannalu pillugu tunngaviusumik isumaqatigiippugut, neriuutigaaralu sukkasuumik ataatsimoorfeqarnerput qitiutillugu allorissaaqatigiilissasugut takornarialerinerlu ineriartortillugu, inuussutissarsiornermut Naalakkersuisoq, Naaja H. Nathanielsen (IA) naggasiivoq.