Gabrielsen: – Uniinnarnavianngilagut ajortoqavinnerata nassuerutigineqarnissaata tungaanut

Borgmester Lars Erik Gabrielsen (S) pilersaaruteqanngilaq takornariaqarnermut politikkikkut ingerlatsineq pillugu pakatsisimaarnini annikillisissallugu. Akerlianilli maanna akissuteqarluni inuussutissarsiornermut Naalakkersuisoq, Naaja H. Nathanielsenimut sakkortuumik isornartorsiuivoq, isummani naapertorlugu taanna illersugaqarluni naalakkersuinikkut ingerlatsimmat.

Illersugaqarneraanerit sumik tunngaveqarpa?

 - Taassuma Kalaallit Nunaanni sulisitsisut peqatigiiffiata (GE-p, aaqq.) soqutigisat tapersersorpai, soqutiginngilaa aamma piumassuseqanngilaq avataaniit tikillutik nunatsinni takornariaqarnermik suliaqartut iluanaarniapilunnerminni qanoq ingerlatseqatigiiffimminnik katiterisarnersut, taakkulu siunertatuarigaat nunatsinnit aningaasanik annissuinissaq, nunaqavissunik illersuinerartuusaarpoq, avataaneersut aningaasanik qaloorisut aningaasallu nunatsinnit aniatillugit. Nunatsinni takornarialerisut oqaatsinik kimeqanngitsunik illersuisuusaarnermillu aningaasarsiornavianngillat, taamaattumik tatiginninneq piuleqqissappat  annertuumik timitalimmillu takutitsisariaqarpoq, Lars Erik Gabrielsen akivoq.

AAMMA ATUARUK

Naaja H. Nathanielsen akerleriinnermut akuliuppoq: Sioorasaarineq pissusilunnerlu aaqqiissutaasinnaanngillat

- Borgmesteriuguma borgmesteriunngikkumaluunniit apeqqutaatinnagu, tamakkiisumik tamaviaarlungalu sulissutigiuassavara nunami maani najugallit inuussutissarsiornermik ingerlatsisinnaanissaminnut periarfissinneqarnissaat, taamaalillutillu inuiaqatigiinnut aningaasanik  pilersissinnaanissaat. 

Gabrielsen aamma innersuussivoq nunaqavissut inuussutissarsiornermut pineqartumut aningaasaliinikuusut, upperalugulu tamanna akilersinnaasoq.

- Kisiannilu inuussutissarsiornermik ingerlatsisinnaanatik isiginnaartinneqarput allamiut takornariaqarnikkut aningaasanik qaloorisut, aningaasallu nunatsinnit aniatillugit.

Nunaqavissut ingerlatsiviisa umiatsiaat uninngaannarput allat isaatitsisut

- Nunaqavissut ingerlatsiviisa umiatsiaat uninngaannarput, taamaalillutillu  pisussaaffitik isumagisinnaanngilaat, ilaquttaminnillu pilersuisinnaanerat innarlerneqarluni, taamaattoqarnerani ingerlatseqatigiiffiit avataaneersut angisuut, pingaartumik danskit takornariartitsisartut aningaasarsiorput inuussutissarsiummi Kalaallit ingerlatassaraluani.

Tassunga tunngatillugu Gabrielsenip ingerlatseqatigiiffissuit arlallit taakkartorpai, isummani naapertorlugu nunaqavissutut nunatsinnullu attuumassuteqartutut imminnut taasinnaaniassagamik akiliinermikkut nunaqavissuusaartut (stråmandsvirksomhed, aaqq.).

- Assut pakatsinarpoq suliffeqarfiit nunatta avataaneersut, uffa akileraarutinik sinneqartoorutiminnilluunniit nunatsinnut tutsitsineq ajortut Naalakkersuisunit tapersersorneqartut nunaqavissullu ajortuliortutut nalilerneqarlutik, Lars Erik Gabrielsen oqarpoq.

Taamaattoq nunami maani inissisimasuugamik nunaqavissuunnginnamik?

- Qallikkut nunaqavissutut imminnut saqqummiuttarput, taamaaliorsinnaapput Kalaallit Nunaanni ingerlatsiviit ikittuinnaat suleqatigalugit, taakkua akilerlugit attuumassuteqartutut inissisimatinneqarput. Kisianni piviusoq tassaavoq takornariaqarnerpaaffimmi najuutilaariarlutik, aningaasarsiupiluuneriarlutik nunarput qimaqqiinnartaraat iluanaarutitik nassarlugit, taava kikkut kiserngoruttarpat? Ilumoortumik nunaqavissut, takornariaqarnerpaaffimmiluunniit iluamik aningaasarsiorsinnaasimanngitsut.

Tusagassiuutitigut nalunaarummi marlunngornermi nassiunneqartumi Naalakkersuisoq Naaja H. Nathanielsen erseqqissaateqarnikuuvoq nammineq ilisimasaqarani ingerlatseqatigiiffinnik avataani inissisimasunik akileraarutitigut nunatsinni unneqqaserluttuliortoqartarsimaneranik.

- Kisianni aamma kommunip naatsorsuutaanut qimerluuilaaginnarnermi, takuneqarsinnaavoq qanoq annikitsigisumik kommunimut ingerlatseqatigiiffiit akileraarutinik akiliuteqartarsimanersut, taamaallaat 7 millionit koruunit ukioq kingulleq kommuni pissarsilaarsimavoq, Lars Erik Gabrielsen oqarpoq. Aningaasat sumunuku pisartut, taanna aperivoq.