KL

DK

Avataarsualiartaat qaammatip tunuanit issunik misissugassanik siullerpaanik nassarluni Kinamut nunnippoq

Kinamiut qaammammuliartaataat qaammammi ullorissap anaanit itersaliamit issunit qaarsunillu misissugassanik nassarluni nunarsuarmut uterpoq.

Chang'e-6 ses her på Månens overflade.
Ritzaus Bureau
Saqqummersinneqarpoq

Kinamiut avataarsualiartaataat Chang’e-6 qaammatip tunuanit issunit qaarsunillu misissugassanik nassarluni marlunngormat Kinap avannaanut nunnippoq.

Taamaasilluni Kina nunani siullersaalluni qaammatip illuatungaanit issunit qaarsunillu misissugassanik nunarsuarmut tikiussisuuvoq, nutaarsiassaqartitsivik Reuters allappoq.

Sydpol-Aitken Bassinimi, qaammammi ullorissap anaanit itersalianit annerpaami pisoqaanerpaamilu, misissuinerit ingerlanneqarput.

Ullorissap anaata itersaliaa 2500 kilometerit missaannik silissuseqarpoq, 6,2 kilometerit 8,2 kilometerillu akornanni itissuseqarluni qaammatillu illuatungaani nunarsuarmut sammiveqanngisaannartumiilluni.

Avataarsualiartaat Chang’e-6 qaammammut angalareerluni Kinami Indre Mongoliami nalunaaqutaq 08.06 nunnippoq.

Maajip pingajuani Kinap qeqertaanit Hainanimit Kinami nunap avataarsuanik nakkutilliisoqarfianit, CNSA-mit, Chang’e-6 aallartinneqarpoq.

USA-mi avataarsualiartarnermut aqutsisoqarfik Nasa naapertorlugu issunik qaarsunillu 2 kilot missaanniittunik Kinamiut misissuiniarlutik pilersaarutigisimavaat.

Issut qaarsullu qanoq annertutigisut Chang’e-6-ip nassarsimanerai nalunarpoq.

Chang'e-6-imik angalaneq sioqqullugu Kinamiut Chang’e-5-iutaat qaammammit nunarsuup tungaanut sammisumit misissugassanik katersuisimavoq.

Misissuinermi qaammatip sananeqaataanik ilisimatuut nutaanik paasisaqarput, aammattaaq aatsitassat siornatigut ilisimaneqanngitsut nassaarineqarput.

2020-p naalernerani Chang’e-5 aallartinneqarpoq.

Qaammatip illuatungaa nunarsuarmit isigisinnaasatsinnit "allaanerulluinnartumik sananeqaateqarpoq allaanerulluinnartumillu oqaluttuarisaanermik peqarluni."

Teknikkikkut akisussaasoq Europamilu avataarsuanut tunngasunik suliaqartarfimmi (ESA)-mi sulisoq Neil Melville-Kenney, Reutersimut taamatut oqarpoq.

Chang’e-6-ip aallartinneqarneranut atatillugu Melville-Kenneyp Kinamiut avataarsuanut tunngasunik ingerlatsiviat suleqatigaa.

Issunit qaarsunillu misissugassat nutaat qaammatip qaavanit meterinik marlunnik ititigisumit tiguneqarsimapput.

/ritzau/

samfund måne inuiaqatigiit udland rumrejse

ATORFIIT Se alle jobs

Powered by Labrador CMS