Piniartorsuaq aqqanilinnik qerititsivilik

Tobias Ignatiussen 14-inik ukioqartoq ataataata atuarfimmit anisippaa. Nukappiaqqap piumasaata akerlianik. Tamannali avaqqunneqarsinnaanngilaq. Piniartunngussaaq.

– Ataatama atuarfimmit anisippaanga. Tamanna nuannarivallaanngilara. Ilikkagaqarnerorusuppunga. Allanneq atuarnerlu kingungaatsiartukkut ilikkarpakka. Aqqaneq-marlunnik ukioqarpunga. Kulusummi najugaqarpugut, tassanilu pikkorissumik ilinniartitsisoqarpugut. Qaammatit tallimat ingerlaneranni ilikkagaqaqaanga. Nunarsuaq uannut ammarneqarpoq, Tobias Ignatiussen oqaluttuarpoq.

Tasiilami illorujussuamini 1.000-t missaannittunik atuagaateqarpoq. Tamarmik kalaallisut allassimasut. Tassaniipput Otto Sandgreenip aamma Christian Rosingip atuakkiaat tusaamasat. Aammali atuakkiat nunanit allaneersut kalaallisuunngortitaasut.

- Suut tamaasa atuartarpakka! Nuannaarluni oqarpoq.

Nuummi atuagaarniarfik matummat aliasuutigaa. Tobiasimi illoqarfiit pingaarnersaanniikkaangami atuagarpassuarnik pisisarpoq.

Kiffaanngissuseq

Ullumikkut Københavnimut angalavoq. Tunumi piniartorsuaq illoqarfiit pingaarnersaanni ullut tamaasa takussaaneq ajorpoq. Tuppiarti, illoqarfimmini taama taaneqartartoq, piniartutut inuuneq Arktisk Festivalimi, Københavns Universitetimi aamma DIS-imi Amerikamiunut Danmarkimi ilinniartunut oqaluttuariniarlugu ulluni pingasuni nammineq akiliilluni angalavoq. Inuit oqalugiartunut orniguttarput. Piniartup 66-inik ukiullip inuiaqatigiinnut sorlaqarluartunut inuunerminik oqaluttuaa inuit 500-ngajaat tusarnaarpaat.

- Piniartutut inuunera nuannaraara. Kiffaanngissuseq! 99-inik ukioqalernissama tungaanut piniartuussanersunga oqaatigiuminaappoq. Soraarninngornissarali - naagga massakkuunngitsoq!, qungujulalluni oqarpoq.

- Umiatsiaq aqussinnaatillugu suli ukiorpassuarni ingerlasussaanga. Utoqqalisutut misiginngilanga. Inuuneq nuannaraara. Piniartuuginnarnissara anguniarlugu qanorluunniit iliussaanga.

Ullutsinnili atortorissaarutit nutaaliat atorlugit. Nukappiaraagallaramili meeqqat qamutaasa saani marlunnik qimuttulerluni qimussertarnikuulluni maanna qamuteralammik ingerlasalerpoq. Wroom! Motoorip nukingata nipaa nuannaraa.

Piniartuartoq

Suli qimminik qimuttunik 14-inik peqarpoq, takornarianillu angallassinermi sungiusartarpai.

Tobias Ignatiussen soorunami qajartorsinnaavoq. Seeqquminili gigternini pissutigalugu qajamut amitsumut ikiniartarnera ajornakusuulersimavoq. Qajani nalimmassassavaa.

Tobias Ignatiussen piniartut meeraanermini inuusuttuunerminilu ileqqutoqqamik nooqattaarlutik inuusimasut kingulliit ilagaat. Tunumi isorartuumi uumasunik piniariarluni angalaartuarpoq. Soorlu siuaasai ukiuni tusindilinni taamaaliortarsimasut.

Aammattaaq ullutsinnut malinnaalluni angalasarluni inuuvoq. Angut nunarsuarmioq, angutaassuseqarluni alutornassuseqarlunilu sumiluunniit saqqummertartoq. Angut isikkorissoq illarsinnaasoq. Oqaasii tuluttut nutserneqartaraluartut tusarnaartut tiguartarpai. Taakkua oqaasii tusarnaarlugillu assiliisartup Carsten Egevangip Tobiasimik aallaaseqarluni piniartumik assilisai kusanartut alutorisaqaat.

Puisip seqqui mamartut

Piniartartorsuugami aqqanilinnillu ulikkaartunik qerititsiveqarami sakkussaaleqinngilaq. Piffissami annikilliorfiusumi naammattunik pilinissaq atortunillu pitsaanerpaatitsinissaq meeraanerminiilli ilikkagarisimavaa. Tuppiartili nukappiaraasoq qatanngutit angutit tallimat angutaallu aallaammik ataatsimik paarlakaajaattariaqartarsimapput. Amigaateqanngillat. Neqissarsiorlutimmi angalajuaannarput. Pigisatik tamaasa nassartarpaat. Ilaannikkulli silarlutsillugu kaassinnaasarput.

Tobias Ignatiussenip qerititsivii aqqanillit ullumikkut appanik,serfanik, mattannik, nannup neqaanik puisillu neqaannik ulikkaarput. Tullerunnat orsulikkat. Aalisakkat neqillu panertut ilaqutariit illuata silataani nivinngaavimmiipput.

Puisip seqqui mikiarsikkat — asiulaarsimasutut taaneqarsinnaasut - mamarilluarpai.

Tobias Ignatiussen qungujuppoq:

- Inuusuttuullugna ullut tamaasa nerisarpakka. Puisip seqqutortarsimanngikkaluaruma perorsimassanngikkaluarpunga.

Puisiaqqat upernaakkut seqinnarissuumiititat mamartunik mikialaarsimasut aamma mamarilluarpai.

- Pisiniarfimmi qallunaaminernik nerisassaqarpoq. Kisianni qaarsillannarinngilakka, taanna oqarpoq.

Ukiumut puisit 200-t missaanniittut pisarisarpai. Siornatigut 500-t angullugit pisaqartarsimavoq. Amii ataaseq 400 koruunilerlugu tunisarpai.

Tasiilami apersortittoqassappat kuisittoqassappalluunniit Tobiasip mamartuutaanik pisisoqarsinnaajuaannarpoq. Pisaqarluaraangamilu allanut agguaasisarpoq.

Toqu siooranartoq

Tobias ukiivimmi Umivimmi, Tasiilamit kilometerinik hundredelinnik marlussunnik ungasitsigisumiittumi, inunngorpoq. Ilaqutariit amerlanngitsut tassani najugaqarput.

Piffissap ilaani Iddilivardiini ilaqutariit marluinnaallutik najugaqarsimapput.

- Qaammatit aqqanilinniit aqqaneq-pingasut angullugit sivisussuseqartumi avataanit attaveqarfigineqanngilagut. Nammineertariaqarnikuuvugut. Oqarasuaateqanngilaq. Nakorsaqaranilu peqqissaasoqanngilaq.

Tobias ilaquttani, nuliani Silpa qitornarsiatillu marluk ilagalugit ullumikkut aalaakkaanerusumik najugaqarpoq. Aamma aapparisimasaminit pingasunik qitornaqarpoq. Sulili angalaartuartuuvoq. Piniartutut puisinniartilluni ilaannikkut kilometerit untritilit arlallit angalasariaqartarpoq.

Tobias Ignatiussen nuliami inunngorfiani Tiilerilaami sisamanik illuuteqarpoq. Tasiilamilu ilaquttanilu angerlarsimaffeqarluni. PIngasunik umiatsiaqarpoq. Sunngiffeqangaanngilaq.

- Aaqqissugassaqartuaannarpoq. Piniartutut atortussanik paarsilluarnissaq pingaaruteqarluinnarpoq.

Tamanna inunnguutigaa. Meeraalluni angumminit ilinniartinneqarpoq. Piniarneq, pilineq imminullu paarilluarnissaq ilikkarpaa.

- Mianersortuaannarpunga. Piniartuuneq ulorianartuuvoq. Toqulu siooranartuaannarpoq.

Nanoq

16-inik ukioqarluni nannumik pisaqaqqaarpoq.

- Puisinniarpunga. Tassanngaannaq tununni nannumik takulerpunga. Pissangavunga. Maanna kukkussanngilanga. Nanorli immamut qimaavoq. Niaquatigut aallaariarlugu ataatannukapallappunga. Inuppassuit takkullutik nanoq nunamut qaqinniarlugu ikiuupput.

Inuusuttuaraq taanna ullormi tassani tusaamasanngorpoq. Kingorna arlaleriarluni nannussimavoq. Piniartartorsuaq usorsitsaarneq ajorpoq, angutaa oqarsimavoq.

- Eqiasuillutillu piniariartuassaatit. Taamaalioruit pikkorinnerujartuinnassaatit. Piniartuunerarlutik usorsitsaartut upperisarnagit. Taakku qaqutigut iluanaaruteqartarput, ataataga oqarpoq.

- Inuusuttuuninni aalajangersimasumik suliffeqartut aningaasarsiortuupput. Piniarnerli inuussutissarsiutitut siunissaqartoq ataataga isumaqarpoq.

Ulorianartuaannarpoq. Silap pissusiata allanngornera aarlerinarnerulersitsivoq. Sikkorlunnera sikoqannginneraluunniit ukiukkut piniarnissamik ajornarnerulersitsivoq. Siornatigut oktobarimi sikusarpoq. Maanna decembarimi sikusarpoq, Tobias Ignatiussen oqaluttuarpoq. Siornatigut juunimi aasartarpoq. Ullumikkut maajimi aasalereertarpoq.

Silaannaap allanngoriartornera pissutigalugu piniartuuneq suli ilungersunarnerulersimavoq.

- Sulili uumasorpassuaqarpoq, Tobias Ignatiussen oqarpoq.

- Puisit nunamit ungasinneruliinnarput. Piniartuusugut pissutsinut naleqqussartarpugut.

Piniarneq takornariartitsinerlu

Tobias Ignatiussenip piniarnini takornariartitsinermik tapitalertarpaa. Umiatsiaminik takornarianik angallassisarpoq. Tamatumalu saniatigut puisit nannullu nasittarpai. Taakku takornariat tamarmik alutorilluartarpaat.

– Tobiasip Tasiilap eqqaani kangerluit tamaasa nalunngilai. Nannunik ujaasillaqqissuuvoq, Line Kristiansen oqaluttuarpoq. Taanna Tobias Ignatiussenip suleqatigaa. Marluullutik takornariartitsivik Sermilik Adventures ingerlappaat.

Takornariat nannumik takornartinniarlugit ungasissumut, soorlu nunaqarfimmut Isertumut, ujaasiartortittarpaat. Takornariap piniartuik sulisoq malinnaavigisinnaasarpaat.

Takornariat nunarsuarmit tamarmeersut, USA-meersut, Schweizimeersut Tysklandimeersullu. Allaat Emiratineersut misigisassarsiorusuttorujussuit Tunumut angalasarput.

Takornariat pinngortitaq qanimut misigisarpaat, amerlanertigut tuperniittarput. Silarlukkaangat illuni Tobias Ignatiussenip Line Kristiansenillu pigisaasa ilaanni unnuisarput.

Tunumi takornariaqarneq ukiorpassuarni ingerlalluarpoq. Maannakkorpiarli Islandimit timmisartuussisoqartarunnaarnera ajornartorsiutaangaarpoq. Aasaanerani taamaallaat timmisartuussisoqartarpoq.

– Politikerit nuna tamaat, avannamut kangimullu, puigortarpaat. Tunu tunuliaqutitut pineqarpoq. Nuna 3 millioninik innuttaasoqartutut aquppaat. Allaffissornikkut suliassarpassuaqarpoq. Tunumi niuerneq ajornakusoorpallaarlunilu aningaasanik taarsigassarsinissaq akisuallaarpoq, Line Kristiansen oqarpoq. Tobias Ignatiussenilu isumaqataavoq.

– Suut tamarmik Nuuk aqqusaarlugu ullumikkut ingerlasariaqarput. Siornatigut angalasorpassuit Islandimit toqqaannartumik timmisartukkut tikittartut amerlapput. Ingerlarsuunnaavinnikuuvugut. Ukioq naallugu takornariarpassuaqartarpugut. Air Greenlandip Nuuk-Kulusuk-Island timmisartuussisarfigisariaqaraluarpaa.

Dubai

Sermilik Adventures nunanit tamalaanit soqutigineqarluarpoq. Takornariammi Tunumi pinngortitaq kusanartoq qanimut misigisaqarfigiumavaat.

Piniarnermik inuussutissarsiuteqarneq siunissaqartoq Tobias Ignatiussenip upperaa. Pingaartumik takornariartitsinermik tapitalerneqaruni. Ernersiaa Enos soqutiginnilluarami piniariaqataakulasarpoq.

Tuppiarti ilaquttanilu Tasiilami najugaqartuupput. Siuaasamili pisimanerattut puisinik, qilalukkanik, timmissanik, nannunik aalisakkanillu piniariarluni kilometerit untritilippassuit angalasarpoq.

Taassuma inuunera siuaasaanit isumannaannerulaarpoq. Tobias Ignatiussen ullutsinnut malinnaalluni angalasartuugami Tunumiiginnarneq ajorpoq. Nunarsuaq tamaat angalaffigisarpaa.

Siorna Dubaimi juullisiorpoq.