Qimussersaq 71 KNQK-p immikkut ittumik ataatsimeersuarnissaanik piumasaqartunut ilannguttoq

Kalaallit Nunaanni Qimussertartut Kattuffianut, KNQK-mut, peqatigiiffiit tunuliaquttaasut kattuffimmik naammagisimaarinnigatik nalunaartut maanna amerlanerulerput.

Ilulissani qimussertartut peqatigiiffiat, Qimussersaq 71, kattuffiup siulersorneqarneranik naammangiliisoq, peqatigiiffiup siulittaasua, Jens Reimer, Sermitsiamut oqarpoq.

AAMMA ATUARUK:

KNQK aningaasaliissutit 500.000 koruunit sinneqartut siunertarinngisaanut atorsimallugit nassuertoq

- Ajorpoq. Ajorluinnarpoq. Aningaasaliissutit qimussersuarnut atortussaapput. Millionit affai aningaasarpassuupput. Taakkua maangaannaq atorneqarneri Qimussersamit akuerisinnaanngilarput, Jens Reimer oqarpoq.

Qimussersaq kattuffik pillugu: Kusanaak

KNQK, nunap karsianit tapiissutit, 535.342,22 koruunit, siunertarinngisaanut, tassa missingersuutit saneqqullugit, atorsimallugit, Facebookkimi quppernermini arfininngornermi unnukkut nalunaarutigai. Taakkua Avannaata Qimussersuanut peqataasut  angallanneqarnerinut kattuffiullu aningaasaqarnerata pitsanngorsarnissaanut atortussatut tapiissutaasaraluartut tamakkununnga atorneq ajorsimasut, KNQK nassuiaavoq.

- KNQK-p ileqquusumik ataatsimeersuarneranut. Tunumut pikkorissaajartortitsinermut. KNR TV-meersup Avannaata Qimussersuata TV-kkut toqqaannaq aallakaatinneqarnissaanut angalaneranut. Ingerlatsinermut. Avannaata Qimussersuanut aaqqissuisut aningaasartuutaasa ilaannut oqilisaassinermut. Ullormusianut kiisalu Honorarinut. Ville Siegstadip aningaasaateqarfianut. Tassa taakkununnga atorneqarput aningaasaliissutit qulaani eqqartorneqartut, kattuffik allappoq.

Ilinniartitaanermut, Kultureqarnermut, Timersornermut Ilageeqarnermullu Naalakkersuisup, Nivi Olsenip (D), aningaasat taakkua siunertamut atorsimanngitsut, uterteqqusimagai kattuffiup ilanngullugu nassuiaatigaa. 

Aningaasat siunertarinngisamut atorneqarnerat Qimussersaq 71-ip kusanaagaa.

- Soorunami nuanninngilaq. Aningaasat taama amerlatigisut tulluusimaarutigisinnaanngilluinnarpagut taama pineqarsimasut. Aningaasat angallannermut atorfissalissuit pinnguarisimavaat, Jens Reimer oqarpoq.

AAMMA ATUARUK:

Qimusseq Sisimiut: KNQK immikkut ittumik ataatsimeersuarli

Immikkut ittumik ataatsimeersuartoqarnissaanik noqqaasoq

Qimusseq Sisimiut KNQK-p immikkut ittumik ataatsimeersuarnissaanik noqqaalluni tusagassiorfinnut tallimanngornermi nalunaaruteqarpoq. Tamannalu iluliarmiut maanna taperserpaat. 

- Sisimiormiut immikkut ittumik ataatsimeersuarusullutik nalunaarput, uagut aamma taanna taperserparput, Jens Reimer oqarpoq.

Taassuma immikkut ittumik ataatsimeersuartoqarnissaanik kissaatini ima tunngavilersorpaa:

- Taamatut atornerluisut kattuffimmi inissisimaannarniarpata ajorami. Taamaammat immikkut ittumik ataatsimeersuartariaqarpugut.

Jens Reimerip qimussertatut peqatigiiffii, KNQK-mut tunuliaqutaasut, immikkut ittumik ataatsimeersuarusunnertik tunngavigalugu attaveqarfigissallugit ilanngullugu oqaatigaa.

- Sinerissami peqatigiiffeqatigut ujartussuagut, taanna oqarpoq.

Kattuffik qanoq ililluni immikkut ittumik ataatsimeersuarsinnaassanersoq nalunarpoq. Kattuffiup malittarisassai, kattuffiup nittartagaaniittut atuaraanni, immikkut ittumik ataatsimeersuarnermut tunngasumik malittarisassani allassimasoqanngilaq.

Sermitsiap KNQK-mi siulittaasoq, Mikkel Jeremiassen, pisut kingulliit pillugit kiisalu aamma Qimussersaq 71-p immikkut ittumik ataatsimeersuartoqarnissaanik piumasaqaataa pillugu attaveqarfigisaraluarpaa. Taassumali Sermitsiap saaffiginnissutai akineq ajorpai.