KNQK aningaasaliissutit 500.000 koruunit sinneqartut siunertarinngisaanut atorsimallugit nassuertoq

Kalaallit Nunaanni Qimussertartut Kattuffiata, KNQK-p, nunap karsianit aningaasaliissutit 535.342,22 koruunit siunertarinngisaanut, tassa missingersuutit saneqqullugit, atorsimallugit, Facebookkimi quppernermini arfininngornermi unnukkut nalunaarutigai.

Ilinniartitaanermut, Kultureqarnermut, Timersornermut Ilageeqarnermullu Naalakkersuisup, Nivi Olsenip (D), aningaasat taakkua siunertamut atorsimanngitsut, uterteqqusimagai kattuffiup ilanngullugu nassuiaatigaa.

AAMMA ATUARUK:

Qimusseq Sisimiut: KNQK immikkut ittumik ataatsimeersuarli

- Ilumoorpoq KNQK kulturimut timersornermullu naalakkersuisup aalajangerneq apuunnikuummagu, 2025-mut aningaasaliissutaasut ilaasa siunertamut allamut atorneqarsimanerat pissutigalugu uterteqqusissut aalajangiiffiusoq apuunnikuummagu.

- Taakkualu utertissangigut atsioqatigiinnikkut isumaqatigiissutigisimavarput, kattuffiup siulersuisuuneri allapput.

Taakkua tassaapput: Mikkel Jeremiassen, Hansigne S.Broberg, Susanne Berthelsen, Hans Jørgen Lukassen, Amos Pjettursson, Thomas Inusugtoq aamma Mati Jensen.

Aningaasanik siunertaanngitsumut atuineq taamaallaat nassuiarneqarpoq. Tassa imaappoq, kattuffiup nassuiaanermini naatsorsuutini arlaannaalluunniit issuaaviginagillu saqqummiutinngilai.

Kattuffik: Aningaasaliissutit uterteqquneqartut ukununnga atorneqarnikuupput

Kattuffik aningaasanut 2025-mut inatsit aqqutigalugu 250.000 koruuninik taperneqarpoq. Taakkua qimmit qamutillu unammiffissamukaannerannut kiisalu kattuffiup aningaasaqarnerata pitsanngorsarnissaanut atugassaasut, aningaasanut 2025-imut inatsimmi allassimasoqarpoq. Inatsimmittaaq tassani allassimavoq tapiissutit sumut atorneqarsimanerat pillugu naatsorsuutinik tunniussisoqassasoq.

AAMMA ATUARUK:

Ataatsimiititaliaq: Qimussertartut kattuffiat missingersuutitik malinnagit aningaasanik atuisimapput

Naatsorsuutilli 2025-moortut Kultureqarnermut Naalakkersuisoqarfimmut suli tunniunneqarsimanngikkaluartut qimussertartut kattuffiat, aningaasanut 2026-mut inatsit aqqutigalugu aamma 250.000 koruuninik aningaasannassimasoq, Sermitsiap siusinnerusukkut oqaluttuaraa. Ukiulli taakkua sioqqullugit kattuffik nunap karsianit aamma taperneqartarpoq.

Naalakkersuisup tapiissutit siunertaanngitsumut atorneqartut uterteqqusimasai, sumut atorneqarsimanersut pillugit, KNQK ima nassuiaateqarpoq.

- KNQK-p ileqquusumik ataatsimeersuarneranut. Tunumut pikkorissaajartortitsinermut. KNR TV-meersup Avannaata Qimussersuata TV-kkut toqqaannaq aallakaatinneqarnissaanut angalaneranut. Ingerlatsinermut. Avannaata Qimussersuanut aaqqissuisut aningaasartuutaasa ilaannut oqilisaassinermut. Ullormusianut kiisalu Honorarinut. Ville Siegstadip aningaasaateqarfianut. Tassa taakkununnga atorneqarput aningaasaliissutit qulaani eqqartorneqartut, kattuffik allappoq.

Taakkua ataasiakkaarlutik qanga qanorlu annertutigisumik aningaasartorfiutigisimaneri nassuiaammi ilanngunneqanngilaq.

Sermitsiap kattuffimmi siulittaasoq, Mikkel Jeremiassen, tamanna ilaatigut akissutissarserusullugu sapaammi ullaap tungaani attaveqarfigaa. Taannali saaffiginnissummut allaaserisap suliarineqarnerani qisuariaateqanngilaq. Sermitsiap Mikkel Jeremiassen marlunngornermit arlaleriarluni aamma attavigisaraluarpaa, kattuffiulli siulittaasuata tusagassiorfiup saaffiginnissutai qisuariarfigisanngilai.

Naatsorsuutit suli naammassinngitsut kukkunersiuisumillu akuerisamik nassaarneq

Kattuffiup naatsorsuutiminik piffissaq eqqorlugu naammassinninnissani ukiuni kingullerni ajornartorsiutigisarpaa. Tamannalu aamma kattuffiup maanna nassuerutaanut ilaavoq.

- Naatsorsuutit angummakkiartuaalernissaat tamatta erinigisarput tullinnguuppoq.

Naatsorsuutit ukiuni sorlernit suli piareerneqarsimannginnersut kattuffiup nassuiaammini itisilinngilai. Taamaakkaluartoq kukkunersiuisumik, naalagaaffimmit akuerisamik, aasaq manna nassaarsimanertik oqaasertalerpaat.

- Kukkunersiuisumik naalangaaffiup akuerisaanik kiisami aasaq manna qulakkeerinnissimavugut. Ukiuni kingullerni arlalinni ajornartorsiutigisimallutigu nassaarnaveeqqaneq.

Kattuffiup kukkunersiuisumik, naalagaaffimmit akuerisamik, kukkunersiuisoqalernissaa Naalakkersuisunit piumasaqaatinut ilaavoq. Kattuffik ilisimatitsivoq GrønlandsRevision A/S kukkunersiuisorilersimallugu.