Oqaluttuarisaanermi kukkunerit annertuut marluk: Kaaviiartitatik 51 millioninik amerlanaarpaat – 20 millioninillu nalikilliliivallaarlutik

Greenland Airportsip 2023-mi naatsorsuutimini kaaviiaartitani piviusumit 51 millionit koruuninik amerlanerusutut allassimavai. Tamanna Sermitsiap mittarfiutileqatigiit nalunaarusiaannik misissuinerata ersersippaa.

Kukkuneq 2024-mut ukiumoortumik nalunaarusiami, suliffeqarfissuup 2023-mi naatsorsuutaanik ilalimmi, allaatigineqarpoq. Kisitsit ukiumoortumik nalunaarusiamut kingullermut aamma ilanngunneqarpoq.

AAMMA ATUARUK

Greenland Airportsimi naatsorsuutini kukkunerit pillugit kukkunersiuinermut ataatsimiititaliaq naammagisimaarinninngilaq

Kisitsisit naapertorlugit 2023-mi kaaviiaartitat 515,5 millionit koruuniusussaagaluarput. Kisitsisilli taakku 51,25 millionit koruuninik annertunaarneqarsimapput.

Aningaasat taakkua suliffeqarfissuup nammineq ingerlatseqatigiiffiisa akornanni niuernermut tunngapput.

– Pissutsit misissoqqissaarlugillu suliffeqarfissuup iluani immikkoortut ilaat suliffeqarfissuup naatsorsuutaani eqqortumik immikkoortinneqanngitsut uppernarsarparput, aningaasaqarnermut pisortaq Per Stjærnholm Trærup Sermitsiamut akissummini oqarpoq.

Taavami suna ajortuua?

Suliffeqarfiit kattuffiup kaaviiaartitai kisissaatillugit suliffeqarfiit kattuffiup iluaniittut akornanni niuerneq ilanngaatigineqartariaqartoq ukiumoortumik naatsorsueqqissaarnermut inatsimmi allassimavoq.

Taamaanngippat suliffeqarfissuup nammineq ingerlatseqatigiiffiutiminik niuernermi kaaviiaartitai nunanut allanut tunisinermini tamarmiusunut ilaalissapput. Tamannarpiarlu matumani pivoq.

– Kukkuneq saqqummiussinermi pineqarpoq, tamannalu isertitanut ataatsimut naatsorsuutini immikkoortunut agguataarinermiinnaq sunniuteqarpoq. Ukiumoortumik angusat, oqimaaqatigiissitsinerit namminerlu aningaasaatit sunnerneqanngillat, Per Stjærnholm Trærup naqissusiivoq.

Kukkussutilli suliffeqarfissuup kaaviiaartitaasa ukiumiit ukiumut allanngorarnerat eqqunngitsumik takutippaa. Naatsorsuutit naapertorlugit kaaviiaartitat 2023-mit 2024-mut apparsimapput. 2023-mili kisitsisit naqqinneqarpata qaffakkiartulaarsimassapput.

Greenland Airportsip akissutaa suliffeqarfiup kukkunersiuisui Grønlands Revision suleqatigalugit suliarineqarpoq. Kukkunersiuisullu kukkuneq pillugu allamik oqaaseqanngillat.

Nammineq aningaasaatit 20 millionit koruuninik nikingasut

Taamaappat, taava kukkuneq millionilikkaanik naleqartoq nammineq aningaasaatitsinnut sunniuteqarpa? Aap, naak piffissaq suliffeqarfillu allaagaluartoq.

Kukkunerup aappaa tassaavoq taamanikkut Mittarfeqarfiusimasup 2022-mut naatsorsuusiaa Deloittemit kukkunersiuiffigineqarsimasoq. Suliffeqarfik ingerlatseqatigiiffimmut nutaamut, ullumikkut Greenland Airports Regionalimik ateqartumut, 2023-mi ilanngunneqarpoq.

AAMMA ATUARUK

Professori Greenland Airportsip kukkussutai millionillit pillugit: Akisussaasut tamanna ajuusaarutigissavaat

Kukkuneq taanna Sermitsiamit paasineqaqqaanngilaq. Tusagassiuutilli kukkuneq tamanna taamani arajutsivaat, taamaammat maanna eqqaanissaanut piffissanngorpoq.

Kukkuneq tassaavoq Mittarfeqarfiit pigisatik nalillit 20,6 millionit koruuninik appasippallaartumik naatsorsorsimammatigit. Allatut oqaatigalugu suliffeqarfiup pigisai nalikippallaartinneqaprut. Tamanna nammineq aningaasaatinut sunniuteqarpoq, tassa suliffeqarfiup pigisaasa akiligassallu nalingisa assigiinngissutaasa naatsorsorneri.

Paasissutissaq kukkusoq tamanna ingerlatseqatigiiffiup nutaap ukiumoortumik nalunaarusiaani siullermi, ukiumut naatsorsuusiorfiusumut 2023-mut tunngassuteqartumi, 2024-milu ataatsimeersuarnermi akuerineqartumi, naqqinneqarpoq.

Ilaatigut pisuussutit ilaat tunineqarunik nalingi eqqarsaatigineqaratik nalikilliliissutigineqartarput. Mittarfik nammineq amigartooruteqaraluarluni immaqa suli biilinik, umiatsianik assigisaannillu aningaasanut naleqarluartunik pigisaqarpoq.

Taamaammat tamakku nalingi suli allassimasussaapput, tamannalu naatsorsuinermi naammaginartumik ilanngunneqanngilaq. Taamatuttaaq sanaartortitsinerit aamma kukkusumik nalunaarsorneqarput.

Taamaalilluni 2022-mi naatsorsuutini 20,6 millionit koruuninut "sunniutilimmik kukkusoqarpoq."

Piginneqatigiiffimmut nutaamut aningaasaliissutit 20,6 millionit koruuniusut nammineq aningaasaatit 170 millionit koruuniusut 12 procentiisa missaanniipput.