Raajaleriffissuaq pisassiissutit ilarujussuinik ukioq manna suli pisaqanngilaq

- Nalaatsornerinnaanngilaq raajartassiissutinik sinneqartoornerput.

Andrias Olsen Royal Greenlandimi kilisaatinut pisortaq, Sermitsiamut taama oqarpoq.

Raajaleriffissuaq Royal Greenland Kitaani TAC-imik aamma taaneqartartumik pisassiissutigineqartunik annertoorujussuarmik suli ukioq manna oktobarip qiteqqunnerani aalisarsimannginneranut atatillugu, allakkatigut akissuteqaammini taama oqarpoq. 

Raajaniarneq ukiut ingerlanerini, Naalakkersuisunit Inatsisartunilu ilaasortanit politikkikkut immikkut maluginiarneqarpoq. Pisassiissutit aalisakkerivinnut angisuunut soorlu Royal Greenlandimut Polar Seafoodimullu kiisalu suliffeqarfinnut akunnattumik angissusilinnut Niisa Trawl aamma Sikuaq Trawlimut eqikkarneqarput.

Royal Greenland A/S, Kalaallit Nunaanni raajarniartuni annerpaajusoq, Kitaani pisassiissutiminit 18.000 tonsinit oktobarip qiteqqunnerani, 11.000 tonsit missaat aalisarsimalereerpai. Taamaasilluni nunatsinni aalisakkeriviit siuttuisa 5,7 milliarder koruuninik siorna kaaviiaartitallit, raajartassiissutigisamik 63 procentiinnaat aalisarsimalereerpaat.Akuersissutilinnut 22-nut pisassiissutit pillugit niuerfik

Pisassiissutinik børsi 22-nik akuersissutaateqartunik peqataaffigineqartoq

Kisitsisit Aalisarnermut Piniarnermullu Nakkutilliisoqarfimmit, KANUAPNA-mi, pisassiissutit niuerutigineqartarneranni takuneqarsinnaapput, tassanilu akuersissummik piginnittunut 22-nut pisassiissutigineqartut amerlassusaat, pisassiissutigineqarsimasut sinnerilu takuneqarsinnaallutik.

Suliffeqarfiup raajartassiissutit oktobarip qiteqqunnerani 40 procentii tikillugit raajartaarisimannginnerinut qanoq nassuiaateqarnersoq Royal Greenland aperaarput.

Tamatumunnga kilisaatinut pisortaq Andrias Olsen akissuteqarpoq:

- Nammineq pisassatsinnik aalisarneq pilersaarusiorlugu sapinngisamik annertunerpaamik iluanaaruteqarnissaq suliassatta pingaarnerit ilagaat. Taamaattumik raajartassiissutit suli sinneqarnerat, nalaatsornerinnaanngilaq. Kilisaataatigut marluk Svalbardip eqqaanni qaammatini sisamani ukioq manna ataatsimut, raajarniarput. Kalaallit Nunaata kitaani raajanik pisassiissutit ukiup naalernerani aalisarneqarsinnaaniassammata, aalisarneq Kitaata sikuata upernaamisulli killilersorneqarpallaannginniassammat taamanikkussamut taamaaliorput.

Taannalu nangippoq:

- Qanoq annertutigisumik pisassinneqartarnersugut ataatsimut isigalugu aalisarnissamut pilersaarutivut tunngavigisarpaat. Taamaattumik aamma eqqarsaatigisarparput sumi aalisarneq pitsaanerpaamik iluanaarutaasinnaassanersoq aammalu qanoq ilinerani raajat amerlanerpaanik naleqassanersut, raajammi anginerusut pitsaanerusumik akeqartarmata. Raajat mikisut tamaasa aalisarutsigit, allisarnissaanut periarfissaqarnavianngillat. Tamanna eqqarsaatigiuartariaqarparput.

Pisassiissutit aappaagumut nuunneqarsinnaapput

Aalisarnermut inatsit allanngorartumik ingerlatsinissamut periarfissiisoq, taamaalilluni ukioq manna pisassiissutit, pisarineqanngitsut 25 procentii tikillugit ukiuni tulliuttuni pisassiissutigineqarsinnaasut, Andrias Olsenip ilanngullugu oqaatigaa.

- Nammineq aalisarneq eqqarsaatigalugu nunatsinnilu suliffeqarfissuarni pigisatsinni suliffiit aalajangersimasut qulakkeerniarlugit, umiarsuaatileqatigiiffiit pitsaanerusumik pilersaarusiorsinnaapput. Inatsisini taamatut allanngorartumik periarfissaqartoqarnissaa pitsaasorujussuuvoq, kilisaatinut pisortaq oqarpoq. 

Taamaattorli qaleralinniarnermiit annertuumik isertitaqarneruneq pillugu Royal Greenlandip qaleralinniarneq raajarniarnermit pingaarnerutippaa?

- Naatsumik oqaatigalugu, naamik. 

Aalisarnerusinnaagaluarnissinni tunisaqarnerusinnaagaluarnissinnilu Sisimiuni raajaleriffimmi sulisut ikilisinneqarnerat qanoq nassuiarsinnaaviuk?

- Raajanut ataatsimoortumik pisassiissutit ukiuni kingullernisut apparaangata, ajoraluartumik tamanna suliffissaqarnermut sunniuteqartarpoq. Taamaattumik suliatsinnik sapinngisamik annertunerpaamik naleqalersitsinissaq suli pingaaruteqarneruvoq. Kilisaatit avataasiortut pisaassa 25 procentii nunami suliffissuarni suliarineqartussanngorlugit tulaanneqarnissaat piumasaqaataavoq, Royal Greenlandili 35 procentinik ukioq manna tunisinikuuvoq, Andrias Olsen oqarpoq.

Tunisassiorfiit matuneqassanngillat

Kilisaatinut pisortaq ilanngullugu oqarpoq:

– Naak pisassiissutit ikiliartoraluartut tunisassiorfiit matuneqarnissaat eqqarsaatiginikuunngisaannarparput, taamaanngilaq. Sisimiuni raajalerineq Royal Greenlandimut pingaaruteqarpoq, taamaattumillu tunisassiat pitsaassusaat sulisullu iluaquserniarlugit tunisassiorfik iluarsaallugulu ukioq manna nutarterparput.

– Suliffissat amerlassusaat nikerartuaannarput, ilaanni sulisussaaleqinermik pissuteqarluni, suliffissanik aalajangersimasunik pilersitsinissaq ukiup ingerlanerani pingaarnerpaatipparput. Sisimiuni tunisassiassat amerlanerit qerisuummata tunisassiorneq agguataarsinnaanngorlugit ukiup ingerlanerani aaqqissuulluarsinnaavarput. Tamanna tunisassiornermut sulisunullu pitsaasutut isigaarput.

Ice Trawl 

Aammattaaq ingerlatseqatigiiffiit Royal Greenlandip ilaannakuusumik piginneqataaffigisai arlallit raajartassiissutimik ilarujussui suli aalisarsimanngilaat. Assersuutigalugu oktobarip 14-ianni kilisaataat, Ice trawl 6.900 tonsinit pisassiissutigineqartunit 4.700 tonsinik aalisarpa?

- Ice Trawl pisassiissutinik ukioq manna annaasaqartussaanngilaq. Suliffeqarfiup Kalaallit Nunaata Kangiani raajanut pisassiissutit tamakkerlugit 2026 aallartinnerani, aalisarpai, pisassiissutit pitsaanerpaamik atorneqarnissaat eqqarsaatigalugu tamanna pitsaanerpaajummat. Taamaattumik Kalaallit Nunaata Kitaani raajarniarneq utaqqisinneqartariaqarpoq.

- Pisassiissutit tamakkerlugit aalisarneqarnissaannut aalisarneq taamaallaat tunnganngilaq, piffissalli atorneqarnissaa naleqarnerpaaffissaallu pineqarput. Tamanna Royal Greenlandimut suliffeqarfinnullu allanut Royal Greenlandip aqutsiffigisaanut atuuppoq, Andrias Olsen oqarpoq.

Salling, Polar: - Pisassiissutit usisinnaavagut

Raajanik suliffeqarfissuaq alla namminersortutullu inuussutissarsiornikkut aalisarnermik ingerlatsisoq, 1,7 milliardit koruuninik siorna kaaviiaartitaqartoq, Polar Seafood Greenland A/S ukioq manna oktobarip 16-iani pisassiissutini, 14.000 tonsiusuni 13.000 tonsit aalisarsimalereerpai.

Raajarniat anginersat pingajuat, Niisa Trawl ApS, pisassiissutini 7.000 tonsit missaanniittuni 6.000 tonsit sinnerlugit aalisarsimalereerpoq. Ingerlatseqatigiiffiutaalu Sikuaq Trawl 5.500 tonsinik aamma aalisarsimalereerluni. Polar, Niisa Sikuarlu taamaalillutik pisassiiissutinik immikkut tamarmik 95, 94 aammalu 92 procentit missaannik oktobarip qeqqani aalisarsimalereerput.

- Pisassiissutigineqartut tamakkerlugit aalisarnissaannut umiarsuit naammattunik angissusillit pigivagut, tamannalu soorunami tunngavigalugu aalisarnissarput aaqqissuupparput. Aalisariutitta annertusinissaannut aningaasaliinikuuvugut, inuttallu pikkorissut pisassiissutit tunniunneqartut aalisarnissaannut piginnaaneqarput. Sinerissap qanittuani kilisaataatitta ilaat pisassiissutit tamakkerneqarmata septembarip aallartilaarnerani aalisarunnaartariaqarnikuuvoq. Umiarsuaq inuttallu kalaallit umiarsuaatileqatigiiffiannut allamut attartortissallugit periarfissaqaraaluarpugut, tamannali naalakkersuisoqarfimmit itigartinneqarpoq aalisarnermut inatsit nalunaarullu tassunga atasoq innersuussutigineqarluni. Isumaqarpugut tamanna malittarisassat eqaannerulersinnaannginnerinut assersuutissaasoq, Polar Seafood Greenlandimi pisortaaneq Bent Salling oqarpoq.

Nangilluni ima oqarpoq:

– Suliffissuaatitsinni tunisassiassanik amigaateqarpugut, Nuummilu suliffissuaq ingerlaannaqqullugu Manerassuarmi raajarniartariaqarnikuuvugut. Aalisarsinnaatitaanitta atorluarnissaanik qanoq pingaartitsitiginerput tassuunakkut takuneqarsinnaavoq. Aalisariutaatitta ingerlaannarnissaat uagutsinnut pingaarneruvoq, umiarsuarmi, umiarsuit suliffissuini Kalaallit Nunaannilu sapinngisamik naleqarnerpaamik pilersitsinissaq qulakkeerniarlugu. Taamaattumik siunissami kalaallit umiarsuaatileqatigiiffiisa akornanni suleqatigiinnissamut periarfissat pitsaanerulernissaat neriuutigaarput. Aalisarnermut inatsit pisassiissutillu killeqartut suliffeqarfiutigullu namminersortut naalagaaffimmut atanngitsut atugarisaasa iluanni ineriartortissinnaallutalu naleqqussarsinnaasariaqarpugut, Bent Salling oqarpoq.

Naalakkersuisut Kitaani 2026-mi raajartassiissutit, TAC, 75.000 tonsinik amerlanerpaaffilerlugu aalajangerpaat. Pisassiissutillu 2025-mut sanilliullugit, 8.000 tonsinik ikinnerupput.