Ilinniartitaaneq
Avataasiortoq Tasiilamut uummateqarfilik
Kristian Vibergip Polar Seafoodimi ilinniartoqarnermut aaqqissuussaq iluaqutigalugu Danmarkimi maskinalerisunngorniarsinnaavoq, ilinniakkanilu naammassiguniuk Tasiilamut uterluni sulilerusulluni.
– Nunatta inuusuttut ilinniarsimasut pisariaqartikkai oqallisiginartoq qaatuuppara — inuusuttut ilinniariarlugit Kalaallit Nunaanni sulisut. Piumassuseqarnissaq pisariaqarpoq, aammali periarfissamik takkuttoqarpat tigunissaa. Taamatut periarfissinneqarpunga, tamannalu nuannaarutigaara. Taamaattumik misiginikuusakka oqaluttuarerusuppakka. Immaqa tamatta iluaqutissatsinnik inuusuttunik allanik maligassiuisinnaavunga.
Kristian Viberg, Tasiilami Polar Pelagic-imi maskiinalerisutut ilinniartussanngortoq, oqarpoq.
Kristian Viberg Tasiilami peroriartorpoq, tassanilu najugaqartuarusulluni.
– Anaanaga, nukara ataatassaralu maani najugaqarput. Ikinngutikka maani najugaqarput, siunissamalu maaniinnissara kissaatigaara. Maanili ilinniarsinnaavunga? Aappi: Polar Seafoodimi ilinniartoqarnermut aaqqissuussaq atorlugu Danmarkimi maskinmesteritut ilinniarnissamut periarfissaqalerpunga. Ilinniarnera naammassippat angerlarlunga illoqarfigisanni sulisinnaavunga.
Kristian Viberg Polar Pelagicip kilisaataani Amarumi siorna aasakkut inuttaalerpoq.
– Ukiuni ilinnianngiffeqarninni kilisaammi inuttaanissama misilinnissaa kisiat siunertaringaluarpara. Inuttaanermali sivitsoriartornera taanna suliffigerusullugu paasiartuinnavippara. Aalisarfiit nalaanni maanna inuttaasarpunga, maskinmesterinngorniarnissaralu qilanaaralugu.
Imarsiortutut inuuneq
Polar Seafoodip ilinniartoqarnermut aaqqissuussaa
Polar Seafoodip ilinniartoqarnermik aaqqissuussaq 2016-imi pilersippaa. Suliffeqarfiup umiarsuaataani kalaallit sulisut kinguaariinnit tullerni ingerlateqqiisussat ineriartortinneqarnissaat aaqqissuussami siunertarineqarpoq.
Polar Seafoodip inuusuttut imarsiornermik ilinniarnissaannut periarfissittarpai, ilinniarnerannilu qanimut tapersersuisoqartarluni – suliamut tunngasutigut, inuttut aningaasatigullu. Suliffeqarfiup aaqqissuussaq nammineq ingerlataraa. Allaffissornikkut, ataqatigiissaarinikkut, ilinniarnerup nalaani akissarsiassanik aamma ilinniartunik tapersersuinermik isumaginnittoqartarluni.
Ilinniarneqarsinnaasut
Maskinmesteri
Umiarsuup naalagaa (1. aamma 3. grad)
Aalisarnermik tunisassiornermi teknoloogi
Ilinniarneq sumiippa?
Umiarsuup naalagaa (1. aamma 3. grad) Imarsionermik Ilinniarfimmi ilinniarneqarsinnaavoq
Maskinmesterinngorniarneq Sisimiuni ingerlanneqarsinnaavoq, ilinniarnerullu ilaa Danmarkimiilluni. Polar Seafoodimi ilinniartut amerlanerit Danmarkimi tamakkiisumik ilinniartuunissartik toqqartarpaat.
Aalisanermik tunisassiornermi teknoloogi Danmarkimi neqeroorutaavoq.
Qinnuteqarfissaq
Qinnuteqarnerit aalajangersimasumi piffissalersugaanngillat - ukioq kaajallallugu qinnuteqartoqarsinnaavoq.
Ilinniartut aallartittut amerlassusaat ukiut tamaasa nikerarput, suliffeqarfimmi pisariaqartitat aallaavigineqartarput.
Qinnuteqaasiorneq
Ilinniartoqarnermut aaqqissuussamut nammineerluni qinnuteqartoqarsinnaavoq, imaluunniit umiarsuup naalagaaniit umiarsuarmiluunniit suleqatinit allaniit innersuunneqarsinnaalluni. Polar Seafoodip ilinniartunngorsinnaasut kalaallit ilinniarneq pillugu Danmarkimi nittarsaassineq aqqutigalugu ilaatigut naapittarpai. Qinnuteqartut tamarmik immikkut nalilersorneqartarput, ilaatigut sooq ilinnialerusuttoqarnersoq, piukkunnaateqartoq suliffeqarfimmilu pisariaqartitat eqqarsaatigineqartarlutik.
– Inuussutissarsiummik takorloortuarsimasamik ilinniartunngorsinnaalerneq iluatsitserujussuarnertut ippoq, taamaattumik taama periarfissaqalernera uannut pingaaruteqartorujussuuvoq.
– Imaani inuuneq kajungeriuaannarnikuuara. Ataataga aalisartuunikuuvoq, ukiorpassuarnilu umiarsuarmi sumiissusersiortutut, aquttutut naalakkatullu sulisarnikuulluni. Inuunera tamaat maligassiuisutut isiginikuuara. Meeraangallarama piffissami sivisuumi avataaniittarnikuuvoq. Angerlaraangamik oqaluttuassaqartuaannarnikuulluni. Sulinini, umiarsuarmi inuunini inuillu angalaqatigisani pillugit oqaluttuanik.
Polar Seafoodip ilinniartoqarnermut aaqqissuussaa uannut periarfissarujussuuvoq.
- Kristian Viberg
– Aamma tikinnissa utaqqisarlugu eqqaamavara. Piffissami sivisuumi aallaqqanikuutilluni uannut nukkannullu tunissutissannguamik nassataqartarpoq. Meeraalluni tunissutisineq nuannertorujussuuvoq. Ataatama angerlartarnera nuannernerpaamik maanna eqqaamasaqarfigaara. Tallimat arfinillit missaannik ukioqarlunga ataataga kilisaatersorunnaarneraeqqaamavara, eqqaamasakku puigukkiunnikuuakka imarsiortunngornissannillu takorluugaqalerninnut aallartissutaanikuullutik.
Aalisartut akornanni ataqatigiinneq
– Polar Pelagicimi angalasarnermi inuttaaqatima Tasiilameersuunerat Tunumeersunerallu nuannequtigaa. Taakkua ilaat inuunera tamaat ilisarisimavakka. Ilaat meeraaninniit, allat ilaquttanniit. Angalaqatigiittarpugut, suleqatigiilluta illoqarfimmullu tassunga utertarluta.
– Qaammatit marluk pingasukkaarlugit aallaqqasaraanni ilisarisimalluakkanik ilaqarneq pingaarutilerujussuuvoq. Soorlulusooq Tasiilap ilamernga imaani angalaqatigiinnarlugu. Ataatsimoorneq taama ittoq ataatama meeraaninni oqaluttuarisartagaanut eqqaanarpoq, maannalu nammineerlunga misigisarlugu.
Ilungersunarsinnaasoq
– Suliaq imaannaanngikkaluartoq nuannisartaqaagut. Immitsinnut pisariaqartinnerput paasilertorparput, imminullu ilinniarnarsuaarluni. Inuit nutaat ikigaangata tigulluarneqartarput, aammali ilungersorsinnaasarlutik. Ungasittumiikkaluarluni suliamik kivitsisinnaaneq takutinneqartussaagami.
– Iluatsikkaanni immikkut tulluusimaarutiginermik nassataqartarpoq. Taamaattumik periarfissaq uannut taama pingaaruteqartigineqarranik takussusiisoq isumaqarpunga. Suut tamarmik tunniutiinnarneqarneq ajorput. Piumassuseqarneq takuteqqaartariaqarpoq. Suliassaq naammassisinnaallugu, akisussaaffik tigusinnaallugu iliuuseqarluarsinnaallunilu. Taamaattumik maskinmesterinngorniarnissannut periarfissaqalerama tulluusimaarutigaara. Uannut tamanna tamaviaarnerup imminut akilersimaneranut takussutissaavoq.
Siunissamut takorluukkat
– Tasiilami inuusuttut amerlasuut Polar Pelagicip umiarsuaanik misileerusussuseqarput. Uanga nammineq aamma taamaannikuuvunga. Suliffik kisiat pinnagu, ilinniagaqarnissamut pissanganartumillu suliaqarnissamut periarfissaqarnermut tunngavoq. Polar Pelagicip umiarsuaasa ilaanni maskinmesterinngorusuppunga. Inuusuttunut allanut Tasiilameersunut takorluukkamik piviusunngortitsisoqarsinnaanera takutikkusuppara, takusinnaassappassullu isumaqassaqaaq. Uangami Polar Seafoodip ilinniartoqarnermut aaqqissuussaani periarfissaqartitaavunga, Kristian Viberg oqarpoq.
Allaaserisaq aviisimiit ilinniarneq pillugu sammisameersuuvoq, akeqanngitsumik una toorlugu atuarneqarsinnaavoq.
