BankNordikip naatsorsuutai annaasaqarnermit eqqugaasut
BankNordik nunami maani iluanaaruteqarpallaarsimanngitsoq ukiup affaanut naatsorsuutit takutippaat. Savalimmiuni aningaaseriviup aggustip 15-ianni taarsigassarsisitsisarnermi erniat appartinniarpai.
BankNordik
2024-mi ukiup affaani siullermi akileraarutit suli ilanngaatiginagit 5,2 millionit koruuninik sinneqartooruteqarneq siorna piffissamut tassunga sanilliullugu 14 millionit koruuninik ajorneruvoq.
Aningaasat isertitat 2023-mi ukiup affaani siullermi 44 millionit koruuninit ukioq manna 67 millionit koruuninut qaffariarsimagaluartut, Savalimmiuni aningaaserivik sullitami inuussutissarsiortut ilaanik nalikilliliingaatsiarsimavoq, aningaaseriviup kvartalimi siullermi naatsorsuutit saqqummiussinerani tamanna nalunaarutigineqarpoq.
Nalikilliliinerit siorna 8,2 millionit koruuniusut ukioq manna amerleriarujussuarput, 33,6 millionit koruunit amigartoorutaammata.
“Niuerfimmi unammillersinnaanerup qulakkeerneqarnissaani Kalaallit Nunaannilu sullitanut akissarititaasut pitsaanerpaajunissaannut suleqataasinnaanerput bankimit nuannaarutigaarput.”, aningaaserivik tusagassiutinut nalunaarummi allappoq.
Ernianik appartitsineq
- Taarsigassarsianut erniat augustip 15-iani 0,25 procentpointip tungaanut appartinneqassapput, uninngatitanullu erniat akissarsianut kontomi nalinginnaasumiikkaluarpata ileqqaakkanulluunniit kontomi pituttorsimasumiikkaluarpata allanngortinneqassanatik. Bankip sullitai taamaasillutik suli erniagissaarlutik ileqqaagaqarsinnaassapput.
- Ileqqaakkat qaffariarsimanerat takusinnaavarput. Tassa isumaqarpoq sullitatta uninngatitaqarnissamut periarfissaativut atorluartaraat, tamannalu ajunngeqaaq, erniaqarluarluni aningaasanik uninngatitaqarneq sullitanut iluaqutaalluarsinnaammat. Ukiumi qaangiuttumi ileqqaakkanut kontoni uninngasut qaffariarsimanerisa aamma takutippaat sullitavut aningaasaqarnikkut ingerlalluartut, aningaaseriviup pisortaanera Thorshavnimi siulersorneqarfimmeersoq Turið F. Arge oqarpoq.
Aningaaserivik tamarmiusoq ukiup affaani siullermi akileraarutit suli ilanngaatiginagit 175 millionit koruuninik sinneqartooruteqarpoq – 2023-mi ukiup affaanut naatsorsuutinut sanilliullugu 13 millionit koruuninik amerlanerusunik. Ineriartornikkut ingerlalluarnermut peqqutaapput “uninngatitat taarsigassarsiallu annertusisimanerat, nammineq aningaasaatigisatta iluanaaruteqarluarsimaneri, kiisalu appartitsinerit iluartumik inissisimanerat”, pisortaaneq ilisimatitsivoq.
