ULLORMUT NALUNAARUSIAQ
Battereeruttoortoqarmat ujaasineq aallartinneqartoq
Nuuup eqqaani ujaasineq marlunngornermi aallartippoq. Tammaaneqartut ajunngitsut kingorna paasinarsivoq, oqarasuaataalliuku batteereerussimasut. Upernavimmi angutip 22-nik ukiullip ujaarineqarnera unitsinneqartoq politiini pigaartut pisortaata aamma paasissutissiissutigaa.
Arkivfoto: Leiff Josefsen
Nuup eqqaani marlunngornermi ujaasisoqartoq Kalaallit Nunaanni Politiit nalunaarput.
Angalaartut ilaat piffissaq eqqorlugu angerlarsimanngimmata qanigisaasut isumaaluttut politiinut nalunaaruteqarmata ujaasineq aallartinneqarpoq.
Politiit angallataat ujaasiartortinneqarpoq, allallu aamma peqataatinneqartut pigaartut pisortaat Carl Sværd Sermitsiamut oqarpoq.
Unnuiniarlutik aalajangersimasut
Politiit ilaqutaasunit nalunaaqutaq 11.07 nalunaarfigineqarput, ullullu ingerlanerani angalasut ajunngitsut paasineqarmat ujaasineq unitsinneqarpoq.
- Paasinarsivoq taakku Kapisilinni unnuiniarlutik aalajangersimasut. Oqarasuaatitik batteereerussimammata qanigisaminnut paasititsisimanngillat, Carl Sværd oqarpoq.
Pisoq pissutigalugu imaani angalasut qanigisaminnut erseqqissumik nalunaaruteqartarnissaat attaveqaatitigullu atortutik ajoquteqannginnissaat qulakkeertaqqullugit pigaartut pisortaat kaammattuivoq. Taamaasiornikkumi oqartussaasut pisariaqanngitsumik ujaasisariaqassanngimmata.
Ujaasineq unitsinneqartoq
Angut 22-nik ukiulik Upernavimm politiit sapaatit akunnerani uani ujaaraat. Angut taanna arfininngornerup unnuaani nikallungalluni ernguttuniit animmat kingullermik takuneqarpoq.
Angutip ujaarineqarnera unitsinneqartoq Carl Sværd paasissutissiivoq.
Ajoraluartumik angut sumiinnersoq pillugu politiit nutaanik paasissutissaateqanngillat, kisianni angutip aqqa assingalu ujaasinerminni paasisaqarnerujumallutik tamanut saqqummiunniukuuaat.
