Benjamin Netanyahup USA-mut tikeraarnerani Kamala Harrisip ataatsimeeqatigissavaa
Harrisip, Demokraatit præsidentitut qinigassanngortitassarigunagaata, Benjamin Netanyahu naapissavaa.
Præsidentip tulliata Kamala Harris sapaatip-akunnerani matumani Israelip ministeriuneranik Benjamin Netanyahumik ataatsimeeqateqarnermigut nunanut allanut politikkimik sakkortuumik anguniagaqartussatut imminut takutinnissamut periarfissaqalissaaq.
Erin Schaff/Reuters
Israelip ministeriunerata Benjamin Netanyahup sapaatip-akunnerani matumani USA-mut tikeraarnerani USA-p præsidentiata tulliata Kamala Harrisip ataatsimeeqatigissavaa.
Kamala Harrisip siunnersortaa nutaarsiassaqartitsivimmut Reutersimut taama oqarpoq.
Netanyahup Gazami sorsunneq pillugu politikkikkut siuttut oqaloqatigiartorniarlugit USA-mut tikeraarpoq.
Ilaatigut præsident Joe Biden ataatsimeeqatigissavaa, aamma Kongressimi ataatsimeersuarnermi oqalugiassaaq.
Ataatsimeersuarnermi Kamala Harris ataatsimiinnermik ingerlatsisuussanngilaq.
USA-mi præsidentip tulliatut atorfimmini USA-p Senatiani præsidentiuvoq, Inatsisartulli ilaasortaasa siulittaasuat ataatsimeersuarnerni ingerlatsisuugajuttarpoq.
Aammattaaq pingasunngorpat ataatsimeersuarnermi Netanyahu oqalugiartussaammat pisussami allami Harris Indianamiippoq, siunnersuisua ilisimatitsivoq.
Præsident Biden præsidentitut qineqqusaaqqinniarnani sapaatiummat nalunaaruteqareersorlu, Kamala Harrisip kingoraartissatut Bidenimit tapersersorneqarnissani qulakkeerpaa.
Novembarimi qinersinissami Demokraatit Kamala Harrisimik qinigassanngortitsinissaannik Bidenip tapersersuinera isumaqanngilaq. Demokraatit partiiata qinigassanngortitassartik Chicagomi aggustip 19-iani ataatsimeersuarnermi qinissavaat.
Nunanut allanut tunngasut, soorlu Gazami sorsunneq, præsidentimit nunanullu allanut tunngasunut ministerimit suliarineqartarput.
Taamaattumik Kamala Harrisip vicepræsidentitut Netanyahumik ataatsimeeqateqarnissaa nunanut allanut tunngasutigut suliaanik naalakkersuisut nukittorsarniarnerannut ersiutaasinnaavoq.
2016-imi aatsaat senatimut qinigaalluni politikkimut akuliuppoq.
Tamanna sioqqullugu eqqartuussissuserisuuvoq naggataatigullu Californiami ukiut 20-t sinnerlugit inatsiseqarnermut ministeriuvoq.
Politikeritut nunap iluani pissutsinik pingaartitsisutut imminut ilisaritilluinnarsimavoq. Nunanut allanut tunngasunut politikkimut, qaqutiguinnaq saqqumilaarfigisagaanut, tunngatillugu isornartorsiuisartut unammillersimavaat.
Kamala Harrisip Benjamin Netanyahu qaqugu naapikkumaarneraa suli ilisimaneqanngilaq.
/ritzau/
