Bentiaraq Ottosen naalakkersuisutut tunuarpoq

Bentiaraq Ottosen isumaginninnermut, suliffeqarnermut, nunamut namminermut avatangiisinullu naalakkersuisutut tunuarpoq.

Facebookimi quppernermini allappoq.

- Akisussaaffimmik tigusillunga suliaq annertooq oqimaattoq ingerlassimasara tulluusimaarutigivara, partiittalu anguniagai toqqaannartumik aallussimallugit.

- Qujavunga suleqatigisimasannut tapersersuisunullu, allappoq.

Nittartakkatigut sulissussarsiortarfimmut aningaasaliineq akuersissutigineqanngitsoq assuarineqartoq

Nittartakkatigut sulisussarsiorfik nutaaq pillugu suliap ingerlanera Bentiaraq Ottosenip tunuarneranut pissutaanerpaagunarpoq.

Bentiaraq Ottosen Aningaasaqarnermut Akileraartarnermullu Ataatsimiititaliamut qanittukkut utoqqatserpoq. Taamaakkaluartoq eqqissiviilliorneq suli ingerlavoq, pingasunngornermilu suliaq pillugu ammasumik isumasioqatigiittoqarluni.

Nittartakkatigut sulisussarsiortarfik Aningaasaqarnermut Akileraartarnermullu Ataatsimiititaliamit akuerineqaqqaarnani aallartinneqarsimarpasippoq, tamannalu ataatsimiititaliami naammagineqarani.

IT-lerisut suliap aallarteqqinnissaa piumasarigaat

Suliaq Naalakkersuisunut marloqiusamik tatisivoq.

IT-mik suliaqartut Knowitip nittartakkatigut sulisussarsiortarfiup pilersinnissaa juunimili sulissutigaat. Isumaginninnermulli, Suliffeqarnermut Nunamullu Namminermut Naalakkersuisoqarfiup suliffeqarfik suliamik unitsitseqqullugu oktobarimi qinnuigaa. Aningaasaliissutit 4,9 millionit koruunit ajornartorsiutaanerat tassani pissutaavoq.

Suliffeqarfiup eqqartuussissuserisuata nittartakkamik suliaqarneq aallarteqqinneqarnissaa kaammattuutigalugu naalakkersuisoqarfik allaffigaa, taamaanngippat suliaq eqqartuussivimmut ingerlateqqinneqassanerarlugu - suliarineqareersunut taarsiissuteqarnissamik piumasaqartoqarnialersaarunarluni.

Illuatungaani Aningaasaqarnermut Akileraartarnermullu ataatsimiititaliami suliap ingerlanneqarnera naammagineqanngilaq, tassanilu ataatsimiititaliap isumaqatigiittup naalakkersuisoq ajornartorsiutit pillugit ammasumik isumasioqatigiinnissamut pingasunngornermi qaaqqullugu.

Naleraq sakkortuumik isornartorsiuisoq

IT-lerisut suliniummik juunip aqqaneq-aappaanni qanoq ililluni aallartitsisinnaasimanersut ataatsimiititaliamik paaserusunneqarpoq. Ataatsimiititaliarmi aningaasaliinissamut qinnuteqaatinik aggustip aqqarngani aatsaat tigusaqarpoq.

Aningaasaqarnermut Akileraartarnermullu Ataatsimiititaliami ilaasortap Pele Brobergip isumasioqatigiinnerup inernera naammaginagu Sermitsiamut sisamanngornermi ullaap tungaani oqaatigaa. Bentiaraq Ottosenilu suliap ingerlanerata kingunerisaanik Naalakkersuisunit tunuarnissaanut kaammattorsimallugu:

- Naalakkersuisoq piaaraluni ataatsimiititaliamut eqqunngitsumik paasissutissiiniarsimasutut isigaara.

- Naalakkersuisup suliamik ingerlatsinera Inatsisartunullu taama iliornera pissutigalugu naalakkersuisuusoq tatigiunnaarluinnarneranik kinguneqarpoq. Naalakkersuisullu siulittaasuat kinguneqartitsinngippat Naalakkersuisut tamarmik akisussaasuutinneqassapput, Pele Broberg Bentiaraq Ottosenip tunuarnera suli saqqummiunneqanngitsoq Sermitsiamut sisamanngornermi ullaap tungaani oqarpoq.

Ottosen: Akisussaasuulinngitsungali suliaq aallartinneqarnikuuvoq

Nittartakkatigut sulisussarsiortarfik pillugu suliap naalakkersuisoqarfimmut misissoqqeqqullugit ataatsimiititaliallu piumasaat naammassiniaqqullugu "pisariaqartunik iliuuseqartoqassasoq" Naalakkersuisup Bentiaraq Ottosenip Sermitsiamut siusinnerusukkut ilisimatitsissutigaa. Ataatsimiititaliamimi ilaasortat sulisussarsiortarfik nunaqavissumit suliarineqassasoq kissaatigaat.

Ottosenip nittartakkatigut sulisussarsiorfimmik suliniut suli naalakkersuisunngorani aallartinneqarnikuugaluartoq, taamatullu naalakkersuisoqarfimmik allamik suleqateqarnikkut ingerlanneqaraluartoq, suliffeqarnermut tunngasut akisussaaffini ilisimaarigamigit ataatsimiititaliamut utoqqatsersimanini aamma nassuiaatiginikuuaa.