Bentiaraq Ottosen: Nunap inoqqaavi silaannaap pissusaata allanngoriartorneranut akersuunnermi ilanngunneqassapput
Copenhagen Climate Ministerialimi Isumaginninnermut, Suliffeqarnermut, Nunamut namminermut Avatangiisinullu Naalakkersuisoq Bentiaraq Ottosen naggasiilluni oqalugiarnermini, Kalaallit Nunaata nunarsuaq tamakkerlugu aaqqiinermut ilaanissaa pingaartippaa.
Avatangiisinut Naalakkersuisoq Bentiaraq Ottosen nunarsuarmit tamanit ministerit siuttullu Københavnimi silaannaap pissusaata allanngoriartornera pillugu ataatsimeersuarnerani naggasiilluni oqalugiarpoq. Silaannaap pissusaata allanngoriartornera pillugu isumaqatiginninniarnerni nunap inoqqaavisa tusarneqarlutillu akuutinneqartarnissaat oqariartuutigaa. Novembarimi COP30 Brasiliami ingerlanneqassaaq, tassanilu Bentiaraq Ottosen Naalakkersuisut sinnerlugit peqataassaaq.
Assi: Departementet for Natur og Miljø
Siuttut ministerillu 40-t ulluni 7. – 8. Maj Copenhagen Climate Ministerialimi – ataatsimiinnermi ullunik marlunnik sivisussuseqartumi, COP30-mi novembarimi Brasiliami pisussamut silaannaap pissusaata allanngoriartornera pillugu isumaqatigiinninniarnerni siunnerfiliinissaq siunertaralugu Københavnimi kateripput.
Ataatsimiinnermi Isumaginninnermut, Suliffeqarnermut, Nunamut namminermut Avatangiisinullu Naalakkersuisoq Bentiaraq Ottosen inaarutaasumik oqalugiarpoq, oqalugiaamminilu silaannaap pissusaata allanngoriartornerata avannaanni Qaanaami piniartunut kujataannilu Narsaq Kujallermi savaatilinnut sunniutai oqaluttuarai.
Silaannaap pissusaata allanngoriartornerata sunnerpaatigut
- Sermersuaq – nunarsuup uummanaa – nukillaariartorpoq, aappoq nunarsuarlu tamakkerlugu immamik qaffatsitsivoq. Nuna qeriuaannartoq aappoq, taamaaliorneratalu attaveqaatigut qajannarsisippai. Kangiani anorersuit sakkortuut atuupput, avannaani sikuusarnera annikilliartorpoq, kitaani aalisarneq sunnerneqarpoq silalu kujataanilu sikorsuaqartarnera eqqoriaruminaallivoq. Silaannaap pissusaata allanngoriartornera nunatsinni assigiinngitsumik sunniivoq. Sumili tamani inuunerput atugassarititallu sunnerpai, Bentiaraq Ottosen ilaatigut oqarpoq.
Kalaallit Nunaat aaqqissusissat ilagaat, Bentiaraq Ottosen ilaatigut nunarsuarmi klimamut ministerinut siuttunullu oqalugiarnermini ilaatigut oqarpoq.
Assi: Trine Juncher Jørgensen
Nunarsuaq tamakkerlugu silaannaap pissusaa pillugu isumaqatiginninniarnerni nunap inoqqaavisa ataqqineqarlutillu akuutinneqarnissaat, Kalaallillu Nunaata Parisimi isumaqatigiissummut ilaasutut, tamatuma pinissaata qulakkeernissaanik sulissuteqarnissaa oqariartuutigaa.
Kalaallit piumasaat malillugit
- Kalaallit Nunaat nunarsuaq tamakkerlugu aaqqinnerup ilagaa annertooq. Nunap inoqqaavisa ilisimasaat, pinngortitami pisuussutivut iliuuseqarnissamullu piumassuseqarnerput, nunarsuarmi mingutsitsinngitsunut ikaarsaarnermut peqataaqataatilereerpaatigut, inissisimaffittalu ersarisarnissaa pingaaruteqarpoq.
- Tamanna tunngavissavut atorlugit, pisinnaatitaaffivut siunissarpullu ataqqillugit pivoq, taanna ilaatigut oqarpoq, kingornalu qanoq nunap inoqqaavisut silaannaap pissusaata allanngoriartorneranik misigisavut nunarsuarmioqatigiinnillu suut pisariaqartitatta takutinnissaa siunertaasimasoq Sermitsiamut erseqqissaavoq.
- Parisimi isumaqatigiissummut ilanngunnikuuvugut, maannalu nunatsinni ungasissumik sammititanik anguniakkavut, 2030-mi tunniunneqartussat suliaralugit aallartittussanngorpugut, Bentiaraq Ottosen oqarpoq, taannallu novembarimmi Brasiliami Bélemimi COP30-p ingerlanneqarnerani peqataassaaq, tassanilu nunarsuaq tamakkerlugu silaannaap pissusaata allanngoriartornerata kingunerisaanik nunap inoqqaavisa tatineqarneq misigisaat sammineqartussaavoq.
