Bidenip Trump Illorsuarmi Qaqortumi ataatsimeeqatigalugu pilluaqquaa

Kissarsuutaasaq ikumavoq  illorsuup qaqortup allaffiani ammaloqisaami, Donald Trump aamma Joe Biden ataatsimeeqatigiimmata ersersitsiniarmatalu pissaanerup eqqissisimasumik tunniunneqarnissaa pissasoq præsidentimut qinersinermi Trumpip ajugaareernerata kingorna.

Naapinnermi imminnut assammillutik neriorsuipput, pissaanerup nikinnissaani Bidenimit Trumpimut ajornartorsiutitaqanngitsumik ingerlanneqassasoq.

Taamak allaaserinnipput nutaarsiassaqartitsiviit AP aamma Reuters allapput.

- Tikilluarit, tikilluarillu maanga uterninni, Biden oqarpoq, siornatigut politikkikkut unammillertigisimasani tikilluaqqugamiuk.

Tamatumalu kingorna Bidenip Trump qinersinermi ajugaammat pilluaqquaa.

- Politikki sakkortuvoq, amerlasuutigullu politikkimik suliaqarnerup silarsuaa pitsaanngilaq. Kisianni ullumi silarsuaq pitsaaqaaq, tamannalu qutsatigaara, Trump akivoq.

Præsidentinngortussaq ilanngullugu oqarpoq, naalakkersuinermik tunniussineq "sapinngisamik aporaannertaqanngitsumik sapinngisaq tamaat atorlugu" ingerlanneqassasoq.

Trumpip Washington D.C.-mi siullermeerluni tikeraarnera novembarip tallimaani præsidentimut qinersinerup kingorna pivoq, Demokraterne sinnerlugit sassartumut Kamala Harrisimut ajugaareernermi kingorna.

Kamala Harris Demokraterne præsidentissatut qinigassanngortinneqannginnerani, Joe Bidenip partiip præsidentimut sassarteqqikkaluarpaa.

Juli qaammat qineqqusaarnermut peqataajunnaarpoq, ukiui pissutigalugit præsidentitut ukiuni sisamani ingerlaqqissinnaanissaminut piukkunnaateqannginneragaanera pillugu oqallinnerit annertusiartuinnartut pissutigineqarluni.

Trump aatsaat januaarip 20-ani 2025 præsidentitut atuuffeqalissaaq.

Ukiut sisamat matuma siornatigut Donald Trumpip Joe Bidenimut naalakkersuinermik tunniussisussaagaluarpoq, Bidenip 2020-mi præsidentimut qinersinermi ajugaareernermi kingorna.

Taamanikkut Trumpip qinersinermi inernerit akuerinngilai, taamaattumik ataatsimiinnissaagaluaq, soorlu maanna pingasunngornermi Det Hvide Husimi pisutut, ingerlanneqanngilaq.

Taamaakkaluartoq Trumpip tapersersortaasa Washington D.C.-mi Kongressimut saassussinerat pivoq januaarip 6-ani 2021, tassani unnerluutigineqarpoq qinersineq "tillitaasoq" oqaatigalugu.

Taamatut pisuutitsineq Trumpip nammineq arlaleriarluni oqaatigaa.

Tamatuma kingorna Trump peqatigiinniapiloqataasimasutut unnerluutigineqarpoq - tassunga ilanngullugu qinersinermi pinerluttuliortoqarsimaneraalluni salloqittaasimanini pillugu - 2020-mi præsidentimut qinersinermut atatillugu unnerluutigineqarpoq. Suliap ingerlanneqarnera piffissaligaanngitsumik kinguartinneqarpoq.