KL

DK

ULLOQ UNNUARLU NALUNAARUSIAQ

Biilinik tillitanik ajutoortoqartoq – akerliussutsimik takutitsinissat arlallit

Biili tillitaq Nuummi marlunngornermi ullaakkut ajutoorpoq. Taakkua saniatigut sumiiffinni arlalinni akerliussutsimik takutitsisoqassasoq politiit nalunaarfigineqarput

Thomas Munk Veirum
Tusagassiortoq
Saqqummersinneqarpoq

Pigaartut pisortaata Jeppe Andagerip pisut marluk marlunngornermi ullaakkut oqaluttuarai.

Qaanaami aalisakkanik suliffissuarmi tillinniartoqarsimasoq politiit ataasinngornerup ullaavani nalunaaqutaq 08.30 nalunaarfigineqarput. Tillinniat suliffissuarmi assannut bakteriaajaat tillissimavaat. Tillinniarneq ullaakkut paasineqartoq unnuallu ingerlanerani tillinniartoqarsimasinnaasoq pigaartut pisortaata erseqqissarpaa.

Biili Lyngby-Tårbæksvejimi kuussinermut nakkarsimasoq politiit marlunngornerup ullaavani nalunaaqutaq 06.26 aamma nalunaarfigineqarput.

Matuersaatit paarikkit

Nukappiaraq 16-inik ukiulik biilimik ingerlatsisutut pasineqartoq sumiiffimmi naapineqartoq pigaartut pisortaat oqarpoq.

Biili tillinneqarsimavoq, taamaammallu pigaartut pisortaat ima kajumissaarivoq:

- Piffissami kingullermi biilinik tillinniartoqaqattaarpoq. Biilit aallarunneqarsinnaannginnersut qulakkeerneqarluartarnissaat politiit innuttaasunut kajumissaarutigaat. Biilit paarnaarnissaat matuersaatillu eqqunnissaat eqqaamallugu, pigaartut pisortaat oqarpoq.

Matuersaat tiguneqariaannaasimanersut pigaartut pisortaata suli oqaatigisinnaanngilaa, pisunili allani taama pisoqartarsimavoq.

Akerliussutsimik takutitsinissat arlallit nalunaarutigineqartut

Marlunngornermi ualikkut illoqarfinni arlalinni akerliussutsimik takutitsisoqarnissaa nalunaarutigineqarsimasoq Jeppe Andsagerip ilanngullugu paasissutissiissutigaa. Angajoqqaatut piginnaasanut misissuutit Danmarkimi meeqqanik arsaarinninnermi nalilersuutigineqartartut akerliussutsimik takutitsiffigineqarniarput.

Akerliussutsimik takutitsisut angajoqqaat kalaallit nalilersorneqaraangata taakku atorneqartarunnaarnissaat piumasaraat. Akerliussutsimik takutitsinerit nalunaaqutaq 16.00 aallartissapput nalunaaqutarlu 17.00-17.30 akornanni naammassinissaat naatsorsuutigineqarlutik.

Akerliussutsimik takutitsinerit Qaqortumi, Nanortalimmi, Tasiilami, Narsami, Nuummi, Aasianni Ilulissanilu nalunaarutigineqarput.

Nuummi Katuap silataani akerliussutsimik takutitsisut aallassapput, 100-llu missaanniittut peqataanissaat naatsorsuutigineqarpoq.

inuiaqatigiit indbrud forældretest demonstrationer samfund qaanaaq jeppe andsager

ATORFIIT Se alle jobs

Powered by Labrador CMS