Blok 5-imi toqungasumik siumuisoqarneranut atatillugu angut toqutsisutut unnerluutigineqartoq
Nuummi blok 5-imi angummik toqungasumik siumuinermut atatillugu angut 25-nik ukiulik tigusarineqarpoq unnerluutigineqarlunilu.
Tallimanngormat blok 5-imi H.J. Rinksvejimi politiit amerlaqaat.
Assiliisoq: Leiff Josefsen
Angummik toqungasumik Nuummi blok 5-imi tallimanngormat siumuisoqarneranut atatillugu arfininngormat unnukkut angut 25-nik ukiulik tigusarineqarsimasoq politiit nalunaarput.
Angut 25-nik ukiulik tigusarineqarpoq toqutsisimasutullu unnerluutigineqarluni:
- Pisumi pisut politiillu misissuinerat tunngavigalugit angut 25-nik ukiulik arfininngormat unnukkut tigusarineqarpoq toqutsisimasutullu unnerluutigineqarluni. Taanna Sermersuup Eqqartuussivianut sapaatiummat oktobarip arfernani nalunaaqutaq 17.00 sassartinneqarpoq, politiit tusagassiuutinut nalunaarummi allapput.
Inatsisit tunngaviusut naapertorlugit killisiuineq matoqqasumik ingerlanneqarpoq, angullu 25-nik ukiulik ulluni 25-ni tigummigallagassanngortinneqarpoq.
Eqqartuussut Nunatta Eqqartuussisuuneqarfianut suliareqqitassanngortissimagaa politiit ilisimatitsipput.
- Misissuineq suli ingerlanneqarmat Kalaallit Nunaanni Politiit suliamut atatillugu maannakkorpiaq sukumiinerusumik paasissutissiisinnaanngillat, politiit allapput, sapaatip-akunneratallu siuliani innuttaasut blok 5-imi pasinartumik misigisaqarsimagunik takunnissimagunilluunniit politiinut saaffiginneqqullugit suli kajumissaarneqarput.
Politiit pigaartoqarfianut uunga sianersinnaavutit: 701448.
