KL

DK

Borgmesteri: Akileraarutinut akiitsut ima pilersimapput

Kommune Kujallermi borgmesteri, Stine Egede (IA), illoqarfinni assigiinngitsuni innuttaasunik ataatsimiisitseqqammerpoq, kommunip aningaasaqarnera akileraarutinullu akiitsut pillugit saqqummiilluni.

- Innuttaasut qanoq ililluni akileraarutinut A-nut akiliinissamut puiguisoqarsinnaaneranik apeqqutilliinnerat paasilluarsinnaavara. Innutaasunut ajuusaarnerarlungalu utoqqatsereerpunga aammattaaq siumut ingerlariaqqinnissarput kissaatigara assingusumillu pisoqaqqinnginnissaa qulakkeerusullugu. Aningaasaqarnermut Ataatsimiititaliaq maannakkut akileraarutinik akiliisarneq pillugu ingerlaavartumik ilisimatinneqartarpoq. Tamakkiisumik akisussaaffik tigunikuuara, borgmesteri Stine Egede oqarpoq.
Thomas Munk Veirum
Tusagassiortoq
Saqqummersinneqarpoq

Juunip naanerani Kommune Kujalliup akileraarutit A-t 40 millionit koruunit missaat akilersimanngikkai paasineqarmat tupaallaatigineqarpoq. Aningaasat akiliutaasussat kommunip karsiani aamma uninngasuutigineqarsimanngitsut paasineqarpoq, kommunilu kassekreditimut akiitsuni 100 mio. kr.-nik ilasariaqalersimavai.

Kommuni nittartakkamini allappoq borgmesteri Nanortalimmi, Qaqortumi Narsamilu akileraarutinut akiitsut pillugit aningaasallu sumut atorneqarsimaneri pillugit innuttaasunik ataatsimiisitsisimasoq.

Borgmesteri naapertorlugu akileraarutit A-t akilerneqanngitsoorsimapput akileraarutinik akiliinermut tunngatillugu kukkusoqarsimanera akileraarutinillu tunniussinermut tunngatillugu naammattumik tunniussisoqarsimannginnera pissutaallutik.

Ineqarnermut isumaginninnermullu atorneqartarput

Soormiuna aningaasat kommunep karsianiinngitsut?

Borgmesterip erseqqissarpaa tamanna ilaatigut kommunip inissiaatileqatigiiffiani maanna atorunnaarsinneqarsimasumi Kujallermi Illuutini inissianut akiliutaasimasoq 30 millioner koruunit sinnerlugit amerlassuseqarnerisigut pissutaasoq.

Borgmesteri oqarpoq kommunip aningaasaatai ilungersunartumut inississappata, ajornannginnerpaamik inissiat taarsigassarsiffigineqarnissaat sulissutigineqassasoq.

INI A/S aqqutigalugu inissianik attartornermut aningaasaliissutinik pissarsiat INI A/S-mut utertinneqarlutik, inissianik pitsaanerusumik aserfallatsaaliisoqarniassammat. Tamatuma saniatigut isumaginnittoqarfimmi 2023-mi atuinerusoqarnera peqqutaaqataavoq 2024-mi aamma atuisoqanerunissaa naatsorsuutigineqarluni.

Aningaasaqarnerup ajunnginnerulernissaa pillugu naalakkersuisut oqaloqatigineqartut

- Akiligassanik nutaanngitsunik akiliinerit, kontomiit ulloq unnuarlu paarsivinnut akiligutigineqartartunut akiliinerit kiisalu siunnersortinut avataaneersunut aningaasartuutit kommunip aningaasaqarnerata ilungersunartorsiorneranut ilaatigut peqqutaaqataasuupput, Kommune Kujalleq nittartakkamini allappoq.

Borgmesteri aamma oqaluttuarpoq ukiumut aningaasat atugassanngortinneqartut malinniarlugit ingerlatsivinni annertuumik suliniuteqartoqartoq, kukkunersiuisoq suleqatigalugu kommunip iluarseeqqinnissamut pilersaarutaa suliarineqarpoq Namminersorlutik Oqartussanullu taarsigassarsiniarluni qinnuteqaasiortitsisoqarluni.

Aningaasanut inatsisissatut siunnersuut saqqummiunneqaqqammersoq naapertorlugu Naalakkersuisut kommunip aningaasaqarnerata qanoq innera ’nalorninartorsiornerarpaat’:

- Kommunip aningaasaqarneranik aqutsinerup iluarsineqarnissaanut tunngatillugu Naalakkersuisut kommuni qanimut oqaloqatigaat. Oqaloqatigiinnerup ilaatigut siunertaraa ukiunut naatsorsuusiorfiusunut arlalinnut siusinnerusunut, kisianni suli naammassineqanngitsunut, kommunip naatsorsuutaanik suliaqarnerup siuarsarnissaa, Naalakkersuisut aningaasanut inatsisissatut siunnersuummi allapput.

samfund kommune kujalleq inuiaqatigiit økonomisk krise boligselskab kujallermi illuutit a-skatter naalakkersuisut

ATORFIIT Se alle jobs

Powered by Labrador CMS