Borgmesteri: - Politiit illoqarfimmi takussaanerunissaat kissaatigaarput
Qeqqata Kommuniani borgmesterip Malik Berthelsenip (S) Sisimiuni politiit takussaanerulernissaat kissaatigaa. Kalaallit Nunaanni Politiinut ammasumik allakkiamini allappoq sapaatip-akunnerisa naanerini unnuakkut eqqissiviilliortoqartarlunilu nakuusertoqartarmat, innuttaasut toqqissisimanissaat eqqarsaatigalugu politiit illoqarfimmi takussaanerulertariaqarnerat pingaaruteqarluinnarnerarpaa.
Qeqqata Kommuniata borgmesteria, Malik Berthelsen (S).
Leiff Josefsen
- Sapaatip-akunnerisa naanerini politiit unnuakkut angalaartunik pigaartoqarneq ajortut aatsaallu pinartoqarneranik saaffiginnittoqaraangat pigaartuusut angerlarsimaffimminnit orniguttartut paasitinneqarnikuuvugut.
- Pissutsit taamaalisimanerat assorujussuaq ernumanarlunilu toqqissisimananngitsoq isumaqarpugut, Qeqqata Kommuniani borgmesteri, Malik Berthelsen, Kalaallit Nunaanni Politiinut ammasumik allakkiamini allappoq.
Suna pissutaava?
Sapaatip-akunnerata naanerini illoqarfimmi politiit takussaannginnerat pissutigalugu borgmesteri ima aperivoq:
- Tamatumunnga Sisimiuni politiit ikippallaarnerat pissutaava? Taamaassimappat amerlineqarnissaat sulissutigineqarpa?
Qanittukkut GUX-imi ilinniartoq 16-inik ukiulik sakkortuumik saassunneqarami Danmarkimi Rigshospitalimut aallarunneqarpoq.
- Taamaattumik innuttaasut toqqissillutik misigisimanissaannut politiit takussaanerunissaat pingaarutilerujussuullunilu pisariaqaraluartoq isumaqarpugut, ingammik akissarsiffinni annerusuni, borgmesteri Malik Berthelsen allappoq.
Sisimiunili politiit aammalu lokalrådit akornanni pitsaasumik suleqatigiittoqartoq illoqarfiullu toqqissisimanartuunissaa tamanit pingaartinneqartoq, borgmesterip Malik Berthelsenip erseqqissarpaa.
