Borgmesteri umimmannik pisassiissutit pillugit: Kukkuneruvoq
Aalisarnermut Piniarnermullu Naalakkersuisoqarfiup Nanortallip kangiani umimmannik pingasuinnarnik pisassiissutiginninnera Kommune Kujallermi borgmesterip Stine Egedep naammaginngilluinnarpaa. Pingasoriaammik amerlanerunissaat borgmesterip kissaatigaa.
Assi toqqorsivimmit
Leiff Josefsen
Nanortallip kangiani umimmaat pingasuinnaat pisarineqarsinnaanerat Stine Egedep tupigusuutigaa, sumiiffimmimi 149-t pisarineqarsinnaanerinik marsimi kisitsineq takutitsimmat.
- Kisitsereernerup kingorna Pinngortitaleriffiup nalunaarusiornermini inassutigaa angutivissat arnavissallu tamarmik immikkut tallimat pisarineqarsinnaasut, tassa 2024-imi katillugit qulit pisarineqarnissaat Pinngortitaleriffimmit inassutigineqarpoq, Kujataani borgmesteri tusagassiuutinut nalunaarummi allappoq.
- Sooq Naalakkersuisoqarfimmit umimmaat pingasuinnaat pisarineqartussatut aalajangiunneqarsimanersut uagutsinnut paasiuminaannerpaavoq, naak 2024-mi angutivissat arfineq-marluk arnavissallu tallimat pisarineqarnissaat Pinngortitaleriffimmit inassutigineqaraluartoq kommunilu innersuussigaluartoq, borgmesteri oqarpoq, taassumalu Aalisarnermut Piniarnermullu Naalakkersuisoq Kim Kielsen aalajangiinerminik allanngortitseqqullugu pisassallu amerleqqullugit kajumissaarpaa.
Sikorsuit inuuniarnermik ajornartorsiortitsipput
Ukioq manna aalisartut piniartullu ukiup affaa sikorsuarnit ajornartorsiortitaallutik inuuniarnerat assorsuaq ilungersornartorsiorfiusoq, "taamaattumik allatigut isertaqarnissartik pisariaqartilluinnaraat", Stine Egedep tikkuarpaa.
Ukioq manna Nanortalimmi piniartut ilaatigut piaraq siornalisaq immami toqungalluni puttasoq naammattoorsimagaat tusagassiuutinut nalunaarummi innersuussutaavoq. Ilanngullugu angutivissat amerlaneri nalunaarutigisimavaat, tamannalu aamma ukioq kisitsinermi takuneqarsinnaasimavoq.
