Borgmesteriusimasoq sulinngiffeqarnissamik qinnuteqartoq

Avannaata Kommuniani kommunalbestyrelsimut qinigaaqqammersut siullermeerluni pingasunngorpat inissitsiterlutik ataatsimiissapput.

Apriilip aallaqqaataani kommunimut qinersisoqareernerata kingorna, kommunalbestyrelsimi Siumut Nalerarlu suleqatigiinnissamik isumaqatigiissuteqarmata Siumumeersoq Lars Erik Gabrielsen borgmesterinngortussanngorpoq.

Partiit taakku marluk kommunalbestyrelsimi amerlanerussuteqarput.

Borgmesteritut tunuartussanngortoq Palle Jerimiassen (D) kommunalbestyrelsimut qinigaaqqippoq, inissitsiternermulli atatillugu ataatsimiinnissamut oqaluuserisassani kommunalbestyrelsimit sulinngiffeqarnissamik qinnuteqartoq atuarneqarsinnaavoq.

Palle Jerimiassenip sulinngiffeqarusunnini sivisuumik napparsimanini peqqissutsimigullu misissorneqarnini pissutigalugit tunngavilersuutigaa.

2026-mi maajip aallaqqaataata tungaanut sulinngiffeqarnissani qinnuteqaatigaa, sinniisuusorlu Niels-Erik Bro (D) ilaasortanngussalluni.

Kommunalbestyrelsip ataatsimiinnera siulleq Avannaata Kommuniani immikkut malunnartissallugu aaqqissuussisoqarpoq. Ilulissani innuttaasunut tamanut kaffillertoqarlunilu ulloq taanna appisimaartoqassalluni.

Kaffillerneq Sermermiuni pingasunngornermi maajip arfineq-aappaani ulloqeqqaniit aallartissaaq, tassanilu Ilulissani innuttaasut kommunalbestyrelsimut ilaasortanngortut naapissinnaassallugit.