Borgmesteriusimasut pisortarisimasaminnut peqquserluttuliortutut unnerluunneqartumut ilisimannittutut apersorneqartut

Lars-Emil Johansenip aamma Lars Møller-Sørensenip eqqartuunneqarnerisa ulluisa aappaanni Kommuneqarfik Sermersuumi borgmesteriusimasoq Asii Chemnitz Narup ilisimannittutut apersorneqarpoq.

Lars Møller-Sørensen aamma Lars-Emil Johansen peqquserluttuliorsimasutut unnerluutigineqarput. Lars Emil-Johansen siunnersortitut ukiuni marlunni Kommuneqarfik Sermersuumit 730.000 koruuninik aningaasarsisimavoq. Naak suliassanik naammassisaqarsimanani.

Asii Chemnitz Narupip borgmesteriunerani Lars Møller-Sørensen kommunaldirektøriuvoq. IA-mi politikkeri borgmesteritut juunimi 2019-imi tunuarpoq, aatsaallu ukiup ingerlanerani – oktobarimi 2019-imi – Lars Møller-Sørensen Lars-Emil Johansenimut siunnersortitut isumaqatigiissusiorpoq.

Asii Chemnitz Narupip politiinit misissuinermut atatillugu apersorneqarami siunnersortiunissamut isumaqatigiissut paasisimallugu marlunngornermi eqqartuussivimmi oqaatigaa.

Unnerluussisup Bo Bjerregaardip killisiuinermit nalunaarusiami immikkoortoq Asii Chemnitz Narupip ima oqaaseqarfigisaa atuarpaa: "Kofoeds Skolep nutaap sananeqarneranut atatillugu killisiorneqartup isumaa naapertorlugu politikeriusimasumik, soorlu Lars Emil Johansenimik, suliassamut tamatumunnga atuisoqanngisaannassaaq.“

Unnerluussisup Bo Bjerregaardip oqaatiginikuusaa itisileqquaa:

- Politikeriusimasunut taamatut suliakkiisoqarsimaneranik tusarsimanngilanga. Tamanna uannut nutaajuvoq. Oqaatigisakka taama isigineqassapput, Asii Chemnitz Narup oqarpoq.

Illersuisoq: Politikeriusimasut tulluanngillat?

Unnerluussisoq: Lars-Emil Johansen siunnersortitut atorfinitsissagaluarpiuk?

Asii Chemnitz Narup: - Ilimananngilluinnarpoq. Juulip 19-iani suliunnaarpunga, atorfinitsitsinerlu tamanna kingorna pivoq, Asii Chemnitz Narup eqqartuussivimmi oqarpoq, kingornalu erseqqissarpaa juunimi 2019-imi borgmesteriujunnaarsimalluni.

Ataasinngornermi eqqartuussinerup ulluani siullermi Lars-Møller Sørensenip aamma Lars-Emil Johansenip siunnersuisutut isumaqatigiissut, Lars-Emil Johansenip Tasiilami Kofoeds Skolep pilersinnissaanut kommunimut ikiuutaanissaanik isumaqatigiissut, illersorpaat.

Lars-Emil t illersuisua Ulrik Blidorf unnerluussisup apersuereernerata kingorna Asii Chemnitz Narupimut apeqquteqarpoq.

Ulrik Blidorf: Politikeriusimasut siunnersortitut tulluartutut isiginngilatit?

Asii Chemnitz Narup: - Misilittakkakka aallaavigalugit apeqqut akivara.

Borgmesteriusimasoq alla ilisimannittutut aamma apersorneqartoq

Asii Chemnitz Narupip kingorna borgmesteriusimasoq alla, Charlotte Ludvigsen, ilisimannittutut apersorneqarpoq.

Asii Chemnitz Narup taarserlugu borgmesterinngorpoq Lars-Emil Johansenimullu isumaqatigiissusiortoqarnerata nalaani borgmesteriulluni.

Borgmesteriunermini Lars-Emil Johansen Lars-Møller Sørensenip allaffiani arlaleriarluni takusimallugu nassuiaavoq.

- Lars-Møller Sørensen aperaara Lars-Emil Johansen sulerinersoq. Tasiilami Kofoeds Skoletaarnissaanut atatillugu tassaniittoq paasivara, borgmesteriusimasoq nassuiaavoq.

Kommunip Tasiilami Kofoeds Skolemik pilersitsinissaq tapersersorneranut nalunaarut nassiussimagaa unnerluussisup eqikkarlugu eqqaavaa. Kommunili suliap suliarineranut akuunersoq unnerluussisoq Bo Bjerregaard aperaaq. Nalunaarummi kommunip suliatigut ikiuussinnaanersoq allaqqasoqarpa, aperaaq:

Charlotte Ludvigsen: Naamik.

Borgmesteriusimasoq aamma illersuisumit Ulrik Blidorfimit apersorneqarpoq, tassanilu kommunip tapersersuinermik nalunaaruteqarniarluni suliaqarnermi qanoq pisoqarsimanersoq ilisimanagu ilaatigut oqarpoq.