USA-p Kalaallit Nunaannut soqutiginninnera ingatsikkaluttuinnarpoq, tassa kilitsissialersuinialersaartoqarpoq. Amerikamiut aviisiat Wall Street Journal allappoq.
Qallunaat kalaallillu politikikkut suliaqartut taama pinialersaartoqarnera isumakuluutigaat. Nunanut allanut sillimaniarnermullu ataatsimiititaliami siulittaasup tulliata Pele Brobergip (N) nutaarsiassaq aamma ilungersunartutut isigaa.
USA-p Kalaallit Nunaannut soqutiginninnera ingatsikkaluttuinnarpoq, tassa kilitsissialersuinialersaartoqarpoq. Amerikamiut aviisiat Wall Street Journal allappoq.
Qallunaat kalaallillu politikikkut suliaqartut taama pinialersaartoqarnera isumakuluutigaat. Nunanut allanut sillimaniarnermullu ataatsimiititaliami siulittaasup tulliata Pele Brobergip (N) nutaarsiassaq aamma ilungersunartutut isigaa.
USA-mit iliuuserineqartut Danmarkip Kalaallit Nunaat oqartussaaffigilerniarneranut assigusut taanna isumaqarpoq.
- USA-p qallunaat iliorsimanerattut iliorniarnera isumassarsiatsialaanngilaq, oqarpoq.
Namminiilivinnissamik suliniutit amerikamiullu pisuussutinik piiaasinnaanerannik qanoq isumaqartoqarnersoq paasiniarlugit USA-mi atorfilittat isertortumik paasiniaasartut Kalaallit Nunaanni kilitsissiaqalernissamik qinnutigisimagaat Wall Street Journal allappoq.
Tamanna pisariaqanngitsoq Pele Broberg isumaqarpoq. Naleqqami siulittaasutut Kalaallit Nunaanni namminiilivinnissaq anguniarlugu suliat paasissutissiinissamik tunuarsimanngilaq.
Ernumassutissaqarnissamik pissutissaqarluartoq
Taamaattumik USA-mit kilitsissiaqarusunneq paasisinnaanngilaa.
- Danmarkip Kalaallit Nunaannut sunniiniarnikuunera, nunallu tiguarnissaa anguniarlugu kilitsissiaqarnikuunera USA-mit aamma iliuuseriniarneqarnera eqqumiittoq isumaqarpunga, oqarpoq.
Ernumassutigineqartariaqartoq isumaqarpit?
- Aap, Danmarkip iliuuserisimasai eqqarsaatigalugit ernummatigissallugu pissutissaqarluarpoq. USA-mut tunngatillugu USA-mik illersuisussatut inunngortitaanngilanga. Politikikkut namminiilivinnissaq sulissutiginiarlugu inunngorpunga, Danmarkimit tiguagaanikuuneq akiorniarlugu.
Danmarkimi partiit arlallit USA-p nunami naalagaaffeqatigisami kilitsissiaqarniartoqarnera uissuumissutigaat, nunanullu allanut ministerip Lars Løkke Rasmussenip (Moderaterne) Amerikamiut aallartitaat tamanna pillugu ataatsimeeqatiseraa.
- Aviisimi allaaserisaq ilumoornersoq naluara, taamatulli oqaaseqartut akerliliigaannginnerat ernumassutigaara, Lars Løkke Rasmussen Ritzauimut oqarpoq.
Pisinnaatitaanngitsut
Kalaallit qallunaallu politikeriisa Amerikamiut Nuummi aallartitaqarfiat matunissaa eqqarsaatigisariaqaraat Nunanut allanut sillimaniarnermullu ataatsimiititaliami siulittaasup Pipaluk Lyngep (IA) DR-imut oqaatigaa.
- Apeqqut taanna kalaallit danskillu politikeriisa ataatsimiissutigisariaqaraat isumaqarpunga, DR-imut oqarpoq.
Pele Brobergili naapertorlugu nunanut allanut sillimaniarnermullu ataatsimiititaliaq iliuuseqarsinnaanngilaq.
- Kalaallit Nunaat Danmarkip pigimmagu ataatsimiititaliami aallartitaqarfiit, konsulateqarfiit assigisaallu pillugit aalajangiisinnaatitaanngilagut. Danskit naalagaaffiata killeqarfiata iluaniippat taakku akisussaaffigaat, Kalaallit Nunaanniinngitsoq.
- Taamaattumik aallartitaqarfiit assigisaallu matusariaqarnerat eqqartorneqaraangat, naalagaaffiit pissaanillit politikiannik nunarsuullu sinnerani isumannaallisaanermik politikimik paasinninnginnermit pissuteqartarpoq.
Kalaallit Nunaalli taamaalluni namminersulivikkuni Naalagaaffiit Peqatigiinni ilaasortanngornissamik qinnuteqassagaluarpat akornutaasinnaaneranik kinguneqarsinnaanera eqqarsaatigalugu nunanik soorlu USA-tut ittunik oqaloqateqarnerup unitsinnissaa pisariaqanngitsoq taanna isumaqarpoq.
