Cannabis inuusuttunut ilinniarfinni siaruaassimasoq
Kalaallit Nunaanni inuusuttut ilinniagaqartut akornanni cannabis siaruaassimasoq, ataatsimuualaarnermilu atorneqartartoq Cannabisip inerteqqutaajunnaarsinneqarnerata iluaqutissartai ajoqutissartaalu pillugit Innuttaasut Peqqissusiannik Ilisimatusarfiup nalunaarusiaani allaaserineqarpoq. Inuusuttut cannabisimik isiginnittaasiat atuinerallu ilagisartagaannit sunnerneqarujussuartartut misissuinerup takutippaa.
Gabrielle Lurie/Ritzau Scanpix
Cannabis siaruaqqasoq amerlanertigullu katerisimaarnermi atorneqartartoq inuusuttut ilinniarnertuunngorniarfiini 2024-mi immersuititsilluni apersuinerup takutippaa.
Inuusuttut amerlanerit ikinngutit internetikkulluunniit attaveqaatit aqqutigalugit cannabis pillugu paasisaqartarsimapput, aamma inuusuttut cannabisimik atuinerat ilagisartagaallu imminnut atassuteqarluinnartut misissuinermi paasineqarpoq.
Ilinniartoq eqimattanut cannabisimik atuisartunut ilaaguni nammineq taannatortalernissaa ilimanarnerusarpoq:
- Amerlanerit ikinngutit internettikkullu cannabis pillugu paasisaqartarsimapput. Atuartut cannabisimut isiginnittaasiat ikinngutaasalu qanoq atortarneraat imminnut atassuteqartut misissuinerup takutippaa. Ilinniartoq cannabisitortartunik ilagisaqataruni nammineerluni taamma pisalernissaa ilimanaateqarnerusarpoq, cannabis pillugu aallaaserisami allassimavoq.
Kalaallit Nunaanni inuusuttut ilinniarfiini ilinniartut akornanni cannabis nalinginnaasoq, aammali katerisimaarnermi atorneqartartoq, misissuinerup takutippaa.
- Pitsaartumik pinaveersaartitsinermik ineriartortitsinissamut inuusuttut peqataatinnissaat pingaaruteqarpoq, tassani cannabisimik atuineq ataatsimuualaarnermi atorneqartarnera iluamik paasineqarsinnaammat. Tamatuma saniatigut ilinniarfeqarfiit allanngueqataasinnaammata ukkatarinissaat iluaqutaasinnaavoq, allassimavoq.
