Nuersagaq naalungiarsummut qipeerassaq issiaveeqqap qaaniippoq. Naalungiarsunnulli qipeeraq Ivanallu naava eqqaassaanngikkaanni, inissiami qaamasumi nutaami sisamanik initalimmik Hedehusenemiittumi ilaqutariit meerartaarnissaannut takussutissaqanngilaq. Ivanap naalungiarsuup siniffissaa, qamutissai atisaarassaalu angajoqqaarsianngortussanut aaqqusimavai.
Ivana Nikoline Brønlundip panini ernereernermi kingorna angerlaassinnaanngilaa. Ivana ernereerpat nalunaaquttap-akunnera ataaseq qaangiuppat pinngitsaaliissummik arsaarneqassasoq Høje-Taastrup Kommunemi juulip 17-ianni ataatsimiinnermi inaarutaasumik aalajangerneqarpoq. Angajoqqaat piginnaaneri pillugit misissuineq, ilaatigut tarnip pissusaanik misissuineq, tunngavigalugit taamatut aalajangertoqarpoq.
Nuersagaq naalungiarsummut qipeerassaq issiaveeqqap qaaniippoq. Naalungiarsunnulli qipeeraq Ivanallu naava eqqaassaanngikkaanni, inissiami qaamasumi nutaami sisamanik initalimmik Hedehusenemiittumi ilaqutariit meerartaarnissaannut takussutissaqanngilaq. Ivanap naalungiarsuup siniffissaa, qamutissai atisaarassaalu angajoqqaarsianngortussanut aaqqusimavai.
NUUMMI AKERLIUSSUTSIMIK TAKUTITSINEQ
Ivanap pinngitsaalineqarluni qitornaminik arsaagaaneranut akerliussutsimik takutitsineq Inatsisartut ataatsimiittarfiata silataani marlunngornermi augustip 12-iani nal. 12.45-14.15 pissaaq.
Folketingimi Kalaallit Nunaat pillugu ataatsimiititaliap tikeraarnerani akerliussutsimik takutitsinissaq pilersaarutaavoq.
Ivana Nikoline Brønlundip panini ernereernermi kingorna angerlaassinnaanngilaa. Ivana ernereerpat nalunaaquttap-akunnera ataaseq qaangiuppat pinngitsaaliissummik arsaarneqassasoq Høje-Taastrup Kommunemi juulip 17-ianni ataatsimiinnermi inaarutaasumik aalajangerneqarpoq. Angajoqqaat piginnaaneri pillugit misissuineq, ilaatigut tarnip pissusaanik misissuineq, tunngavigalugit taamatut aalajangertoqarpoq.
Kalaaliusutut
taaneqarsinnaanngitsoq
VISO-mi immikkoortortaqarfik immikkut ittoq kalaallit kulturiannik oqaasiinillu immikkut ilisimasaqarfiusoq Høje-Taastrup Kommunimit peqataatinneqanngitsoq ilaqutariit oqarput, naak inatsit maajip aallaqqaataani atuutilersoq naapertorlugu ilaqutariit kalaallit meerartaannik angerlarsimaffiup avataanut inissiiniarnermi suliani taamaaliortussaatitaagaluartut.
Ivana Nikoline Brønlundip anaanaatalu Gitte Brønlundip oqarnerattut Ivanap Danmarkimi peroriartornikuunera qallunaallu atuarfianni atuartuunikuunera ataatsimiinnermi tunngavilersuutaavoq, taamaattumillu suliami VISO peqataatinneqarnissaanut pisinnaatitaanani.
– Ivanali kalaaliuvoq. Nuummi inunngorpoq angajoqqaavilu tamarmik kalaaliupput. Uanga aamma kalaaliuvunga, anaanaq qitornavissialik Gitte Brønlund, Qullissani inunngortoq ukiorpassuarnilu Nuummi najugaqartoq, oqarpoq.
Gittep Nuummi najugaqarnermini Ivanap aqqalua Minik aamma qitornavissiartaaraa.
Inatsisip allaqqanera
Allatut oqaatigalugu ilaqutariit kalaaliupput, Ivanalu qallunaatut pingaarnertut oqalukkaluarluni kalaallit qeqqanni kalaallit oqaasii atorlugit peroriartorpoq. Ilaqutariimmi meerartatik suli atualinngitsut Danmarkimut nuunnikuupput.
Inatsimmi maajip aallaqqaataani atuutilersumi allassimavoq: "suliani meeraq, inuusuttoq, angajoqqaanngortussaq imaluunniit angajoqqaatut oqartussaassusilik Kalaallit Nunaanni inunngorsimappat peroriartorsimappalluunniit imaluunniit kalaallit oqaasiinut, kulturiannut naleqartitaannullu qanimut attuumassuteqartutut nalilerneqarpat atuuppoq".
Ivana Nikoline Brønlundip arni Gitte Brønlund aqqalunilu Minik Københavnip eqqaani Hedehusenemi najugaqatigai.
Assi: Trine Juncher Jørgensen
Aamma "inuit ilaqutariilluunniit namminneq attaveqarnerminnik qanoq nassuiaanerat misigissusaallu pingaartinneqassasut" allassimavoq.
Ilaqutariit
Gitte Brønlund angajoqqaarsiaasinnaasutut akuerineqarnikuuvoq, aamma Ivanamut Minimmullu anaananngortinnani akuerineqarnissamik suliamik ingerlataqartarsimavoq. Ivanalli anaananngornerani tapersersornissaanut naleqqutinngitsutut tarnip pissusaanik ilisimasalimmit aamma nalilerneqarpoq.
Gitte Brønlund naapertorlugu tarnip pissusaanik ilisimasallip Gitte pulaarlugu minutsit qulit 15-illu akornanni atorlugit apersorpaa. Gittellu nalilersorneqarluni apersorneqarluni ilisimasimanngilaa.
Aammattaaq Gittep ernuttani angajoqqaarsiaaffigilissagaluaruniuk Ivana illoqatiginagulu pulaartartussaassanngitsoq naatsorsuutigissagaa paasitinneqarpoq.
- Akuerisinnaanngilluinnarpara. Ivanami panigaara najugaqatigalugulu, Gitte Brønlund oqarpoq.
- Qitornannut anaanaalluarsinnaallunga takutikkusuppara, Ivana Nikoline Brønlund oqarpoq. Taassuma Høje-Taastrupip kommunianut anaanaanut meeqqanullu angerlarsimaffimmut inissinneqarnissani siunnersuutigigaluarpaa kommunimiilli itigartinneqarluni.
Assi: Trine Juncher Jørgensen
Atornerluinermut tunngatillugu suliaq
Ivana Nikoline Brønlundip anaanatut naleqqutinngitsutut nalilerneqarneranut pissutaasoq tassaavoq Ivanap siornatigut inuunerani pisimasut. Ivanami ukiorpassuarni peqqarniitsumik atornerlunneqartarnikuuvoq, taassumalu nammineerluni angut atornerluisoq unnerluutiginikuullugu.
Atornerlugaasarnera sioorasaarinerit pinngitsaaliinerillu aqqutigalugit isertugaavoq, taamaammallu Ivanap arnaata allalluunniit ilisimanikuunagit. Atornerluisartup iliuutsini 2022-mi nassuerutigai maannalu paarnaarussivimmiillu.
-
Ivanap meeraanermini misigisai oqaqqunagulu sioorasaarneqartarnera
amiilaarnarluinnarput. Qanoq pisoqartarsimanera tamatta quarsaarutigaarput, Gitte Brønlund oqarpoq.
Ivana ilassuteqarpoq: - Anaanama qanoq pisoqartarnersoq nalugamiuk illersorsinnaasimanngilaanga. Taamaattoqartarsinnaaneralu takorloorsimanngisaannarlugu.
– Tarnilli pissusaanik ilisimasalik isumaqarpoq paniga suli inuunngitsoq piaaralunga sumiginnassagiga, aammalu atornerlugaasarnikuunerma kingunerisaannik naalliuuteqarlungalu PTSD-qartunga. Ineriartornissanilli periarfissaqartunga tarnip pissusaanik ilisimasalik aamma isumaqarpoq, qaammatinilu marlunni affarmilu oqaloqatigisarnerani ineriartorsimanera takusinnaallugu, Ivana oqaluttuarpoq, taassumalu paasisinnaanngilaa sooq anaanaasinnaanerminik takutitsinissaminik periarfissinneqannginnini. Assersuutigalugu anaananut meeqqanullu angerlarsimaffimmiitinneqarluni.
- Nalunngilara aqqusaagarisimasakka ajortuusut uannut iluaqutaanngitsut. Inuttulli isigineqartutut misiginngilanga.
Gitte ilaliivoq: - Taamaattumik kommunip imaluunniit Isumaginninnermut Naammagittaalliuuteqartarfiup erninermi pinngitsaaliissummik arsaarinninnissamik aalajangerneq allanngortillugu anaanamut meeqqamullu angerlarsimaffimmiittussanngortitsissasut neriuutigaarput. Panima anaananngornerani sapinngisakka tamaasa atorlugit tapersersussavara.
Suliap ingerlarnga aalassassutigigaa
Peqatigiiffimmi MAPI-mi siulittaasuusimasup Laila Berthelsenip Ivana Nikoline Brønlundimut suliamut tunngasut tamaasa takusimavai, kommunillu soorlu Høje-Taastrupitut ittut tarnip pissusaanik misissuutit kalaallit meerartaannik pinngitsaaliissummik arsaarinninnermi suli atortaraat aalassassutigaa.
– Arlalinnik pissuteqartumik akuerineqarsinnaanngilaq. Siullertut suliami kukkusoqarsimaqaaq. Kommunip inatsit nutaaq naapertorlugu VISO-p suleqataanissaanut pisussaaffitsik naammassinngilaa. Tamatuma saniatigut pinngitsaaliissummik arsaarinninneq Ivanap meeraanermini atornerlunneqartarsimanera pissutigalugu meeqqaminik isumaginnissinnaanngitsutut nalilerneqarpoq. Tamatigulli taamaattoqarneq ajorpoq. Ivana atornerlunneqartarsimanerminut pisuussuteqanngilaq, aqqusaarsimasamilu suliarinissaanut ikiorneqartariaqarpoq. Meeraanik arsaarneratigut qaavatigut artorsaatissaanik tuniorarnagu. Ivana arnamini qatanngutinilu aamma najugaqarput, taakkulu meeqqamik perorsaanermi tapersersuissapput, kalaallimmi ilaqutariit taamaattarput, Laila Bertelsen oqarpoq. Taassumalu sapaatip akunnerani tullermi Danmarkimi Kalaallillu Nunaanni danskit naalakkersuisuinut akerliussutsimik takutitsisoqaqqullugu kaammattuutigaa. Ilaqutariit sinnerlugit Kalaallit Nunaat pillugu ataatsimiititaliamut, Isumaginninnermut ataatsimiititaliamut VISO-mullu naammagittaalliuutinik arlaleriarluni aamma nassiussisimalluni.
Suliaq oqaaseqarfigisinnaanngikkaat
Sermitsiap Høje-Taastrup Kommune inatsit nutaaq tunngavigalugu ilaqutariinnik kalaallinut tunngassutilinnik suliaqarnerminni VISO-p ataaniittoq immikkoortortaqarfik peqataatittussaallugu pisussaaffeqarnertik ilisimaneraat aperaa. Ivana Nikoline Brønlundimut suliami VISO aamma ilanngunneqarsimanersoq kommunimut apeqqutigaarput.
Pernille Kjeldgård, Høje-Taastrup Kommunemi Ilaqutariinnut Ullukkullu Paaqqinnittarfinni pisortaq, Sermitsiamut allakkatigut ima akissuteqarpoq:
"Pisoq aalajangersimasoq alianartoq oqaaseqarfigisinnaanngilarput, inunnut arlalinnut tunngassuteqarnera pissutigalugu nipangersimasussaatitaagatta. Ataatsimulli isigalugu inatsisitigut pisussaaffivut ilisimavagut, VISO-mut aamma tunngatillugu".
Ivana Nikoline Brønlund Hvidovrep napparsimaviani ataasinngormat augustip aqqarngani erniuvoq. Pania Aviaja-Luuna inunngoniariartoq arsaarinnissutigalugu angajoqqaarsiassaanut tunniunneqarpoq.
