ANGERLARSIMAFFINNIIT PEERSISARNERIT
Danmarkimi kalaallinut misissuisarnerit unitsinneqassapput
Danmarkimi kalaallit ilaqutariit kulturimut tulluarsarneqanngitsunik, angajoqqaatut piukkunnaateqarnermut misissuisarnerit unitsinneqassasut, Danmarkimi Isumaginninnermut Ineqarnermullu ministeri Sophie Hæstorp Andersen, Naalakkersuisoq Aqqaluaq B. Egede ataatsimeeqatigereerlugu neriorsuivoq.
Danskit Isumaginninnermut Ineqarnermullu Naalakkersuisuata ataatsimeeqatigereernerata kingorna, neriorsorpaanga – Danmarkimi kommuninut allakkianik nassiussuisoqassasoq, kalaallit ilaqutariit akornanni taamak misissuisarnerit unitsinneqarnissaannik oqariartuutitalimmik, Meeqqanut Inuusuttunullu Naalakkersuisup Aqqaluaq B. Egede oqarpoq.
Leiff Josefsen
Danmarkimi Isumaginninnermut Ineqarnermullu ministeri Sophie Hæstorp Andersen neriorsuivoq, Danmarkimi kalaallit ilaqutariit kulturimut tulluarsarneqanngitsunik, angajoqqaatut piukkunnaateqarnermut misissuisarnerit unitsinneqassasut, taama Naalakkersuisut tallimanngornermi unnukkut tusagassiuutitigut nalunaaruteqarlutik allapput.
Meeqqanut Inuusuttunullu Naalakkersuisup Aqqaluaq B. Egedep danskit Isumaginninnermut Ineqarnermullu Naalakkersuisoq Sophie Hæstorp Andersen Danmarkimi kalaallit ilaqutariit akornanni angajoqqaatut piukkunnaateqarnermut eqqarsartaatsikkullu inissisimanermut misissuisarnerit oqallisaaqalutillu kulturerisatsinnut tulluarsarneqanngeqisut pillugit ataatsimeeqatigaa. Tamanna tallimanngornermi novembarip ulluisa 15-anni pivoq.
Assigiinngissitsinerit unitsinneqassapput
Misissuisarnerit pineqartut manna tikillugu kalaallit ilaqutariit meeraasalu akornanni ingerlanneqartarsimapput. Naalakkersuisup danskillu Ministeriata isumaqatigiissutigaat kalaallit angajoqqaat inatsisitigut illersorneqartuarnissaat qulakkeerneqassasoq.
Ataatsimiinnermi tassani danskit ministeriata neriorsuutigaa, danskit kommuuniinut allakkiamik nassiussuiortortoqassasoq. Taassumalu allakkiap imarissavaa, kalaallit akornanni angajoqqaatut piukkunnaateqarnermut eqaarsartaatsikkullu inissisimanermut misissuisarnerit kulturerisamut tulluutinngilluinnartut tulluarsarneqanngitsullu unitsinneqarnissaanik oqariartuut.
- Danmarkimi kalaallit meerartaannik arsaarinnittarneq maani nunatsinni initusimaqaaq. Tassani taaneqartariaqarpoq isornartorsiorneqartorujussuup; angajoqqaatut piukkunnaateqarnermut misissuisarnerit kulturitsinnut tulluarsagaanngilluinnartut taamatullu uniuuttutut taaneqartariaqartut, arsaarinnittarnernut tunngavigineqartarsimanerat.
- Danskit Isumaginninnermut Ineqarnermullu Naalakkersuisuata ataatsimeeqatigereernerata kingorna, neriorsorpaanga – Danmarkimi kommuninut allakkianik nassiussuisoqassasoq, kalaallit ilaqutariit akornanni taamak misissuisarnerit unitsinneqarnissaannik oqariartuutitalimmik. Taamak kalaallinik ilaqutariinnik immikkoortitsinerit unitsittariaqarput, Meeqqanut, Inuusuttunut, Ilinniartitaanermut, Kulturimut, Timersornermut Ilageeqarnermullu Naalakkersuisoq, Aqqaluaq B. Egede oqarpoq.
Naalakkersuisup nuannaarutiginerarpaa, danskit Naalakkersuisa taamak misissuisarnerit unitsinneqarnissaannik innersuussineq tigulluarsimammassuk kalaallillu angajoqqaat inatsisitigut illersugaanerunissaannut oqariartuutigineqartut tigulluarneqarsimanerat iluarisimaarlugu oqariartuuteqarpoq.
