Inuiaqatigiit iliuuserisinnaasaanni sakkortunerpaat ilaat
tassaavoq meeqqamik angajoqqaavaniit peersineq.
Killissamik qaangiinerullunilu,
sakkortullunilu annilaanganarpoq.
Inuiaqatigiit iliuuserisinnaasaanni sakkortunerpaat ilaat
tassaavoq meeqqamik angajoqqaavaniit peersineq.
Killissamik qaangiinerullunilu,
sakkortullunilu annilaanganarpoq.
Taamaammallu allanik misileereerluni
ajortuuinnermi taamaallaat pisartussaavoq.
Suliami sivisuumik ingerlanneqartumi, meeqqap angerlarsimaffianiit
peerneqarnissaa sioqqullugu pisartussami pissutsit tamarmik misissorneqassapput
– minnerunngitsummillu innuttaasut danskiunatik kulturikkut oqaatsitigullu
allamik tunuliaquteqaraangata. Ilumut eqqortumik paaseqatigiittoqarpa?
Syddansk Universitetimi tarnip pissusaa pillugu professori Ask Elklit aamma
Aarhus Universitetimi tarnip pissusaa pillugu professori Dion Sommer Danmarkimi
kommuneni angajoqqaatut pisinnaasanik misissuinermut atatillugu angajoqqaat
kalaallit tarnikkut pisinnaasaannik misissuisoqartarnera
pissusissamisuunngilluinnartoq marluullutik oqaatiginikuuaat. Mianersoqqussut
Folketingimi tusaatissatut tiguneqarpoq misissuutillu innuttaasunut kalaallinut
atorneqarnerusut assersuutigalugu silassorissutsimut misissuut WAIS-IV aamma Rorschachip
pilikkimik simernermik misissuutaa oqaatsitigut kulturikkullu
nalimmassarneqarnissaannut aningaasanik immikkoortitsisoqarpoq. Taannali
oqaatsinut kulturimullu nalimmassaaneq pisariugami naammassiniaaluusaarpoq. Tamatuma
nalaani inuit pisinnaatitaaffii pillugit instituttip kommunit tarnikkut
pisinnaasanik misissuinernik pissusissamisuunngitsunik angajoqqaanut
kalaallinut atuissanngitsut kajumissaarpaat. Kommunit ilaasa kajumissaarut
malippaat, tamarmiunngitsulli.
Thisted Kommunep maanna meeraq suli inunngunngitsoq arnaaniit kalaallimiit
arsaarinnissutiginialeruttorpaa. Arsaarinninnermi angajoqqaarsianut tunniussinermik
kinguneqaratarsinnaasumi, misissuutit WAIS-IV aamma Rorschach, angajoqqaatut
pisinnaasanik misissuinermi 2014-imi ingerlanneqartumi, 2016-imi, 2019-imi
kingullermillu 2024-mi uteqqinneqartumi ilaasut kommunip atorpai. Sermitsiami suliami allassimasuutit tamaasa atuarpagut, tarnip pissusaanillu
ilisimasallit taakkorpiaat misissuinernik ingerlatsisuusartut, oqaluttuallu
taakkorpiaat ingerlateqqinneqartartut maluginiarnarpoq – aamma
eqqartuussissuserisoq sinniisorlu naapertorlugit eqqunngilluinnaraluartut,
arlaleriarlunilu naqqeqquneqaraluartut. Periuseq paasiuminaalluinnarlunilu annertuvoq, innuttaasunullu ataasiakkaanut
pisariuvoq. Qanormi angajoqqaajusinnaanngitsutut pasisaanermut –
arsaagaavinnermullu imminut illersortoqassava?
Thisted Kommunemi pisumi kalaallit peqatigiiffiisa,
innuttaasut najukkamilu palasip kommune kukkunerarlugu paasitinniaraluarpaat. Iluaqutaanngilarli.
Meeraq suli inunngunngitsoq kisitsisaatinut talornartunut
ilanngutiinnassagunarpoq. Meeqqat kalaallinik angajoqqaallit danskinik
angajoqqaalinnut sanilliullugit arfineq-marloriaammik amerlanerusut Danmarkimi
arsaarinnissutigineqartarput. Sermitsiap ukiuni arlalinngortuni angajoqqaat piginnaaneri pillugit
misissuisarnerit angajoqqaat kalaallit meeraanik angerlarsimaffiup avataanut
inissiinermut tunngatillugu suli atorneqartarnera pillugu Danmarkimi
isumaginninnermut ministeri oqaloqatiginiartarsimavaa. Iluatsinngitsumilli.
Kingullermik ima oqarsimavoq: ”Sophie Hæstorp Andersenip qanittukkut
apersorneqarnissaa ilimanaateqanngilaq. Ajuusaarutigaarput.”
Danmarkip oqaluttuarisaanerani meeqqat
tunngavissaqanngitsumik angajoqqaaminnit kalaallinit peersitaasarmata piffissaq
taarsiorfiusoq eqqartuussissuserisoq Jeanette Gjørret oqarpoq.
Taamaammat
Naalakkersuisut akuliuttariaqalerput. Pisut ajorluinnartut unitsinnissaanut
pissaaneqarpusi.
