Danmarkimi qarsutsineqarsinnaasoq DMI nalunaarpoq
Danmarkimi sumiiffiit ilaanni marlunngornermi 100 millimeter sinnerlugu siallissangatinneqarpoq, DMI-mit qarsutsisoqarsinnaanera aarlerinartoq nalunaaruteqartoqarpoq.
Lolland-Falsterimi Bjørupimi marloriarluni siallerujussuarpoq ataasinngornermi.
Assi: Ingrid Riis/Ritzau Scanpix
Ataasinngornermi Danmarkimi sialussuarpoq, Danmarks Meteorologiske Institutillu (DMI) ilimagaa marlunngornermi aamma taama siallertigissasoq.
DMI-mi silasiortoq Marie Timm marlunngornermi ullaakkut taama oqarpoq.
- Djurslandimiit Storebælt aqqusaarlugu Lolland-Falsterimut silarluppoq.
- Nunallu ilarujussuani siallingaatsiarnissaa ilimasaarutigineqarpoq. Illoqarfiit pingaarnersaanni najugaqaraluaraanniluunniit ullup ingerlanerani siallernissaa ilimagineqarsinnaavoq, oqarpoq.
Ullup ataatsip ingerlanerani 35 aamma 80 millimeterit akornanni siallersimavoq, nunap ilaani siallernerusimasinnaassalluni.
Lolland-Falsterimi siallernerpaasimavoq, tassa marloriarluni siallerujussuartoqarmat 80 millimeterinik siallersimagami.
- Sumiiffinni amerlanerni 50-80 millimeterit tikillugit siallernissaa naatsorsuutigineqarsinnaavoq. Sumiiffiit ilaanni siallernerusinnaavoq - ajorluinnarpat 100 millimeterit sinnersinnaallugit, silasiortoq oqarpoq.
DMI sialussuarujussuarnissaanik aarlerisaarivoq, nunallu kujataani, tassa Lolland-Falsterimi, Sydsjællandimi Fynimilu, siallernerpaassaaq.
- Nunap sinnerani aamma sialussuassaaq, ullormimi ataatsimi 50-80 millimeterinik siallernera sialussuarneruvoq. Tassanngaannartumilli siallilernavianngilaq. Sialleruusaaginnavinnissaali naatsorsuutigineqassaaq, Marie Timm oqarpoq.
Sumiiffinni arlalinni 18-it 22-llu akornanni kiassaaq.
- Ajornerpaajunngilaq. Taamaattorli aamma anoreqarpiarunnanngimmat isugutangaatsiassaaq, Marie Timm oqarpoq.
- 20 gradinik kiatsillugu sialussiuteqassagaanni ipianngunarsinnaavoq, ullormili tulliuttumi naammagittartoqartariaqarpoq, Marie Timm oqarpoq.
Aammattaaq DMI qarsutsineqarnissaanik aarlerisaarivoq.
- Kuuit kuunnerulissapput. Kuullu eqqaani najugaqartunut tamanna unammillernalaarsinnaavoq. Siunnersuutigisinnaavarput DMI nittartakkallu assigiinngitsut malinnaaffigeqqullugit, silasiortoq oqarpoq.
Marie Timmip oqaatigaa naammagittarnissaq pingaaruteqartoq. Siallerunnaarpammi aatsaat kuuit naliginnaasumik kooqqilerumaarput.
- Annertunerpaaffianiit ulloq ataaseq qaangiuppat kuuit nalinginnaasumik kooqqilersimassapput. Sumiiffinni siallernerpaaffiusimasuni kuuit pingasunngornermi qarsutsisinnaapput, oqarpoq.
/ritzau/
