Qeqqata Kommuniani kommunalbestyrelsip kingullermik
ataatsimiinnermini oktobarip 31-anni Qeqqata Kommuniata
avinneqarnissaanik atsiornernik katersisarnerit oqaluuserai.
Sisimiuni kingullermik atsiornernik
katersisoqarmat, innuttaasut 992-it Maniitsumit avissaarusunnertik
ersersippaat.
–
Isumaga naapertorlugu 2009-mi kommunerujussuanngortitsineq
kukkunerujussuuvoq. Nunatsinni pissutsit isiginiarnagit Danmarkimik
ilaarsiinnartoqarpoq.
-Maanimi Danmarkimisut biilerluta
ingerlaannarluta illoqarfimmut allamut ingerlariaannaanngilagut,
Nunatsinni pissutsit aallaavigalugit aalajangiisartuugutta
pitsaanerpaassagaluarpoq, Marianne Olsen Sisimiuni atsiornernik
katersisimasoq oqarpoq.
Hendrik Stachip Maniitsumeersup Marianne Olsenip kommunit
kattunnerannik isornartorsiuinera aamma isumaqatigaa.
- Marianne Olsen isumaqatigaa oqarmat, Danmarkimi kommunit
kattussuunneqarnerat 2009-mi ilaaginnarneqarsimasoq, tassani kommunit
kattunneqarnissaannut tunngatillugu suliassaraarput illoqarfinnik
allanik suleqatigisinnaasatsinnik ujarlernissaq, Maniitsumit Hendrik
Stach oqarpoq, nassuiaallunilu Maniitsumi piffissami kommunit
kattunneqarnerannut atatillugu suliffiit illoqarfimmit
nuunneqarsimasut.
- PolarOil sulisuilu Sisimiunut
nuunneqarput, illoqarfimmiunut ajuallaataaqisumik. Maniitsumilu
sullivinnik pilersitsinissamik pilersaarutit
piviusunngortinneqaratik, Hendrik Stach oqarpoq.
Akerliliiumaannartutut isiginnittaaseqarneq nuannarinngikkaa
Marianne Olsenip erseqqissarpaa, atsiornernik katersineq Maniitsumi innuttaasunut Qeqqata Kommunianiluunniit kiffartuussinermut isornartorsiuinertut isigineqassanngitsoq, kommunalbestyrelsimili ataatsimiinnerni Maniitsumit Sisimiunut akerliliiniaannartutut pissuseqarneq pissutaasoq.
-
Assersuutigeriartigu kommunalbestyrelsip
Sisimiuni majuartaatiliortoqarnissaanik aalajangiussaqarnera,
tamannarpiaammammi atsiornernik katersininnut patsisaasoq.
-Kommunalbestyrelsimi aalajangertoqarneranit ukiup affaa qaangiuttoq,
Maniitsumiit akerlilerneqarpoq, oqartoqarluni ”pinnguartarfissuarmik
sananasi Maniitsumi utoqqarnut illuliortoqarli”.
-Akuersissutigineqareersunut aningaasaliissutinik apeqqusersuineq nipi
nuanniitsoq atorneqartarluni ”akissaqarpugut?”, Marianne Olsen
oqarpoq, taassuma innuttaasutut qatsulluinnarpaa, Sisimiut
ajornartorsiutinut tamanut pisuutinneqartuaannarnerat, Maniitsullu
naammattunik aningaasaliiffigineqartannginneranut
naammagittaalliortoqartuaannarnera.
-
Maniitsormiut kamaatinngilavut, suleqatigiittoqassappalli nipi
pitsaanerusoq pisariaqarpoq. Kommunalbestyrelsimi oqaloqatigiittarneq
pitsaanerusariaqarpoq. Taannaana pillugu atsiornernik
katersisugut, nipit nuannernerusut atorneqartariaqarput, nipi
avaanngunartoq atorneqartassappat suleqatigiissinnaanermut
akornutaavoq. Tassa taanna
atsiornernik katersinitsinnut aallaaviuvoq, Marianne Olsen oqarpoq.
Innuttaasut maanna
tusaaniarneqalersut
Hendrik Stachip
Qeqqata Kommuniani suleqatigiinneq pillugu Maniitsumi innuttaasunik
ataatsimiititsisarsimasup, Maniitsumi innuttaasut 1.065-it
atsiortippai Maniitsup Qeqqata Kommunianit avissaarnissaanik
kissaateqartut, kommunip avinneqarnissaa 14-init akerlerineqarpoq.
- Innuttaasut illoqarfimmiut Qeqqata
Kommunianit sullinneqarnertik nalinginnaasumik
naammagittaalliutigisaramikku.
-Kommunip kiffartuussinera
innuttaasunit naammagittaalliuutigineqarami, misigisimallutillu
kommunimut saaffiginnittaraluarnitik kinguneqarneq ajortut. Innuttaasut aamma misigisimagamik saffiginnissutitik kommunimit
soqutigineqarneq ajortut.
-Innuttaasut aamma misigisimagamik
aalajangiinissanut peqataatinneqartaratik akuutinneqartaratillu.
Aamma naammagittaalliuutigineqarami Maniitsup Sisimiunit
immikkoortinneqartarnera, Hendrik Stach oqarpoq.
Taassuma
kommunalbestyrelsip avissaartoqarsinnaanera oqallisigeqqimmagu
nuannaarutigaa, tassa Sisimiuni kingullermik atsiornernik
katersisoqarnerata kingornagut.
Maniitsumi innuttaasut atsiornernik
katersuiniarnerat siorna naammassimmat, Qeqqata Kommuniani
kommunalbestyrelsi septembarimi 2023-mi aalajangerpoq,
Naalakkersuisut kommunip aaqqissugaanerannik nalilersuinissaat,
ilaatigut innuttaasut kommunimi kiffartuussinermik inuttaasullu
ataasiakkat sunniuteqarsinnaanerminnik naammaginninnerannik
nalilersuinissaq utaqqiniarlugu.
- Tassa
kiisami kommunip oqallisigimmagu naammagisimaarnarpoq.
Aamma
Sisimiuni innuttaasut kommunip avinneqarsinnaanera
oqallisigilermassuk qujanarpoq, iluarisimaarpara, Maniitsumi
innuttaasut maanna tusaaneqarsimapput, Hendrik Stach oqarpoq.
Innuttaasut
naammaginninngitsut naammagisimaarinnittullu amerlaqatigiittut
Nunamut
imminermut naalakkersuisup Jess Svanep (S), kommunit
aaqqissuussaanerisa nalilersorneqarnerat saqqummiuppaa, innuttaasut
akornanni kommunip innuttaasunik sullissinera innuttaasullu
ataasiakkat sunniuteqarsinnaanerannik naammagisimaarinnittoqarnersoq
misissuiffigineqarmat paasisat saqqummiullugit.
-
”Nuna tamakkerlugu
iluarisimaarinnittut iluarisimaarinninngitsullu agguataarnerat
innuttaasut akornanni naligiingajapput. Taamaattorli Kommuneqarfik
Sermersooq annertuumik immikkooruteqarpoq iluarisimaarinninngitsunut
sanilliullugu iluarisimaarinnittut marloriaataammata, tamannalu nuna
tamakkerlugu iluarisimaarinninnerup agguaqatigiissinneranik
kivitsisuuvoq."
" Kommuneqarfik Sermersooq iluarisimaarinninngitsunut
sanilliugu iluarisimaarinnittut amerlassusaanut qaffasinnerusutut
kisiartaavoq.”, naammagisimaarinninnermut misissuinermit taama
allattoqarpoq, Qeqqatalu Kommuniani assingusumik taama
inerniliisoqarluni.
”Qeqqata Kommuniani iluarisimaarinnittut iluarisimaarinninngitsullu amerlaqatigingajapput, kommunini allani innuttaasut akornanni iluarisimaarinninngitsut amerlanerujussuusut."
"Innuttaasut kommuniminnut tunngatillugu naliliinerminni suna pingaartinneraat ersarinngilaq. Kommunit sullissineri assigiinngitsut qimerloorutsigit, kommunit tamarmik nukittussuseqarlutillu sanngiiffeqarmata; sumiiffiit ilaanni ingerlalluartoqarpoq, allani pitsanngorsaanissamut suli pisariaqartitsisoqarluni.
Kommuneqarfik Sermersuumi aamma Qeqqata Kommuniani innuttaasut amerlasuut inoqarfimmi najukkaminni sullissinermik iluarisimaarinnittut, innuttaasunit iluarisimaarinninngitsunit, amerlanerupput.”
Kommunalbestyrelsip nutaap tamanna
sammissagaa
Jess Svane
naalakkersuisut kommunillu politikikkut ataqatigiissaarisuisa
ataatsimiinneranni ilisimatitsivoq apriilimi 2025-mi nalinginnaasumik
kommunimut qinersisoqassasoq, nalinginnaasumik kommunillu ullumikkut
avinneqarneratut avinneqartussamik, aamma kommunit angisuut
avinneqarnerisa aningaasaqarnikkut allaffissornikkut
kingunerisinnaasai misissorneqassasut.
Qeqqata Kommuniani kommunalbestyrelsip
ataatsimiinneranit imaqarniliami allassimavoq, allaffeqarfimmit
naliliisoqarsimasoq, Qeqqata Kommuniata avinneqarsinnaanera
komunalbestyrelsinngortussap, apriilimi 2025-mi qinersinerup kingorna
oqallisigiumaaraa, tamatumani innuttaasunik taasisitsisoqassanersoq
ilanngullugu.
