Danskit naalakkersuisui Kangerlussuarmik ikiuiniarput
Kangerlussuarmi innuttaasunut isumalluarnartumik illersornissamut ministeri Troels Lund Rasmussen nalunaaruteqarpoq. Illersornissaqarfiup nunaqarfimmiinneranik nukittorsaasoqarnissaanik Danmarkimi naalakkersuisut sulissutiginninniarput, tamannalu nunaqarfimmut iluaqutaasumik periarfissanik suliffissanillu pilersitsissaaq, tusagassiuutinut nalunaarummi allassimavoq.
Leiff Josefsen
Kalaallit Nunaanni Kangerlussuarmilu Illersornissaqarfiup suliassanik suliaqartarnerata nukittorsarnissaanik, Danmarkimi Naalakkersuisut pilersaaruteqarput. Nunaqarfimmi suli amerlanerusunik sulisussaqarnissaa Issittumi Sakkutooqarfimmit misissorneqaleruttorpoq.
- Kangerlussuup mittarfiata ingerlateqqinneqarnerani Illersornissaqarfik qanoq peqataassanersoq aamma paasinialeruttorparput. Illersornissaqarfiup siunissami najuunnera suliniuteqarneralu Kangerlussuup piujuaannarnissaanut ineriartornissaanullu iluaqutaassasut qularinngilara, Illersornissamut ministeri Troels Lund Poulsen oqarpoq.
Kangerlussuup mittarfiata ingerlateqqinneqarneranut aserfallatsaaliinermut aningaasartuutit ilaat Illersornissaqarfimmit akilerneqarumaartut nalunaarutigineqarpoq.
Issittumi Tunngaviusumik Ilinniarfik sapaatiummat Kangerlussuarmi ammarneqarpoq, tamatumunngalu atatillugu Illersornissamut ministerip oqaatigaa ilinniarfiup allilerneqarnissaa pilersaarusiorneqaleruttortoq, taamaalilluni ilinniartut amerlanerulissammata – maanna ukiumut 22-nit 30-nut.
