Demokraatit Kujallermi borgmesterinngortitsinissaq qulakkeerpaat
Kommunimut qinersinermi kujatani qinigaalluartoq Malene Vahl Rasmussen (D) Kommune Kujallermi borgmesterinngussaaq.
Malene Vahl Rasmussen (D) kommunimut qinersinermi 361-nik taaneqartoq Kommune Kujallermi borgmesterinngortussanngorpoq.
Arkivfoto: Leiff Josefsen
Kommune Kujallermi kommunimut qinersinermi politikikkut inissisimaneq mumisinneqarpoq, Inuit Ataqatigiillu qinersisartunik sakkortuumik pillagaanermikkut arfineq pingasunik ilaasortaatitaqarsinnarlutik pingasuinnarnik ilaasortaatitaqalerput.
Demokraatit siuariarujussuarlutik kommunalbestyrelsimi inissanik arfineq marlunnik qulakkeerinnipput, maannalu tassa aamma borgmesterinngortitsisussanngorput.
Taama partiimi qinigaarujussuartoq Malene Vahl Rasmussen Facebookimut ivertitamini allappoq.
Demokraatit Siumumik isumaqatigiissuteqarput, taamaalillunilu aqutseqatigiilersut kommunimi inissanit 15-nit inissat aqqaneq marluk qulakkeerpaat.
- Pissaaneqarniuttoqanngilaq
Malene Vahl Rasmussen qinersinermi 361-nit qinerneqarpoq, taamaalillunilu politikerini amerlanerpaanik inuttut qinerneqarluni. Isumaqatiginninniarnerit pitsaasumik ingerlasut qujassuteqarfigai:
- Siullermik pitsaasumik iluameertumillu isumaqatiginninniarnerit ingerlanneqarnerat qujassutigissavara. Ukiuni tullerni sisamani sulinissatsinnut tunngavissarput maanna pilersipparput.
- Ataasiaannarluniluunniit pissaaneqarniuttoqanngilaq, borgmesterimmi pisariaqartitai tamakkiisumik aallunneqarput, allannguinissamillu kissaateqarnerat ataqqilluinnarpara, Malene Vahl Rasmussen Facebookimi allappoq.
Inuit Ataqatigiit pingasunik ilaasortaatitaqarlutik illuatungiliuttunngorput – taakkununngalu qinigaaffiup siuliani borgmesteriusimasoq Stine Egede ilaavoq:
- Inuit Ataqatigiit illuatungiliuttussanngorput, kommunalbestyrelsimilu suleqatiginissaannut aamma qilanaarpunga, Malene Vahl Rasmussen allappoq.
Qinersineq oqaluttuarisaanermi pingaarutilik
Demokraatit sinnerlugit siulliulluni borgmesterinngornini nuannaarutigaa:
- Demokraatit sinnerlugit borgmesteritut siullertut qinigaaninni, nunatsinnilu ukiukinnerpaajullunga borgmesterinngorninni oqaluttuarisaanermut ilannguppunga, tamannali tapersersorteqarnanga angusimasinnaanngilaq, taamaammallu qujaqqippunga, politikeri allappoq.
Borgmesteri nutaaq suliassarpassuaqarpoq, Kommune Kujallermi ukiuni kingulliunerusuni aningaasaqarnikkut annertuumik ajornartorsiuteqartuarpoq.
2024-mi upernaakkut kommunip nammineerluni Namminersorlutik Oqartussanut akileraarutinut 40 million kr-ni akiitsunissimanini paasivaa, suliarlu aaqqinniarlugu kommunit taarsigassarsiai qaffattariaqarsimallutik. Maannakkorpiaq kommunip sanarfeqqinneqarnissaanut pilersaarut ingerlanneqaleruttorpoq, suliamilu tassani 70 million kr-nik sipaarniartoqartussaavoq.
