Demokraatit qinersinerup tulliani amerlanernik qinerneqarnissartik naatsorsuutigaat
Jens-Frederik Nielsen Demokraatini siulittaasutut qinigaaqqippoq. Partii ukiuni kingullerni amerlanernik ilaasortaqalerpoq, ilaatigut Kommune Kujallermi kommunalbestyrelsimi pingasunik nutaamik ilaasortaqalerluni
Jens-Frederik Nielsen Demokraatit ileqquusumik ataatsimeersuarneranni siulittaasutut qinigaaqqippoq.
Leiff Josefsen
Demokraatit siulittaasuat Jens-Frederik
Nielsen Demokraatit siunissaat pillugu isumalluarpoq. Taanna Café
Tamumi marsip 15-iani ileqquusumik ataatsimeersuartoqareersorlu
siulittaasutut qinigaaqqippoq.
-Qinigaaqqinnera nuannaarutigaara suliallu nangeqqinnissai qilanaaralugit. Demokraatit inissisimalluarput, nunamilu tamarmi inunnit tapersersorneqarneq kaammattorneqarnerlu malugisinnaavara. Tamanna siunissamut isumallualissutigaara, Jens-Frederik Nielsen oqarpoq.
Anna Wangenheim politikkikkut siulittaasup tulliatut ingerlaqqippoq, Nivi Olsen aaqqissuussaanikkut siulittaasup tulliatut ingerlaqqippoq Malene Vahl Rasmussenilu aningaaserisutut ingerlaqqilluni. Tamarmik unammillerteqaratik qinerneqarput. Siulersuisuunerni Rachel Ingemann, Margrethe Thårup Andersen aamma Lena Ravn Davidsen ilaasortanngorput. Sinniisussatut siullertut Minik Serano Frederiksen qinerneqarpoq.
Jens-Frederik
Nielsenip Demokratiit 2022-miilli siuariartornerat misigaa,
qinersisartut 18,5 procentiisa Folketingimut qinigassanngortitaat,
Anna Wangenheim aamma Justus Hansen, qinerpaat.
-Folketingimut kingullermi qinersisoqarmat siulianiit marloriaammik qinersisigut amerlanerupput. Qinersinerit taakku marluk sanillersuunnagit inerneri tulluusimaarutigissavagut. Takussutissiivoq Demokraatit sumut ingerlanersut, inuiaqatigiinnilu qinerneqartuaannartunit periarfissatut isigineqaleriartuaarnerput. Takussutissiivoq aamma Demokraatiuneq paquminarpallaarunnaartoq.
Kujallermi
ilaasortat pingasut
Demokraatit
kommunimut qinersisoqarneraniilli Kommune Kujallermi
kommunalbestyrelsimi pingasunik ilaasortaatitaqalersimanerat
Jens-Frederiup tulluusimaarutigalugulu nuannaarutigaa.
- 2023-mi
marsimi oqaluttuarisaanermi immikkuullarissumik pisoqarpoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat ilaanni allaaserisaavoq.
Allaaserisat pisartagaqartunit siunissami taamaallaat atuarneqarsinnaajumaassapput.
Atuarluarna.
Kommune
Kujallermi kommunalbestyrelsemi ilaasortaq Margrethe Thårup Andersen
partiitsinnut nuuppoq, taanna tulluusimaarutigalugu
nuannaarutigaarput aamma pingaartillugu Kommune Kujallermi qanimut
oqartussaaqataanermi sunniuteqaqataasinnaanissarput tassani
tunngavissinneqarmat, Jens-Frederik Nielsen oqarpoq.
Demokraatit
Kujallermi 2024-p aallartinnerani aamma ilaasortaat ilaqqipput, tassa
Simon Simonsen aamma Karen Marie Kyed Siumumit Demokraatinut
nuummata.
-
Maannakkut taakku pingasut kommunimi sunniuteqarsinnaanitsinnut
tunngaviliissapput, nunatta ineriartortinnissaanut sulinitsinnik
siuarsaanissamut, minnerunngitsumik Kommune Kujallermi. Kujataani
ineriartornissamut periarfissarpassuaqartoq isumaqatigiissutigaarput. Qinigaaffiup naajartornerani ilaasortat amerliartornerat
malugisinnaavarput, naak kommunimut qinersinermi kingullermi partiip
qinigassanngortitsinngikkaluartoq, Jens-Frederik Nielsen oqarpoq.
-
Siuariarneq tamanna aappaagu Inatsisartunut qinersinissamut immaqaluunniit ukioq manna piviusunngoreertussami –
iluaqutigissavarput, siulittaasoq oqarpoq.
Immikkoortortaqarfiit
aningaasaliiffigalugit
Demokraatit
ukiumoortumik naatsorsuutaanni takuneqarsinnaavoq partiip 100.000
koruuninik amigartooruteqarnera. Amigartooruteqarnermut pissutaavoq
Kujataani partiip immikkoortortaqarfik nukittorsarniarlugu
angalasimanera.
Partii nammineq 800.000 koruuninik
aningaasaateqarpoq, qinersinissallu tullianut aningaasanik
immikkoortitsisoqarluni.
-Siulersuisuunerit amigartoornissaq naatsorsuutiginikuuaat. Partiip alliartornissaa anguniarlugu immikkoortortaqarfiit tikeraarnikuuagut, Inatsisartunut kommuninullu qineqqusaarsinnaasunik piukkunnaatilinnik oqaloqateqarnissaq siunertaralugu. Tamanna amigartoornermut pissutaavoq, kisianni partiip nukittorsarnissaanut aningaasaliinertut isigaarput, aamma pilersaarutigaarput avannamut Ilulissanut, Upernavimmut, Uummannamut angalanissaq, Jens-Frederik Nielsen oqarpoq.