Diamanti nunarsuarmi annerpaap tullia Botswanami nassaarineqartoq

Diamanti 2492 karatiusoq Botswanami Karowemi diamantisiorfimmi nassaarineqarpoq.

Taama Canadami aatsitassarsioqatigiiffik nassaartut nalunaarput.

Diamanti taanna diamantinit silineqanngitsuni nassaarineqartuni anginersap tulleraa.

Diamantit annersaat, diamantitut Cullinanimik taaneqartartoq, 3106 karatiusoq Afrikami Kujallermi 1905-imi nassaarineqarpoq.

Taassuma ilaa tuluit kunngikkormiuisa erlinnartuutaanut kingorna ilanngunneqarpoq.

Diamantimik ujaasisartut Lucara Diamondimik taaguutillit nalunaarutigaat diamanti qinnguartaat atorlugu nassaarineqarsimasoq, aatsitassarsiorfik paasissutissiivoq.

Diamantinik piiaaffik naapertorlugu qinnguartaat atorlugu diamantinik angisoorsuarnik naleqangaartunik nassaartoqarsinnaalersimavoq.

Diamantip qanoq pitsaatiginera naleqarneraluunniit paasissutissiissutigineqanngilaq.

Assinili aatsitassarsioqatigiiffiup saqqummiussaani takuneqarsinnaavoq diamanti itumattut angitigisoq.

Botswanami præsidentip, Mokgweetsi Masisip, diamanti sisamanngorpat takuniartussaavaa.

Taassuma naalakkersuisui oqarput nassaarineqartoq nunarsuarmi anginerpaap tullerigaa.

Tobias Kormind, ujaqqanik pinnersaasiassanik tuniniaavimmi 77 Diamondsimi pisortaasoq, naapertorlugu siunissami assingusunik nassaartoqarnissaa ilimagineqarsinnaavoq.

Teknologi nutaaq atorlugu diamantinik angisoorsuarnik innarlerneqanngitsunik piiaasoqarsinnaalersimasoq AFP-mut oqarpoq.

Botswana Afrika kujallermiippoq. Nutaarsiassaqartitsivik Reuters naapertorlugu nunami tassani diamantinik piiaaffiit annersaat inissisimavoq.

Diamantinik piiaaneq nunap isertitaasa pingaarnersaraat, nunap aningaasaataata 30 procentiisa missaanniipput nunallu avammut tunisartagaasa 80 procenteralugu.

Diamantit nassaarineqartoq sioqqullugu Botswanami nassaarineqartut annersaat 1758 karaatiuvoq.

Diamanti 2019-imi nassaarineqarpoq Sewelomillu atserneqarluni.