Drone Ukrainiliartussaq Kangerlussuarmi misilerarneqartoq

Kangerlussuarmi droninik misileraavimmi dronimik misileraaneq siulleq angusaqarluarfiuvoq.

RQ-35-p Arctic Adventureanik decembarimi 2024-mi ingerlanneqartup inernerisa tamanna takutippaat.

AAMMA ATUARUK

- Maanna aallartippugut

Taama droniliortut Sky Watch A/S Aalborgimiittut LinkedInimi allapput.

Sky Watchimi nittarsaassinermut pisortaq Thomas Jensen ima Sermitsiaq.AG-mut oqarpoq:

– Dronitta imaannaanngitsumi tutsuiginartumik atorsinnaanera Kalaallit Nunaata silaannaani peqqarniitsumi misilerarparput. Nioqqutissiamik pitsaasumik sakkutuut pisariaqartitsinerminni tatigisinnaasaannik tunniussisinnaanerput uatsinnut pingaaruteqarluinnarpoq.

Sky Watch Aalborgimi qullersaqarfeqarpoq, Europallu avannaanni droniliortuni annersaalluni.

Sky Watch taamaalilluni Ukrainep sakkutuuinut droninik pilersuisuuvoq.

- Droni taamaattoq Ukrainemi sakkutuut atortarpaat?

– Aap, droni taamaattoq nutaanerusoq.

Sky Watchip droni Ukrainemut manna tikillugu tunisagaa RQ-35 Heidrunimik taaguuneqarpoq. Sky Watch nittartakkakkut quppernermini dronini minnerni – UAS unmanned airdraft system – illersornissamut pitsaanerpaasoq oqaatigaa.

- Dronit taamatut qanoq amerlatigisut Ukrainemut tuninikuuisigit?

– Tamanna isertugaavoq, droninili taamaattuni Ukrainemut pilersuisuni siuttunut ilaavugut, Thomas Jensen oqarpoq.

Misileraaneq iluatsilluartoq

RQ-35 dronimik Kangerlussuarmi misileraaneq Sky Watchimi cheftestpilotimit Jesper Meldgaard Christensenimit ingerlanneqarpoq.

Taanna 2024-mi decembarimi RQ-35 dronip silap pissusaani peqqarniitsuni atuussinnaassusia nalilersussallugu Kangerlussualiarpoq.

Jesper Meldgaard Christensenip misileraanermi misilittagarilikkani LinkedInimi saqqummiuppai:

“Atorsinnaalluarpoq ilimagisannillu pitsaanerujussuulluni! Nalinginnaasumik batteriip atorsinnaassusia nillertumi annikillisarpoq, taamaammallu batteriit oqorsarpavut – ilaatigut qaatiguutsinniitittarlugit."

"RQ-35-mili tamanna pisariaqanngivippoq! Dronitta atorsinnaassusiata pitsaassussaa nalilerumallugu batteriit oqorsarunnaarpagut, pitsaassusaallu nikinngilaq."

"Atorsinnaassusiisa sivisussusaanni atortuvut tamaasa silami 22-nik issittumi kuffertimi unnuisippagut, puiiaratsigulu ingerlaannaq timmisinnaalernera nuannaarutigalugu nalunaarutigisinnaavara!”, Jesper Meldgaard Christensen LinkedInimi oqarpoq.

Droninik misileraavik

Droninik misileraavik Qeqqata Kommunianik Arctic Unamannedimillu ingerlanneqarpoq.

Laust Løgstrup kommunimeersoq misileraaneq pillugu ima oqarpoq: "Tamatuma kalaallit qallunaallu droninik suleqatigiinnerat, Odensimi il.il. dronit pillugit ataatsimeersuarnermi suleqatigiinnerlu malillugu isumassaqarluartoq takutippaa.

Mads Petersen Arctic Unmannedimeersoq decembarimi misileraaneq pillugu Sermitsiaq.AG-mut ima oqaaseqarpoq:

"Ineriartornermi manna angusaavoq pingaarutilik… suliffeqarfiit pineqartut silaannartatsinnik periarfissaqartorujussuartut isiginninnerat pitsaasuuvoq, maanimi pinngortitami kalluarneqanngitsumi inuttalinnillu silaannakkut angallannermik akornusersuisoqannginnerani periarfissat takusinnaavaat".

2024-mi upernaakkut droninik misileraavik sermersuup tungaanut aqqusinermi Akuliarusersuup Kuuata eqqaanniittoq akuerineqarpoq, tamaani inunnik najugaqartoqanngilaq, tassanilu eqqissilluni sermersuaq, nuna, tatsit kooqarfiillu qulaavaallugit droninik misileraasoqarsinnaavoq.

Arctic Unmanned silaannartamik annertunermik atugassaqalerumalluni oqartussaasunik attaveqartoq, Mads Petersen oqarpoq.

"Pisisartutta ilaasa isikkivik qaangerlugu 50 kilometerit angullugit isorartussusilimmi timminermik misileraasinnaanertik kissaatigaat."

Mads Petersen pisisartuminut nalunaarummini misileraaneq siulleq pillugu tuluttut ilaatigut ima allappoq:

"Misileraavipput pisisartutta pisariaqartitaannik naammassinnissinnaajumalluni tamakkiisumik atortulersugaanera nuannaarutigalugu nalunaarutigissavara. Tamaani inuttalinnik silaannakkut angallannermik akornuserneqarnani killeqanngitsumik timmisinnaaneq neqeroorutaavoq, taamaaliornermilu ingerlaavartumik misileraasinnaaneq qularnaarneqarpoq" (aaqqissuisoqarfimmi nutsigaq, aaqq.)