Dronningi Mary Nersornaammik nunatsinni tunniunneqartartumik nersornaaserneqarpoq
Inatsisartut siulittaasuat Mimi Karlsen Nersornaat kuultiusoq Dronningi Marymut tunniuppaa, meeqqanut inuusuttunullu Kalaallit Nunaanni atugarissaarnermut tunngasunik suliniuteqartarnera pillugu nersorniarlugu.
Dronning Mary Nersornaatimik kuultiusumik pissarsivoq.
Assi: Ida Marie Odgaard/Ritzau Scanpix
Dronningi Mary siunissami Kalaallit Nunaanni nersornaammik akimanerpaamik, Nersornaammik kuultiusumik, nersornaatitut saqqarmioqarsinnaalissaaq.
Inatsisartut siulittaasuat Mimi Karlsen (IA) Danmarkimiissimalerpoq dronningi nersornaammik tuniniarlugu. Kunngikkormiut nittartakkaminni taama ilisimatitsipput.
Mimi Karlsen Amalienborgimi Frederik VIII’s Palæmi nersornaasiinermi najuuppoq.
Dronningi Maryp nersornaat ilaatigut pissarsiaraa ukiorpassuarni ingammik Kalaallit Nunaanni meeqqat inuusuttullu atugarisaasa pitsanngorsarniarnissaannik suliniuteqarsimanini pillugu.
Annerusumik suliniuteqarneq nersorneqarpoq
- Siulittaasoqarfiup kuultiusumik Nersornaaserpaatsit Kalaallit Nunaanni inuiaqatigiinni ajornartorsiutit annertuut, soorlu meeqqat inuusuttullu inuttut atugarisaat qulequttallu allat paquminarsinnaasut eqqarsaatigalugit ukiorpassuarni annertuumik inuttullu pimoorussisarsimanitit pissutigalugit. Ataqqinartorsuaq Dronning Mary, kunngissap nuliatut maannalu kunngip nuliatut atuunninni, meeqqat akornanni pimmatiginnittarneq akiorniarlugu suliniuteqarnermi qulequttanilu paquminarsinnaasuni allani, soorlu inuttut aliasuuteqarnernik suliarinninniarnerni imaannaanngissinnaasuni, pimoorussilluartarnerit takutissimavat.
- Ataqqinartorsuaq Dronning Mary, qulequttat imaannaanngissinnaasut paqumiginagit sammisarpatit taamaaliornikkullu kissalaarnikkut, oqaasertaliisarnikkut, peqataatitsisarnikkut paasinnittarnikkullu qulequttat imaannaanngissinnaasut eqqartoruminarnerulersittarlugit, Inatsisartut siulittaasuat Mimi Karlsen (IA) Nersornaammik tunniussinermini oqaaseqarpoq.
Inatsisartut ilisimatitsipput, Nersornaat sølvimik sanaajusoq tunniunneqartumut pigitinneqartartoq, Nersornaalli kuultiusoq Kalaallit Nunaata Namminersorlutik Oqartussaannit pigineqarmat, toqusoqarnerani utertinneqartussaasoq.
Saqqarmiup tunniunneqartup saniatigut Inatsisartut siulittaasuata atsiugaanik dimplomimik tunniussisoqarpoq.
