Efterskolet pillugit inatsisissamik suliaqarneq workshopimik aallartittoq
Naalakkersuisut Efterskolit pillugit inatsit allanngortinnissaa suli siunertaraat, taamaalilluni Savalimmiunut atuariartornissamut tapiissutinik qinnuteqartoqarsinnaalissalluni. Inatsimmik suliaqarneq aallarnerlugu novembarimi workshopertitsisoqassaaq.
Efterskolit pillugit inatsisip allanngortinnissaa suli pilersaarutaasoq, tamannali siusinnerpaamik 2025-mi pissasoq Naalakkersuisoq Aqqaluaq B. Egede (IA) ilisimatitsivoq.
Fotograf: Leiff Josefsen
Savalimmiuni efterskolersinnaanissamut taperneqarsinnaanissaq ilinniartitaanermut naalakkersuisoqarfiup, Danmarkimi ilinniartitaanermut aqutsisoqarfik suleqatigalugu, novembarimi workshopertitsinissaani eqqartorneqartussat ilagaat.
Peter Olsenip paragraf 37 naapertorlugu apeqqutaanut akissummini ilinniartitaanermut naalakkersuisoq Aqqaluaq B. Egede paasissutissiivoq.
- Kalaallit efterskolii,
kommunit efterskolinut ingerlatsivii, Efterskolertut peqatigiiffiat
(Danmarkimi) aamma Foreningen af Frie Fagskoler (Danmarkimeersoq)
workshoppertitsinissaanut aggersarneqarput, naalakkersuisoq akissummini ilisimatitsivoq.
Efterskolet pillugit inatsisip allanngortinneqarnissaa Inatsisartunut aappaagu saqqummiunneqassasoq suli siunertaavoq.
Tunngavilersuut
Savalimmiunut efterskoleriartoqartalersinnaanera pillugu Peter Olsenip Naalakkersuisunut ukioq manna siusinnerusukkut apeqqutigaa. Inuusuttunut imarsiornermik soqutigisalinnut Savalimmiut pingaaruteqartoq taanna isumaqarpoq.
- Assersuutigalugu imarsiornermut tunngasumik sammisaqarfiusinnaasoq Føroya Eftirskúli – Sjógøta 2 – 800 Tvøroyri Føroyar nunaqqatinnguatta ilaata efterskolerfiginiaraluarlugu ajoraluartumik tapiiffigineqarsinnaangilaq.
- Imarsiornermik inuussutissarsiortuuvugut, inuusuttortavullu imarsiornermik soqutigisaqartut tapersersornerusariaqarpavut. Naak pineqartoq efterskolerne.dk-miikkaluartoq taamaattoq tapiiffigineqarsinnaasimanngilaq. Uggornarpoq ajuusaarnarporlu, naak kunngeqarfiup tamatta ataaniikkaluarluta, Peter Olsen 2024-mi januaarimi sammisaq pillugu apeqquteqarnermini ilaatigut tunngavilersuutigaa.
